Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Pilemon, batur dait dengan saq bareng begawẽan kance tiang pade! Tiang, Paulus, sopoq tahenan lantaran Deside Isa Almasih, bareng kance semetonte Timotius, nulis surat niki tipaq side,

² dait tipaq jemaah saq bekumpul lẽq balẽnde; dait ẽndah tipaq semetonte saq nine Apia, dait tipaq Arkipus, batur saq pade-pade bejuang kance ite.

³ Rahmat dait damẽ sejahtere lẽman Allah, Bapante dait lẽman Junjungan Saq Mulie Deside Isa Almasih araq bareng kance side.

⁴ Tiang ngucap syukur tipaq Allah tiang, sebilang tiang inget side lẽq dalem do'e tiang.

⁵ Sẽngaq tiang dengah mengenai kasihde tipaq selapuq dengan suci dait mengenai imande lẽq Deside Isa Almasih Junjungan Saq Mulie.

⁶ Tiang bedo'e semoge hubungante besemeton lẽq dalem iman gen ngasilang pengertian saq sayan luwẽq mengenai sebilang hal saq solah lẽq antare ite bagi Almasih.

⁷ Pilemon, lantaran kasihde, tiang mauq penghiburan dait kekuatan sẽngaq atẽ dengan-dengan suci sampun side hibur.

⁸ Keranaq nike, timaq lẽq dalem Almasih tiang bedowẽ kebẽbasan jari mrẽntah side napi saq harus side laksaneang,

⁹ laguq lantaran kasihde nike, tiang cume tunas doang. Tiang, Paulus, saq sampun toaq dait mangkin tiang kenyeke tetahen lẽq dalem bui lantaran Deside Isa Almasih,

¹⁰ ngajuang sopoq petunasan lẽq side mengenai bije tiang lẽq dalem Almasih saq sampun tiang mauq sewaktu tiang araq lẽq dalem bui niki, aranne Onesimus.

¹¹ Laẽq ie ndẽq araq manpaatne lẽq side, laguq mangkin ie bemanpaat, ndẽqne cume lẽq side doang, laguq lẽq tiang ẽndah.

¹² Mangkin ie saq tiang kasihin nike tiang suruq tulak malik tipaq side.

¹³ Setetune tiang melẽt suruq ie ndot kance tiang jari penggentiq side, adẽq ie bau nulung tiang, sengonẽq tiang araq lẽq dalem bui niki lantaran beriteang Kabar Solah lẽman Allah.

¹⁴ Laguq tiang ndẽq mẽlẽ ngelaksaneang napi-napi lamun side ndẽqman setuju, adẽq saq solah nike ndaq side laksaneang secare terpakse, laguq secare ihlas.

¹⁵ Sang Onesimus bekelin lẽman side cume sementare waktu, adẽq side bau miaq ie tulak malik selaẽq-laẽqne.

¹⁶ Mangkin Onesimus nike ndẽqne sekedar hambe doang, ie lebihan lẽman nike. Ie jari semeton saq pade-pade ite kasihin, secare manusie dait lẽq dalem Tuhan. Ie bemanpaat gati umaq tiang, lebih-lebih lẽq side! Pasti ie bemanpaat gati jari pelayan atao jari semeton lẽq dalem Tuhan!

¹⁷ Lamun side anggep tiang baturde saq seiman, side harus terimaq malik Onesimus maraq side nerimaq tiang.

¹⁸ Lamun ie salaq atao berutang lẽq side, alurang tiang saq nanggung selapuqne nike.

¹⁹ Tiang, Paulus, nulis kadu ime tiang mẽsaq: lunasang selapuqne. Tiang ndẽqne perlu ingetang bahwe side mẽsaq berutang lẽq tiang, nike diriqde mẽsaq.

²⁰ Semeton tiang Pilemon, semoge lẽq dalem Tuhan side bemanpaat umaq tiang, adẽq angen tiang jari gembire lẽq dalem Almasih.

²¹ Tiang tulis surat niki lantaran yakin bahwe side gen ngelaksaneang napi saq tiang tunas. Malahan tiang nenaoq side gen ngelaksaneang saq lebihan lẽman nike.

²² Selain nike, tulung sedieang tiang taoq jari madẽq lẽq balẽnde, sẽngaq tiang beharep adẽq langan do'e-do'ende tiang gen tetulakang tipaq side.

²³ Epapras, saq araq bareng kance tiang lẽq dalem bui lantaran Almasih, ngirim salam tipaq side.

²⁴ Terimaq ẽndah salam batur-batur tiang: Markus, Aristarkus, Demas dait Lukas.

²⁵ Rahmat Junjungan Saq Mulie Deside Isa Almasih araq bareng roh side.

Filemon

Video Filemon 1

Ikuti Kami:

KONTAK | PARTISIPASI | DONASI