Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Filemon, ngona gena ngomi mia dodiao o manara moi ma rabaka so minidododara. Ngohi, Paulus, ma ngale o Yesus Kristus towileleani so o bui ma rabaka, de o Timotius nanga dodiao ma Kristus wipipiricaya, o surati manena ngomi minisidingo ngonaka.

² De ngomi lo misidingo o salam tanu asa pomakamake de ona yasinoto to ngomi mia dodiao ma Kristus wipipiricaya, ona magena o Apfia de lo o Arkhipus. Una o Arkhipus maro o prajurit moi o komandan ma beseso waaka wokaeli, sababu una lo ma Kristus wileleani wokaeli. De lo misidingo o salam tanu asa pomakamake de o bi gogobu ona yangodu kagena Filemon ani tahuka yodupa imatotolomu.

³ Ngomi migolo o Gikimoi nanga Baba de nanga Jou Yesus Kristus tanu inidogo nginika o laha ifoloi, la nia sininga yaaka so foloisi isanangi.

⁴ Ngohi ma orasi ai sumbayang tatide o Gikimoika ma ngale ngona, de tonisininga ai sumbayang qangodu ma rabaka. Totemo, "Ya, Jou! Ani laha ka ilamo poli."

⁵ Sababu ngohi asa toise ngona ani piricaya qaputuru o Jou Yesuska de lo nadodara o Gikimoi Awi nyawa yangoduka.

⁶ De ngohi tosumbayang o Gikimoika togolo tanu ngona asa ma Kristus nowipiricaya qaputurusi. De lo o laha moi-moi qangodu o Gikimoi ngone wonahihikeka gena igogou asa nanako. So komagena ngona aku o loha naaka Awi nyawa yangodu maro nanga dodiao, la ma ngale ma Kristus asa iwihoromati.

⁷ So ngohi foloi inali de ai sininga lo foloi qaputuru, sababu ngona ai dodiao nopipiricaya asa nadodara o Gikimoi Awi nyawaka de komagena ngona lo manga sininga nosiputuru.

⁸ Komagena so ngaroko ngohi maro ma Kristus Awi sosulo moi so de o kuasa ma ngale ngohi aku tonisulo ngonali la naaka,

⁹ duma tosininga ngona gena o Gikimoi Awi nyawa nadodara. So ka ngonali ngohi asa tonibaja de tonigolo. Mutuwade ngohi manena o Yesus Kristus Awi dagali moi so ibuika ma ngale Una towileleani,

¹⁰ so asa togolo ngonaka la tanu kanaga ai ngopa moi gena asa ngona nowiriwo. Una magena maro ai ngopa masirete. Sababu ma orasi ngohi o bui ma rabaka de o habari qaloloha towisingangasu unaka, de maro o ngopa moi awi rohe ma sihino ma babano so to una awi piricaya lo ma sihino ngohino. Una magena awi ronga o Onesimus (de awi ronga ma ngale gena faida qaloha).

¹¹ Ngaroko iqoqomaka asa una awi riwo qatorou de ma faida ihiwa ma ngale ngonaka, duma o orasi manena ma ngale awi riwo ngona de ngohika gena ka qalohaka so awi faida lo qaloha.

¹² So o Onesimus una foloisi towisayangi maro ka to ngohi ai kusi-kusi de una magena asa towisulo la wotagi woliho ngonaka.

¹³ Ma orasi ngohi ibuika sababu o habari qaloloha tosihabari, de ka todupasi towisulo la maro to ngona ani dagali moi gena una wogoge de woileleani ngohi.

¹⁴ Duma ngona tonigolowa de noisimaha waasi, so ngohi tositatapuka upa lo towisulo sidago una aku wogoge dede ngohili. Upa sidago lo una wogoge de woiriwo ngohi duma ngona asa nosimaha waasi. Lebelaha kanaga de ani dupaka la aku ngona asa ngohi noiriwo kali.

¹⁵ Nagala o Gikimoi Awi dupa so o Onesimus wonidongosa, la ma ngale una magena asa o Jou Yesus wipiricayaka, de itekawa done woliho kali la una wogoge dede ngona de ma deka ma bati lo ihiwa.

¹⁶ O Onesimus towidodara, duma igogou ngona asa nowidodara foloisi qaloha. Sababu una gena upa ka to ngona ani gilalo ileleleani kali, duma una foloisi qaloha maro o gilalo woleleleani moi, sababu una magena lo to ngona ani dodiao o Jou Yesus wipipiricayaka.

¹⁷ So ngohi tonigolo ngonaka, nakoso ngona noisininga ngohi maro to ngona ani dodiao o Jou Yesus powipipiricaya de powileleanika, de tanu ma orasi o Onesimus womasidiado ngonaka, de una asa nowisimore imatero maro ngona de ngohi pomatekesikomore.

¹⁸ De lo nakoso una de awi sala moi ngonaka eko lo una de awi nagi moi ngonaka, tanu awi sala magena ngona noisisala ngohika maro ai sala de ai nagi masirete.

¹⁹ Ngohi, Paulus, de ai gia masirete talefo: o moi-moi magena asa ngohika isimoku de lo awi nagi ngonaka asa tafangu. (So komagena, ngaroko, upa he tonisininga la ngona ani nagi foloisi ilamo ngohika, sababu ma orasi o habari qaloloha tonisihabari de ngona o Jou Yesus asa nowipiricayaka de o oho ka sidutu ikakali gena namake, so magegena maro to ngona ani nagi moi ngohika.)

²⁰ Ai dodiao ma Kristus nowipipiricaya, ma ngale o Jou so igogou ngohi todupa la tanu ngona o loha moi naaka ngohika, so tonisulo la ngona dede o Onesimus nimatekesikomore la de magegena ngona aku to ngohi ai sininga nosiputuru.

²¹ Ngohi tobarani o surati manena talefo ngonaka, sababu tanako ngona asa ai gogolo moi ngonaka gena nosigise, de tanako igogou asa naaka foloisi de o kia naga moi gena ngohi tonigolo ngonaka.

²² De kanaga ai gogolo moili gena tanu o ngihi moi nosidailako ma ngale ani tahuka asa tomasidodogu. Sababu ngini nia sumbayang niatide o Gikimoika ma ngale ngohi, so ngohi tongongano Una asa o bui ma rabano woisisupu la aku tokahika kali nginika.

²³ O Epafras lo o bui ma rabaka wisangisara dede ngohi sababu una o Yesus Kristuska woleleleani moi, una asa o salam wosidingo ngonaka tanu nimakamake kali.

²⁴ De kanaga o Markus, de o Aristarkhus, de o Demas de lo o Lukas ona ai dodiao ileleleani lo o salam yosidingo ngonaka tanu asa nimakamake kali.

²⁵ De ngohi togolo o Jou Yesus Kristus tanu Awi laha foloi wodogo ngini ningoduka. Ngohi Paulus O Roma ma kotaka o bui ma rabaka

Filemon

Video Filemon 1

Ikuti Kami:

KONTAK | PARTISIPASI | DONASI