Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Filemon, sampesuvu nipotove kami bo roa kami sampokarajaa: Sura hitu lako nte yaku, i Paulus, anu nitarunggu sabana nompatolele kareba i Yesus Kristus, bo lako nte i Timotius sampesuvuta sampomparasaya. Sura hitu nitulisi ka iko,
2 bo ka todea topomparasaya anu nasiromu nosambaya ri banuamu, bo ka i Apfia sampesuvuta mombine sampomparasaya, bo i Arkhipus, anu nosanggani-nggani nte kami nompasimbuku nokarajaa ka Tupu.
3 Kuperapi nte Tuamata Alatala bo Tuputa Yesus Kristus mombadekei belo ka komiu bo mompakatinonto raramiu.
4 Nggani-nggani yaku nosambaya ka iko, Filemon, yaku nosukuru nte Tupuku Alatala
5 sabana niepeku karoso pomparasayamu i Pue Yesus bo niepeku muni kaoge pepotovemu nte pura-pura todeaNa.
6 Kita nosangu rara nte topomparasaya ntanina sabana pomparasayata i Yesus. Yaku nosambaya ala posangu raramu nte topomparasaya ntanina, manggeni iko mpuu-mpuu mombapaha mpengaya-ngaya belo naria nte kita anu nosangu rara nte i Kristus.
7 Sampesuvuku, nadamba mpuu yaku, bo raraku nipakaroso nangepe pepotovemu nte todea nu Alatala. Bo petulungimu mpuu-mpuu nompakasana rarara!
8 Jadi, nanggita pepotovemu ka topomparasaya, naria anu kuperapi nte iko. Kakanana, namala kuparenta iko movia anu masipato mupovia sabana kuasa nidekei i Kristus ka yaku.
9 Tapi nantora pepotovemu, aga kuperapi nte iko bo ledo kuparenta. Yaku hii natuamo bo nitarunggu sii-sii sabana nompatolele kareba i Yesus Kristus.
10 Yaku, i Paulus, merapi ala mutarima mabelo i Onesimus, anu nipotoveku mpo anaku mboto. Ia nirekeku mpuu-mpuu anaku, sabana tempo yaku riara ntarunggu ri sii, yakumo nompatuduki ia nomparasaya i Yesus, nasimbayu mpo totua langgai nompatuduki anana.
11 Bara ipia ia ledo noguna ka iko, tapi sii-sii ia mpuu-mpuu noguna, ledo aga ka iko tapi ka yaku muni.
12 Yaku mpuu-mpuu nompotove i Onesimus, bo sii-sii nituduku ia manjili tou nte iko.
13 Ane kuoseaka dotaku mboto, kutaamaka ia ri sii nte yaku ala ia manjambei karomu mantulungi yaku anu da nitarunggu ri sii sabana nompatolele Kareba Belo.
14 Tapi ledo kupokono mantaamaka ia ane ledo mupodota. Nipokonokupa iko movia anu nabelo haitu lako ri kavoe raramu mboto, bo ledo aga nipasuu.
15 Niuliku pogaamu nte i Onesimus sampariolo najadi ala ia maria nte iko sampe ri kasae-saena.
16 Jadi sii-sii ia domo aga batuamu, tapi nelabipa pade batua, haitumo, ia sampesuvumu sampomparasaya anu nipotovemu. Ane yaku nompotove ia, nemopa iko! Iko mompotove ia sabana ia batuamu, bo mupotove ia sabana ia nomparasaya Tupu nasimbayu mpo iko.
17 Jadi, ane nirekemu yaku roamu sampomparasaya, kuperapi nte iko, tarima mpanjilimo i Onesimus nasimbayu mpo pantarimamu yaku.
18 Bo ane ia nompakarugi iko bara noinda nte iko, damo yaku mombatangguna.
19 Yaku i Paulus, notulisi tesa hitu ante paleku mboto. Yaku mombabayari indana pura-pura ka iko. Kakanana iko mboto noinda nte yaku sabana lako nte yaku sampe iko nanggava katuvua nabaru.
20 Sampesuvuku, kita nomparasaya i Kristus, jadi kuperapi ala iko movia anu noguna ka yaku, haitumo, tarima mpanjilimo i Onesimus ala madamba raraku sabana posampesuvuta sampomparasaya.
21 Yaku notulisi sura hitu ka iko sabana nisaniku iko movia anu niperapiku hitu. Bo ledo aga haitu, nisaniku iko movia melabipa pade anu niperapiku.
22 Bo muni, tulungi pakasadia ka yaku ponturo ri banuamu, sabana nisarumakaku posambayamiu pura-pura raepe nu Alatala bo yaku rakabasaka lako ri tarunggu bo mamala mosinggava vai nte iko.
23 Tabe lako nte i Epafras, anu nosanggani-nggani ante yaku riara ntarunggu sabana nompatolele kareba i Yesus Kristus.
24 Tarima muni tabe lako nte roaku sampokarajaa, haitumo i Markus, i Aristarkhus, i Demas bo i Lukas.
25 Kuperapi komiu pura-pura mombarasai kabelo rara nTuputa Yesus Kristus. Tabe lako nte yaku, Paulus
Filemon
Video Filemon 1
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA