Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'O Yesus wosikokidemoka 'iodumu ge'ena, de woma'aiki 'o Galileaka so wosikaika 'o Yudea ma daeraaka 'o Yordan ma 'akere ma songonaka.

² Manga gudai wimoteke, de ge'enaka dau manga panyake wosi'aiki.

³ Ge'enaka de 'o Farisioka yamuruo naga yaino witaili. 'Ona yosano, "Moteke to ngone nanga 'agama ma besesongo, kaidadi nanga wekata paoluku de ma sababu 'o kianikia bato?"

⁴ 'O Yesus wosango, "'O Buku 'Itebi-tebinoka 'ingose: 'Wosidadi-dadi wodiaiokau 'o nyawa 'o nauru de 'o ngeweka.' Koniabacawasi?

⁵ Ge'enaka de wosidemo, 'Sababu ge'ena 'o nauru 'asa yamada manga 'esa de manga dea, de yomarimoi de manga wekata so yamididi go'ona 'idadi ka moi!'

⁶ So 'ona koyamati-tingakuwau so ka moiou. Sababu ge'ena 'okia naga ma Jo'oungu ma Dutu wosikatoomuokau, 'o nyawa koidadiwa posikati-tingaka."

⁷ Ge'enaka de 'o Farisioka yongose, "Nako koge'ena de 'ido'oa so 'o Musa wosuloko 'o gangoluku ma surati yokula nako manga wekata yaoluku?"

⁸ 'O Yesus wosango, "'O Musa wosidabi nia wekata niaoluku, sababu nia singina 'i'opini. Ma ma si-siraka 'ena ko koge'enawa.

⁹ Tinisidemo: Nago'ona manga wekata koisongouwa de yaolukou, yaoluoka 'asa de yongaamokoli de 'o ngeweka 'iregu, 'ona ge'ena yosongou."

¹⁰ 'O do-domoteke yongose 'unaka, "Nako 'o giaberekioka naga ma hali koge'ena ma rupa, de yaowa 'uwau pongaamoko."

¹¹ 'O Yesus wongose, "'O nyawa koiodumuwa yosimoteke 'o demo ge'ena, duga ka gee nago'ona ma Jo'oungu ma Dutu wositatapuokau.

¹² Sababu naga mita koidadiwa yongaamoko, ngano 'ona koge'enau kayomasidoboanosi. Naga mita koidadiwa yongaamoko, sababu yakikabirioka. De naga mita, 'ona ma sirete yooluku yongaamoko, ma ngale ma Jo'oungu ma Dutu wileleani. Nago'ona ya'akunu 'o do-dotoko ne'ena yasahe, madaka la yamoteke."

¹³ Naga 'o nyawa 'o ngowa-ngowaka yaki'asano 'o Yesusoka la 'awi giama wakidatamiku manga saeoka de wakisilahidoa. Ma 'o do-domoteke yakingamo 'o nyawa go'ona.

¹⁴ Ma 'o Yesus wongose 'awi do-domoteika, "Niakimadaka 'o ngowa-ngowaka go'ona yaino ngoino. 'Uwa koniakisidabiwa, sababu 'o nyawa gee yadawongo ma Jo'oungu ma Dutu 'awi pareta 'isoka 'o ngowa-ngowaka, 'ona yodadi ma Jo'oungu ma Dutu 'awi kawasa."

¹⁵ Ge'enaka de 'o Yesus wi giama wakidatami manga saeuku de wakisibarakati. 'Asa deika womagoraka ge'enaka.

¹⁶ Ma moi ge'ena wimoi waino 'o Yesusino de wongose, "'Aba Guru, 'okia yaowa-owa tadiai la tamake 'o 'ahu kaisi'ado-'adonika?"

¹⁷ 'O Yesus wosango, "'Ido'oa so ngona nosano ngoino ma ngale 'okia yaowa? Kawimoi duga yaowa. Duga nako nomau namake 'o 'ahu kaisi'ado-'adonika, ge'ena salingou nosingounu ma Jo'oungu ma Dutu 'awi besesongo."

¹⁸ 'O nyawa gu'una wosano 'o Yesusika, "'O besesongo ka'ena gee?" 'O Yesus wosango, "'Uwa noto'oma, 'uwa nosongou, 'uwa notosiki, 'uwa nodadi 'o sakisii ma ngeluku,

¹⁹ nakihoromati 'ani dea de 'ani 'esa, de nakisibosono 'o nyawa 'iodumu 'isoka ngona ma sirete nomasibosono."

²⁰ 'O dogu'uru gu'una wosango, "'O besesongo 'iodumu ge'ena tamotekokau. 'Okiasi sonaa salingou?"

²¹ 'O Yesus wongose, "Nako nomau nomadototomo, notagi 'ani harataa nakokiwukunu. De ma pipi nakisibula-bula 'o nyawa yosusa-susaka, de dua 'asa namake 'o harataa 'o sorogaaka. Ge'ena 'iduanga, de naino la noimoteke ngoi!"

²² 'O dogu'uru gu'una wo'isenoka 'o demo ge'ena, de wotagi de wi singina ma susa sababu wi harataa 'ikudai.

²³ Ge'enaka de 'o Yesus wongose 'awi do-domoteika, "Ma gou-goungu 'isusa 'o nyawa kaya yodadi ma Jo'oungu ma Dutu wi kawasa.

²⁴ De moiosi ne'ena tinisidemo nginika: 'O nyawa kaya yowosama ma Jo'oungu ma Dutu wi Dunia ma Sungika, ge'ena 'ifoloi 'igapangi 'o 'onta 'o ngai moi 'o daiti ma sukonika 'iwosama."

²⁵ 'Awi do-domoteke yo'isenoka 'o Yesus 'awi demo ge'ena, de yakitodokana so yongose, "Nako koge'ena de nago'ona dua yamake 'o laha?"

²⁶ 'O Yesus wakidiriidi 'awi do-domoteika de wongose, "Ma hali ne'ena nako ka 'o nyawa ge'ena koidadiwa, ma nako de ma Jo'oungu ma Dutu ge'ena 'iodumu 'idadi."

²⁷ Ge'enaka de 'o Petrus wongose, "Namake ngomi miamadakau mia kia sonaa sababu minimoteke ngona, so dua 'okia ngomi miamake?"

²⁸ 'O Yesus wongose 'onaka, "Tinisidemo ne'ena: 'O dunia ma sungioka dua 'o Nyawa ma Ngowaka wogogerie 'o koana ma go-gogeroka. De ngini, to ngoi 'ai do-domoteke, 'asa niogogerie 'o koana ma go-gogere 'o ngai mogiooko de modidioka ma ngale niakipareta niahakimi 'o Israeloka 'o suku mogiooko de modidi.

²⁹ De nago'ona gee yamadakau manga woa, manga riaka dodoto bolo manga 'esa biranga, manga dea de manga 'esa, manga ngowaka bolo manga bairi sababu ngoi, 'ona 'asa yomadamake 'isigali ma ratusu moi, de 'asa yamake 'o 'ahu kaisi'ado-'adonika.

³⁰ Ma 'o nyawa manga gudai gee ma 'orasi ne'ena yakimakeka 'o nyawa ma amoko, dua yodadi yotingoono, de gee ma 'orasi ne'ena yakimakeka yoti-tingoono, dua 'asa yodadi amoko."

Matius

Video Matius 19

Ikuti Kami:

KONTAK | PARTISIPASI | DONASI