Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Surat enda i bas aku nari, Paulus, si ipenjaraken erdandanken Kristus Jesus, bage pe i bas seninanta Timotius nari. Surat enda man bandu, Pilemon, si ikelengi kami, teman kami sada dahin

² ras man perpulungen si pulung i rumahndu, bage pe man turangta Apia ras temanta seperjuangen Arkipus.

³ Dibata Bapanta ras Tuhan Jesus Kristus mereken lias ate ras kemalemen ate man bandu gelah.

⁴ Rusur kukataken bujur man Dibatangku tep-tep kali kam kuinget i bas pertotonku.

⁵ Sabap nggo kubegi kerna kekelengenndu man anak-anak Dibata ras kiniteken si lit i bas kam nandangi Tuhan Jesus.

⁶ Ertoto aku gelah arah persadanta kalak si erkiniteken mabai kita ku pengertin si terbagesen kerna kerina pemere si ialoken kita i bas kegeluhenta erkiteken persadanta ras Kristus.

⁷ O seninangku si kukelengi, kekelengenndu e erbahanca ateku malem dingen mpegegehi aku! Kerina anak-anak Dibata nggo ermeriah ukur ibahanndu.

⁸ Erdandanken si e pang kal aku seninandu i bas Kristus merentahken kam erbahan kai si arus ilakokenndu.

⁹ Tapi erkiteken keleng ateku kam, ulin kuakap aku mindo saja man bandu. Si enda kubahan aminna gia aku, Paulus, nggo metua, janah sangana ipenjaraken erkiteken Kristus Jesus.

¹⁰ Emaka mindo aku man bandu kerna si Erguna, si nggo jadi anakku erkiteken kiniteken tupung aku sangana i bas penjara.

¹¹ Nai la ia erguna man bandu, tapi genduari erguna ia labo saja man bandu tapi man bangku pe.

¹² Buah ateku si kukelengi enda, genduari kusuruh mulihken man bandu.

¹³ Si tuhuna ateku min i jenda nge ia ras aku, kidekah aku i bas penjara erkiteken Berita Si Mehuli, gelah banci ia jadi gancihndu nampati aku.

¹⁴ Tapi la ateku kupaksaken kam nampati aku; ateku min si e ibahanndu alu ukur meriah. Alu bage la aku nggit erbahan kai pe adi la leben isetujuindu.

¹⁵ Banci jadi si Erguna sirang ras kam kentisik gelah banci ia ras kam rasa lalap.

¹⁶ Genduari lanai bo ia budak ngenca, tapi ndauh ganjangen asangken sekalak budak. Ia me seninandu si meherga i bas Kristus. Keleng ateku ia, tentu lebihen ka pe kekelengenndu man bana, subuk selaku manusia bage pe i bas Tuhan.

¹⁷ Emaka adi temanndu kin iakapndu aku, alokenlah ia mulihi bagi pengalokenndu aku.

¹⁸ Adi lit nai salahna man bandu, ntah lit utangna, jadi utangku bahan.

¹⁹ Aku jine nuratkenca bagin si enda, "Aku, Paulus, nggalarisa pagi kerina man bandu." (Tentu labo perlu kupersingeti man bandu maka kam jine pe rutang man bangku, e me dirindu jine.)

²⁰ O seninangku, sampatindu min aku erkiteken Tuhan; pesenang min ukurku sabap kita ersenina i bas Kristus.

²¹ Asum aku erbahan surat enda, tek aku maka ialokenndu pemindonku enda. Si tuhuna kueteh maka lebih asang si e pe nggit nge kam.

²² Tambah si e sikapkenlah sada kamar man bangku, sabap ngarap aku maka pertotonndu kerina ibegiken Dibata, janah IbahanNa aku mulihken ndahi kam.

²³ Epapras si ipenjaraken ras aku erkiteken Kristus Jesus, ngataken mejuah-juah man bandu,

²⁴ bage pe Markus, Aristarkus, Demas, ras Lukas temanku sada dahin.

²⁵ Lias ate Tuhan Jesus Kristus ras kam kerina gelah.

Filemon

Video Filemon 1

Ikuti Kami:

KONTAK | PARTISIPASI | DONASI