Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sura si’i yako resi aku, i Paulus. Aku ratarungku apa saba mampakarebaka tau mangkonong i Kerisitu Yesu. Pasi sura si’i yako resi i Timotius, a’i ngkita anu samba’a pangaya. Wali kami mangantulis sura si’i resi korom, i Pilemon. Korom mangika seja palaong to kami mangika pasi kami mamporayang kojo korom.

² Pasi kami mangantulis sura si’i resi tau yusa seja, etu semo i Apfia, a’i ngkita to we’a, pasi resi i Arkhipus to mawali ewa tentara i ngKerisitu sewaju ewa kita. Pasi kami mangantulisika seja samparia tau to mangaya to siromu ri banuamu, Pilemon.

³ Wali aku makai-kai see i Pue Allah, Pa’a ngkita, pasi i Pue Yesu Kerisitu, damampaponsanika komi kanotoNya pasi damangawaika komi karodo ndaya.

⁴ Wali Pilemon, ponto ngkani aku makai-kai resi i Pue Allahngku aku taa mangkalingan mampokaika seja korom pasi manganto’oka Ia tarima matao apa saba korom.

⁵ Naka pei aku manganto’oka Ia tarima matao apa aku re’e mangandonge to nato’o ntau mangkonong pamporayang pasi pangaya ngkorom resi i Pue Yesu pasi resi samparia tau to Ia Puenya.

⁶ Wali aku makai-kai resi i Pue Allah see Ia mangansawang korom tempo korom manganto’oka sa’e mangkonong pangayamu. Apa yako etu tau etu damangansani seja mangkonong samparia anu to matao to kita mangarata apa saba samba’a pei i Kerisitu.

⁷ Wali a’ingku, ane aku mampobuuka pamporayang ngkorom aku ndende kojo pasi maroso wo’u rayangku, apa korom re’e mampolindo raya ntau to i Pue Allah Puenya.

⁸ Wali re’e to aku rani mamporapika resi korom to samba’a pei i Kerisitu sewaju pei aku. Kamonsonya aku taa moru mamporentangika korom mangkonong anu to kuporani si’i, apa kunsani pamporayang ngkorom bae etu. Pei aku mamporayang seja korom, see naka aku taa mangampake kuasa to nawaika i mPue aku mamporentangika korom, aku ojo rani mamporapika resi korom damangika palaong to si’i. Aku, i Paulus, semo to mamporapika resi korom. Aku tu’amo pasi si’i-si’i aku ratarungku apa saba mampakarebaka tau mangkonong i Kerisitu Yesu.

⁹ (1:8)

¹⁰ Wali anu to kuporapika resi korom etu semo mangkonong i Onesimus, watua ngkorom to miyai yau seore. Ia ewa ana ngkorongku, apa ri rayanya aku ratarungku si’i aku mawali ewa pa’anya apa aku semo to mampotundeka ia panewa ia mangaya seja i Pue.

¹¹ Wali tempo ruyu, tempo ia tawa mangaya, tempo etu ia tare batuanginya resi korom. Pei si’i-si’i ia bae batuanginya resi korom pasi resi aku seja.

¹² Aku mamporayang kojo ia, pei aku si’i-si’i mangampokau muni ia dayau resi korom.

¹³ Kamonsonya, aku rani manganto’oka ia maroo-roo rire mawali wakil ngkorom. Ia maya mangansawang aku ri rayanya aku ratarungku apa saba mampakarebaka kareba matao.

¹⁴ Aku rani ia maroo rire, pei aku taa rani manganto’oka ia bara kesaa ane taa singkonong ruyu resi korom. Apa ane korom damangika palaong to matao, to taotao korom mangika yako ri kabuya ndayamu, si’a apa rapakasaaka.

¹⁵ Wali i Onesimus maga’a pei korom, pei taa masae kojo. Wali ane ewa pampobuukangku naka pei ia maga’a pei korom etu bara songka i mPue semo apa si’i-si’i korom maya mangarata muni ia rataka ri singkasaenya.

¹⁶ Pasi si’i-si’i ia si’a ojo watuamu. Ia bae wo’u batuanginya yako watua, apa si’i-si’i ia mawalimo seja a’i ngkorom anu raporayang. Aku mamporayang kojo ia. Pei korom semo to dabae-bae wo’u pamporayang resi ia, apa korom mamporayang ia apa saba ia to papolaong ngkorom pasi apa saba ia mangaya seja i Pue sewaju ewa korom.

¹⁷ Wali ane korom mampobuuka aku ewa yunumu to samba’a pangaya, kuporapika resi korom mangantima muni i Onesimus ewa nuika ngkorom mangantima aku.

¹⁸ Pasi ane bara re’e sala inikanya resi korom seore, bara indanya resi korom, biakamo aku semo mampongakung.

¹⁹ Aku, i Paulus, aku ngkaliongku to mangantulis gombo si’i manganto’o aku semo to damampakalino samparia inda i Onesimus etu. (Pei kamonsonya korom kainda seja resi aku, apa yako to nikangku mampakarebaka korom kareba matao, see naka korom mangaya pei mangarata katuwu.)

²⁰ Wali a’ingku, aku rani korom mangansawang aku apa saba kita dua paka mangaya i Pue. Pakalindo rayangku apa kita samba’a pei i Kerisitu.

²¹ Wali tempo aku mangantulis sura si’i, aku mansarumaka kojo korom damampolaika pamporaningku. Pasi aku kunsani korom damangika mayabi yako pamporapingku.

²² Pasi re’e wo’u to aku mamporapika resi korom. Sawang pasigenaka aku samba’a songi ri raya banuamu. Apa tuwu-tuwuja aku danawaika i mPue Allah dayau wo’u mayunu-yunu resi komi samparia ewa to room komi mampokaika resi Ia.

²³ Wali i Epapras rani aku manganto’oka komi ia taa mangkalingan komi. Ia seja ratarungku sindara-ndara pei aku apa saba mangaya i Kerisitu Yesu.

²⁴ Pasi ewa see seja nato’o i Markus, sira opo i Aristarkus, i Demas pasi i Lukas. Sira opo mangika seja palaong i mPue sindara-ndara pei aku.

²⁵ Wali aku mamporapika resi i Yesu Kerisitu, Pue ngkita, see Ia damampaponsanika tonii ngkomi kanotoNya. Ungkanyamo ruyu gombo si’i.

Filemon

Video Filemon 1

Ikuti Kami:

KONTAK | PARTISIPASI | DONASI