Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Surad gini dau dang, Paulus gedig dan deigtou se tu gesisug icira sug dan desai Krisdus Yesus en moro dou lusud. Dan dog surad gini deinaugb emen emsi bang, Pilemon. Anai ban toua baimo emen naugb maman maugwan maicara dou maman Adehsud Yesus Krisdus ginohob. Dara maman mamaguna Timotius en toua ouma debin areg dan dog deinaugb ban gin toua.

² Dara dan dog surad gini toua deinaugb leng Krisden gedig len loucimdeb se aban tu, dara maman mamdamouwa Apia, dara Arkipus gedig en ohw en mougt edug dara maman naugb Krisdusohob len laugwan toua.

³ Dangga hang, emen emacgeij maman Mamina Allah dara maman Adehsud Yesus Krisdus naugb lan laic geigouhw dou yen. Dara lan laseyeiyo yen dougwo areg gecgu augwan toua terimda.

⁴ Astesda sug dan docuncum dou Allah, kaba, dan indoc moc dougwo ban touwero. Doba dan den ban aboho dou en, hanoba dan den sijo dou en an ban toua terimda.

⁵ Anai dan douman dag ban abdoc ebdebin an maman Adehsud Yesus dag misen namcir. Dara dan douman toua dag ban abdoc gororougb Allah men lusud len laugwan touohob.

⁶ Dara dan docuncum dou Allah dau sug maman mamdoc dag homohob naugb sug maman mamdoc ebdebin an Krisdus, kaba, arautut maman. Dauntoba maman mamdoc eica geigouhw areg Allah esedeb naugb maman se Krisdus augwan asesa edreg dau nosa deit. Anai maman mamdoc dag hom dara Krisdus ginohob.

⁷ Dangga dan indaguna, sug dan douman dag ban abdoc gororougb Allah men lusud laugwanohob, kaba, eic dan indoc agahugouhw, hanoba eic gerleij dou dan namcir. Dara dan dousero, doba Allah men lusud len laugwan, kaba, len merdoc eigouhw an ban medam touohob.

⁸ Sug ban abdoc dag hom dara Krisdus dag gin touohob, kaba, indan goubesa inggebga naugb dan darougb ban an areg ban baimo gin toua. Anai dan dedag ban abaguna misen se Krisdus gini.

⁹ Doba dan indoc gororougb ban namcir. Hang dan demarougb ban icira aban geicara hom touwero. Doba dan dacgeij dau ban dangga dous. Indan goubesa inggebga naugb sug dan darougb ban icira ara ara. Anai Krisdus Yesus enin eng eigdoumesa dan indoho naugb dan desai en moro dou lusud laugwan. Hang iteitogin, kaba, len louf dan se tu gesisug icira en mer gin touohob.

¹⁰ Doba dang, Paulus, dan demaimo indan goubesa gin an banero. Hang dan demagodgod ban an aban sogougb Onesimus gin touwero. Doba areg dan den dou ban eisaugb en gini, kaba, dag dan dacgeij dous. Anai sug dan deigtou se tu gesisug gin, kaba, dan dahwan en aud Krisdusohob. Hang se Krisdus, kaba, dan deija en dag dan indisi misen. Hanoba en toua eija dan dag mena misen toua.

¹¹ Sug nosa, kaba, en moho emeigouhw deseino ban touwero. Doba en moho eiyema namcir. Doba iteitogin deit, kaba, en moho eigouhw deseino ban dara dan, nanan nahwasohob.

¹² Dangga hang, dan indoc emagaigeij en namcir naugb en eperwei ban abuhw, dauntoba en agauwesa dan sug dan deisa tu gesisug sugini icira sug dan desai Mer Geigouhw eisaugb Krisdus dou lusud gini toua. Doba iteitogin, kaba, dan desa en aud ban ucugb dareg dan indoc en mohomoho ucan en namcir.

¹³ (1:12)

¹⁴ Anai dan demouwan naugb sug dan dagodgod ban anahabi, ban bemousa deisa dan indir an gin touwero. Doba dan douwan naugb sug ban abdoc esgiraha anahabi, ban abir emaijan dou dan toua. Hang aremer geisaugb Onesimus, kaba, dan demeic hom dau danin indoc mes touwero. Doba dan daimo dau areg banin beic dou dan dous.

¹⁵ Anai dan doudesa endag Allah asid en se lona hom dau banohob. Dauntoba sug en esa en ucugb aud ban deit, kaba, en emasid enin dau ban deitero. Doba en eigtou desij ban beb huhugb namcir.

¹⁶ Dangga hang, iteitogin, kaba, ban bemeija en dag sogougb toua deitero. Doba edreg dau gin, kaba, ban beija en dag ban abagto misen se Krisdus, gedig ban abdoc gororougb en deitohob. Hang dan decinaga dau sug en ousa ban, kaba, dag ban bera mera einyana ogdoc en toua. Aninim dag dan dera mera einyana dau en touohob. Anai en emedag aban sogougb dousero, doba en edag ban abagto misen se maman Adehsud Krisdusohob.

¹⁷ Dangga sug ban beija dan toua dag ban abaguna se Krisdusohob, kaba, dan dacgeij naugb ban bebin en ucugb aud ban deit. Aninim dag ban bebin dan sug nosa touohob. Anai nanan nahwas naicara naugb Krisdus hom dous.

¹⁸ Toua sug en eicara ecgu an banohob, era aban aremeij ingmanggeb dou enaba, kaba, ban bog dan indoho debinahabi, dan demdoc dou bans.

¹⁹ Areg dan dos dou ban gin, kaba, dan dog ai danin insira dou ban toua, Dauntoba ban bemeija abdocesa touwero, doba ban abdoc eica gin namcir. Doba ban abdoc moc dougwo dag indan aremeij geb dou ban toua inggebga. Anai sug dan dahwan ban aud Krisdus sug nosa naugb en eic maireseb menau geb huhugb dou ban, kaba, maireseb gini dag indan aremeij dou banohob.

²⁰ Dangga ban bemeic dan indoc momogo dou danero. Doba sug ban bedag hom dara Krisdus dag gin touohob, kaba, ban beic dan indoc eigouhw dou dan se aremer gin toua namcir. Hang ban bemohoiya dan indir an areg dan dacgeij ban an eisaugb Onesimus gin touwero. Doba icira sug ban beicara baimo maman Adehsud dag ginohob, kaba, ban bousa deisa dan naugb ban bebin en ucugb deit toua.

²¹ Dara dan decinaga dag ban bemaimo areg dan dacgeij ban an gin dousero. Doba sug dan desa surad gin dou banohob, kaba, dan dod indina debsa ban dag ban beicara baimo bedreg dau gin an en toua.

²² Dangga se lona sug ban bebin Onesimus en ucugwohob, kaba, ban besedeb dimei hom naugb dan toua. Anai dan dod indina debsa Allah dau sug yen yocuncum dou en an dan terimda, kaba, en emesa dan aud ban toues.

²³ Epapras, kaba en ou ban. Anai en moongga se tu gesisug desij dan icira Krisdus Yesus gin touohob.

²⁴ Markus, Arisdarkus, Demas dara Lukas, kaba, len toua laugwan lou ban. Anai len toua, ledag hom desij dan se Krisdus men geicara ginohob.

²⁵ Maman Adehsud Yesus Krisdus medoc eigouhw an yen yaugwan terimda.

Filemon

Video Filemon 1

Ikuti Kami:

KONTAK | PARTISIPASI | DONASI