Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ee, sangpangjamanki' Filemon, tokipakamoja' sola jamaa to sirempun iti' bolamu na padanta' tomatappa' Apfia na sangpangjamanta' Arkhipus! Aku' Paulus, to ditarungku, nasaba' nturu'na' Puang Isa Almaseh, ngkiringan kamu' tee sura' sola padanta' tomatappa' Timotius.

² (1:1)

³ Dennaa upa' nabarakka'i kamu' Ambe'ta' Puang Allataala sola Puang Isa Almaseh, naben kamu' kamasannangan.

⁴ Ia angkumassambajang tuli kupassambajanganko, mangkurru sumanga'na' lako Puang Allataala sanga iko,

⁵ nasaba' kusa'ding kumua matappa'ko lako Puang Isa, na mupakamoja' tongan to umma'-Na Puang Allataala.

⁶ Massambajangna' kumua ammuissen tonganni to sininna barakka' pole jio mai Almaseh, sanga pada matappa'ki'.

⁷ Ee, sile'toku'! Ia tongkusa'dingngi kumua mupakamoja'i to sininna umma'-Na Puang Allataala, masannangna' na masumanga' toona', nasaba' mupaendek sumanga'na umma'-Na Puang Allataala.

⁸ Sitonganna wa'dingna' ssuako mpugaukki to la sipato'na mupugauk, nasaba' nabenmo' kuasa Almaseh.

⁹ Apa kupeta'da bangri lako iko, nasaba' ia to pangpakamoja'mu lako umma'-Na Puang Allataala. Ia tee aku' mesa'na' tomatua, na ia tee too ditarungkuna', sanga rasulu'-Nana' Puang Isa Almaseh.

¹⁰ Iamo joo kupeta'dai lako kalemu mpatu Onesimus anak kupakamoja', to kuajahhi lan pangtarungkuan anna matappa' lako Puang Isa Almaseh.

¹¹ Ia tee Onesimus jolona te'da bang bua'na lako iko, apa ia tee too denmo bua'na lako iko sola aku'.

¹² Ia tee Onesimus, to kupakamoja', kusuai pole mati'.

¹³ Madoangra' la mpatorropi anna sulleko mbaliina' ke lanpa' pangtarungkuan, nasaba' mpangpeissenanna' Kareba Kasalamatan.

¹⁴ Apa te'da kulampatorroi, ke tangmueloranni. Madoangra' kumua ia ke mueloranni, te'da kuparukuko, apa la situru' canning atimmu.

¹⁵ Mbai iamo misisarak cingga'tuk, dikua ammutarimai ratu lako ahera',

¹⁶ apa te'damo nalasusi bang kaunanmu, apa la susi sile'tota' to kaminang dipakamoja'. Na kupakamoja'mo, apa pole' iko. Mupakamoja'i susi kaunanmu sola sile'tomu to pada matappa'mo lako Almaseh.

¹⁷ Ia ke mupusile'tona', meta'dana', "Tarimami tee Onesimus susi aku' mutarima."

¹⁸ Ia ke denni salana, karugianmu ba'tu indanna lako iko, aku'mora mpuindanni.

¹⁹ Aku' Paulus nnuki'i tee: aku' la mbajahhi to indanna Onesimus. (Te'da kuparallu mpangngingaranko kumua ia to indan penawa meloku' lako iko la'bi buda, nasaba' kuajahhiko ammumatappa' lako Puang Isa Almaseh.)

²⁰ Ee, sile'toku'! Kupeta'dai dennaa upa' naden bua'na pole jio mai iko, situru' pakkaeloran-Na Puang Allataala. Pamasannangna', nasaba' pada matappa'ki' lako Almaseh.

²¹ Kukanassai kumua la mupesa'dingngi unana', na kuissen too kumua la'bi melo to mupugaukkuna na ia to kupeta'danna. Iamo joo kuuki'i tee sura' lako iko.

²² Mepasan toona' kumua mupasadianna' ngenan iti' bolamu, nasaba' kukanassai kumua la natarima Puang Allataala to peta'da doangmi sola ngasan, kuwa'ding pole mati' tatorro sola.

²³ Sallangna Epafras, to kusolan inde' pangtarungkuan, nasaba' nturu' todai Puang Isa Almaseh.

²⁴ Sallangna toda sangpangjamanku' Markus, Aristarkhus, Demas sola Lukas.

²⁵ Dennaa upa' nabarakka'i kamu' Puang Isa Almaseh. Padamo jolo' too. Sallangki' mati', Paulus

Filemon

Video Filemon 1

Ikuti Kami:

KONTAK | PARTISIPASI | DONASI