Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Rat ni Paulus, seburur lemulun luk kiling ngaceku Keristus Yésus, idi rat ni Timotius kinanak tau — Kuan Pilimon luk pad-pad ngakem dengan kai bang kekamen Allah,

² idi kuan kinanak kai luk decur Apia, idi kuan Arkipus, lun dengan kai bang bunu' Tuhan, idi kuan sidang luk déi' ruma'mu:

³ Do' katu idi awang ratnan Allah, Taman tau, idi ratnan Tuhan Yésus Keristus temurun kuan muyuh.

⁴ Idi ui megéi' maré ubur kuan Tuhanku idi neten ngadanmu bang amung-amung sembayangku,

⁵ ngaceku ui ninger ratnan awamu idi ratnan anumu kuan Tuhan Yésus idi kuan amung-amung lun manu.

⁶ Ui sembayang pad rurum anumu inan ulek pad ngiti anid-anid kekamen luk do' luk lapen tau bang Keristus.

⁷ Ui pangeh mawang niat idi inubuk ngaceku ratnan awamu, ngaceku iko ngawang niat amung-amung lun manu, O kinanakku.

⁸ Ngaceku ineh, idi teh ngaceku ui ini kinanakmu bang Keristus, ui miak mekuu' ngecuk namu nganau' anun-anun luk petulu.

⁹ Iamo' ngaceku ratnan awa ui pelaba sikal mutuh namu, ieh ineh ui ini Paulus, lemulun luk mengered idi teh nekini kiling ngaceku Keristus Yésus,

¹⁰ ui mutuh namu ngaceku Onesimus luk pangeh mangun ku anakku bang tutup ini.

¹¹ Atun ieh na ulek kuanmu, iamo' nekini ieh inan ulek kuanmu idi kuanku teh.

¹² Ieh pangeh icukku lemubed amé' namu — ieh luk inanku pelaba awa.

¹³ Idi pianku ngimet neneh pad ngasa' negku laba' ui kiling ngaceku Bala luk Do', mangun ku libalmu.

¹⁴ Iamo' na ui sikal nganau' anun-anun dengan na kali' terawému, pad katumu baken ratnan sinaad, iamo' ratnan pianmu sebuleng.

¹⁵ Ngaceku kian, ini punneh ieh pitad rat namu segageh mo', pad iko miak ngimet neneh ruked-ruked.

¹⁶ Nekini ieh baken demulun mo', iamo' meluun do' ratnan demulun. Ieh mangun ku seburur kinanak bang Keristus. Ui pelaba awa neneh! Meluun teh iko miak mawa neneh bang kekamen demulun, idi ngaceku ieh mangun ku kinanak bang Tuhan pana'!

¹⁷ Ngaceku ineh, kudeng iko ngerawé negku mepad kudeng lun denganmu, do' ngalap neneh mepad kudeng ui.

¹⁸ Kudeng ieh pangeh nengasi' namu idi pebaleh namu, do' nima' negku ngua' baleh ineh.

¹⁹ Ui ini Paulus, ngayud dengan ticu'ku sebuleng: Ui miak ngua' ineh lemubed. (Petuluké ui maré namu ngerawé ratnan iko pana' pebaleh negku ratnan ulunmu sebuleng?)

²⁰ Ngaceku ineh, kinanakku, nima' negku ngalap peruan rat namu bang Tuhan; ngawang niatku bang Keristus.

²¹ Idi ui ngayud kudeng ini kuanmu ngaceku merapet idi iko miak maya' balaku idi ui kali' namu sikal nganau' meluun ratnan putuhku ineh.

²² Idi ratnan luk kudeng ineh, do' iko nganau' temina' aceh takep kuanku, ngaceku ui merapet idi ngaceku sembayang muyuh ui miak barén amé' nemuyuh.

²³ Epapras, luk kiling denganku ngaceku Keristus Yésus maré tabi' kuanmu,

²⁴ idi teh Markus, Aristarkus, Dimas, idi Lukas, ieh ineh lun denganku pad-pad bang kekamen Allah.

²⁵ Idi do' katu Tuhan tau Yésus Keristus ngedengan rohmu.

Filemon

Video Filemon 1

Ikuti Kami:

KONTAK | PARTISIPASI | DONASI