Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Talifusõma Filemo, awõma ba si faofao khõma! Ya'o, Faulo, nikuru bõrõ Yesu Keriso, fao awõ dalifusõda Timoteo, sanura sura andre khõu
2 ba mbanua Niha Keriso sowulo ba nomou; khõ dalifusõda alawe Afia gõi, ba awõda si faoma ohitõ dõdõ andrõ, Arikhifo.
3 Manõtõna ndra'aga wa Lowalangi Ama ba So'aya Yesu Keriso zame'e howuhowu ba fa'ohahau dõdõ khõmi fefu.
4 Ero na mangandrõ ndra'odo, ba utõtõi dõimõ ba u'andrõ saohagõlõ khõ Lowalangi.
5 Bõrõ me no urongo wa'omasiu mbanua Lowalangi fefu, ba fa'afaduhu dõdõu khõ Zo'aya Yesu.
6 Mangandrõ ndra'odo ena'õ fa'awõsada ba wa'afaduhu dõdõ khõ Yesu Keriso i'owua wa'aboto ba dõdõ sabõlõ ebua moroi ba howuhowu si so khõda fefu, bõrõ me ha sambua ita khõ Keriso.
7 Fa'omasiu, talifusõma Filemo, no omuso dõdõgu ba ibe'e wamarou dõdõ khõgu! Fefu mbanua Lowalangi no terara dõdõra bõrõ ndra'ugõ.
8 Andrõ bõrõ da'õ, me talifusõu samati khõ Keriso ndra'o, tola manõ sa ufaretakõ ndra'ugõ wamalua hadia zi lõ tola lõ õfalua.
9 Ba no u'omasi'õ ndra'ugõ, andrõ bõrõ da'õ wa ha u'andrõ manõ. Hew̃a'ae atua ndra'o, ba nitaha iada'e gõi bakha ba gurunga bõrõ Keriso Yesu.
10 Ya'o, Faulo, ufa'ema gangandrõw̃a khõu sanandrõsa khõ Gonesimo, onogu bõrõ Keriso. Bakha ba gurunga andre, no tobali si mane ama samaeri ndra'o khõnia.
11 Fõna lõ moguna ia khõu, iada'e ba moguna sibai ia, tenga ha khõu manõ, no khõgu gõi.
12 Bua dõdõ wa'omasigu andre, ufatenge mangawuli khõu iada'e.
13 Sindruhunia omasi ndra'o utaha ia ba da'e mena'õ fangalimõ, ena'õ tola itolo ndra'o, sagõtõ wanaha ya'o bakha ba gurunga andre bõrõ Duria Somuso Dõdõ andrõ soroi Lowalangi.
14 Ba lõ omasido na lõ nasa fatehe dõdõu. Abõlõ omasi ndra'o na õfalua ia si fao fa'aohagõlõ dõdõ; lõ omasido ufaso ndra'ugõ.
15 Ma da'õ wa fabali Gonesimo moroi khõu ba ginõtõ si lõ arara, ena'õ tola õsõndra ia mangawuli sagõtõ fa'ara.
16 Iada'e tenga ha sawuyu ia khõu, no tõra moroi andrõ. He ya'ia ba he gõi ya'ugõ, no fagõlõgõlõ talifusõ ni'omasi'õ bõrõ Keriso. Moguna sibai ia khõgu; lõ mendrua manõ khõu, tatu wa moguna sibai ia, he ba wa'asawuyu ba he gõi ba wa'atalifusõta bõrõ Zo'aya.
17 Andrõ bõrõ da'õ, me õw̃a'õ tõdõu awõu ndra'o ndrotondroto Niha Keriso, ba tema mangawuli Gonesimo andre si mane na õtema ndra'o.
18 Na no mosala ba ma mo'õmõ ia khõu, tehegõ ya'o zolu'i da'õ fefu.
19 Ya'o samõsa zanura ba da'e: Ya'o, Faulo, zamu'a fefu dania. (Tatu lõ moguna ufasugi ba dõdõu wa mo'õmõ gõi ndra'ugõ khõgu, ya'ia wa'aurimõ si bohou ba wa'aniha Keriso.)
20 Bõrõ da'õ, tandraigõ tolodo ba khõ Zo'aya; omusoi'õ dõdõgu si mane talifusõ bõrõ Zo'aya.
21 Usura zura andre si fao fanõtõna wa õfalua dania zi no u'andrõ khõu. Ba no u'ila wa õfalua tõra na'i moroi ba da'õ.
22 Gasagasa da'õ, tandraigõ hõnagõ naha khõgu ba nomou, bõrõ udõnadõna wa Lowalangi zame'e ni'andrõmi fefu ba solohe ya'o mangawuli ba khõmi.
23 I'owai ndra'ugõ Efafera, si no awõgu bakha ba gurunga bõrõ Yesu Keriso.
24 Tema gõi wangowai ndra awõ'awõgu: Mareko, Arisaro, Dema ba Luka.
25 Ya So'aya Yesu Keriso zi lõ mamalõ mangomasi'õ ya'ami ma'afefu.
Filemon
Video Filemon 1
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA