Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sudaro Filemon, kawan sarato jo kanti kami! Ambo, si Paulus surang tahanan dek karano di Isa Almasih, samo-samo jo sudaro kito si Timotius, mambuwek surek ko kabake angkau,

² sarato jo kabake jamaat nan bakumpua di rumah angkau; sarato kabake sudari kito, si Apfia sarato jo kanti sapajuwangan kito, si Arkhipus.

³ Kami ma arokkan, mudah-mudahan Allah Bapak kito, sarato jo Tuhan Isa Almasih, mambari barakaik sarato jo aman santoso kabake angkau kasadonyo.

⁴ Satiyok kali ambo badowa, ambo manyabuik namo sudaro sarato jo batarimo kasih kapado Allah.

⁵ Dek karano ambo mandanga, baraso sudaro sabana-bana ba iman kapado Tuhan Isa Almasih, sarato mangasiahi kasadonyo umaik Allah.

⁶ Ambo badowa mudah-mudahan pasudaroan kito sabagai urang-urang nan ba iman, ka ma asiekan pangaratian nan labiah dalam, ateh sagalo barakaik nan kito miliak-i, dek karano basatu jo Isa Almasih.

⁷ Oih sudaro Filemon, kasiah angkau taradok kasadonyo umaik Allah, manggadangkan ati ambo, sarato mambari dorongan kabake ambo! Kasadonyo umaik Allah, lah jadi basukocito dek karano di angkau.

⁸ Dek karano itu, sabagai surang sudaro nan sa iman, ambo bisa sajo mamarentahkan angkau, untuak mangarajokan apo nan musti angkau karajokan.

⁹ Tapi, dek karano ambo mangasiahi angkau, ambo hanyo mamintak sajo. Ambo ko surang urang tuwo, nan kiniko sadang ditahan di pinjaro, dek karano di Isa Almasih.

¹⁰ Ambo, si Paulus, mangamukokan suatu pintak kabake angkau tantang diri si Onesimus, inyo, nan adolah anak di ambo dalam Isa Almasih. Dek karano, di dalam pinjaro ko ambo lah jadi bapak rohaninyo.

¹¹ Dawulu inyo indak baguno doh untuak angkau, tapi nan kiniko inyo baguno, bukan sajo untuak angkau, tapi untuak ambo iyo pulo.

¹² Kiniko, urang nan ambo kasiahi tu, ambo kirin baliak kabake angkau.

¹³ Sabananyo, ambo niyo manahan inyo samo-samo jo ambo, sabagai pangganti angkau, supayo inyo bisa mambantu ambo, salamo ambo ditahan di pinjaro ko, dek karano mambaritokan Injil nan dari Allah.

¹⁴ Tapi, ambo indak namuah doh mangarajokan sasuatu, jikok angkau alun satuju. Ambo labiah suko, jikok angkau mangarajokannyo sacaro jo karilahan ati sandiri; ambo indak namuah doh mamaso angkau.

¹⁵ Mungkin, si Onesimus bapisah dari angkau untuak samantaro wakatu, supayo angkau bisa mandapekkan inyo baliak untuak salamo-lamonyo.

¹⁶ Kiniko, inyo bukan hanyo surang budak untuak angkau; inyo labiah dari itu. Inyo adolah sasamo urang Kristen nan tacinto. Inyo baguno sangaik untuak ambo, apo lai untuak angkau! Tantu inyo baguno sangaik, biya sabagai budak, ataupun sabagai surang sudaro di dalam Tuhan!

¹⁷ Dek karano itu, karano angkau ma anggap ambo ko kanti sasamo urang Kristen, mako tarimolah baliak si Onesimus, samo jo bakcando angkau manarimo ambo.

¹⁸ Jikok inyo basalah, atau ba utang kabake angkau, biyalah ambo nan manangguang kasadonyo tu.

¹⁹ Nah, eloklah ambo tulihkan bana disiko: Ambo, si Paulus, nan ka mambayie kasadonyo. (Tantu indak paralu doh ambo ingekkan, baraso angkau sandiri ba utang kabake ambo, iyolah iduik angkau nan baru sabagai urang Kristen.)

²⁰ Dek karano itu, karano di Tuhan cubolah tolong ambo, gadangkanlah ati ambo sabagai sudaro di dalam Isa Almasih.

²¹ Ambo mambuwek surek ko, dek karano yakin, baraso angkau ka mampalakukan apo nan ambo pintak. Malahan ambo tawu, angkau ka mampalakukan labiah dari itu.

²² Samantaro itu, tolong sadiyokan biliak untuak ambo di rumah angkau, dek karano ambo baharok, Allah mampalakukan dowa sudaro-sudaro, sarato mambawok ambo babaliak kabake angkau kasadonyo.

²³ Si Epafras, nan samo-samo jo ambo di pinjaro, dek karano di Isa Almasih, bakirin salam kabake angkau.

²⁴ Tarimo pulolah salam kanti-kanti ambo: si Markus, si Aristarkhus, si Demas, sarato jo si Lukas.

²⁵ Mudah-mudahan Tuhan Isa Almasih mambarakaik-i angkau kasadonyo. Salam aromaik dari kami, Paulus

Filemon

Video Filemon 1

Ikuti Kami:

KONTAK | PARTISIPASI | DONASI