Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Yesus nda a usaei waeisaei huwoumi huba mokoungekokera, Galilea kanire kulun uke Yudea kanire endere bukeufike Yordan wi enaa reufira ewole.
2 Ro miyae helen bolen Yesusre hakainyekoke, ewate ijenne erana buloona yo onomi yeumiyeke.
3 Farisi holona yo mekate oro halunde ungayonderene nda a yae Yesusre hinainye, “Musale walora wali heere foloukoke a huluinye na hului ro mbai naei kena hului yae na miyaere nennehinde?”
4 Yesus yae weumi, “Homona molaikoke a mayae kaukoke hele. Na bere hele ro me miyae mere mokouboke Kiyae ro bele miyae bele mokoukoke.
5 Nebeisa eleukoke, ‘Nebei aerene ro naei ako nake nukemmibonde na miyae bele mbainye nekenete, na beene uwa mbaise inyeibonde ((kena u aweneikonde)).’
6 Nebei mekai yaere uwa bee ban, nana hesele mbaise yeiboke. Nebeinye, Allah yae mbaise mokoungeboke yo ro miyae yae kayee omoloijae hele.”
7 Nda yo yae Yesusre wainye, “Nebei mekai lonbe, rahe aerene Musa ukeumi ro na miyaere nennehinderena kayeere moloneikonde naei homo yae mokombonde yennele?”
8 Yesus yae weumi, “Allah Naei a eleukoke hakombere mayae kena okoi aerene Musa be hinembokembe. Nana hesele na bere nebei mekai ban.
9 Nebeinye Reyae mare wamale, Nde yae na miyae ro hi bele uwa mbainye honoikoke aerene ban nennehinde, nebeisa maengke hi benen rowendena, nebei ro yoko kaeimaebe koukoke.”
10 Yesus na moisa orowate yo yae wainye, “Rore miyaere yeiboyete na mekai nebei wanenna, naei foi sele ro miyae eyaroi, miyae maengke rore ei.”
11 Nebeibe Yesus nda yore weumi, “Ro miyae nanemene miyae ehurei a kelaemalere ehakoiboi sului, Allah Naei a elelere hakainye holona ro miyae mo na hului nebei a elelere hakonainyebonde.
12 Ro miyae ban mo nekenende naeise hiwa nenakele yarele eisa nebei mekai honokatene, ro hiwa yo hakara yaraimi aerene miyae eyaroi. Hiwa Raei me kelee u keleene kalia na hibi-hibi mokate aerene miyae eyaroi. Nde yae na hului Raei kelaemale a usaei hakonnele, nenaeijae hakonnele.”
13 Nebei hee yae ro miyae na fa-fa fele-fele naei yun ranne Yesus mere kolommilere nane merau Allahlere ebeli boisi naeise Yesusle bokore yauwaimi mewate. Nebeibe Yesus na moisa orowate yo yae nebei fa-fa yaraimi mate ro miyaere a elae yae uwaimi.
14 Yesus na moisa orate yore a elae yae weumi, “Rahene nebei fa-fa a hun kolaumi, waemmihi Raei bokore mai. Rabuhine ban ro miyae nde Rare hila rabo haleufe nda fa-fa naekole nenakele hila rabo haleyaimi wanen mae Raei me kelee u keleene nekate holone na hului enayembonde.”
15 Nebeisa Yesus na mere mo nda fa-fa naei yun ranne koloumikoke. Baeufokera mo Yesus nebei anuwaufa kulun uke ewole.
16 Ro mbai Yesusle bokore meke mo weunge, “Guru, rahe me u foi yae mokorebondene wali hena bona eitoufele?”
17 Yesus yae weunge, “Rahe aerene ‘foi’ naei are Rare hinarae? Ako mbai ken sele foi. Nebeibe waei kena koyae wali hena bonare rowelerena, Musale walora wali heere foloukoke a faeube hakoubonde!”
18 Nebei ro yae Yesusre weunge, “Wali heere foloukoke makei kayeero?” Yesus yae weunge, “Ro miyae ohoijae, ro miyae bele miyae ro bele mbainye ohonoijae, yoko ebaeyeijae, ro naei miyae naei a ame-ame ehuweijae,
19 ako nakere be hineumiyende, waei uware kena buhae haenae wanen nebei sului mbai ya-ya wali nibi mbainye oraube yore heumiyende.”
20 Nda ro yae weunge, “Nda warae nanemene mokoimeyale, rahebe erarae kalore moloufe?”
21 Yesus yae weunge, “Waei kena haehae koyae wali himaloungebonderena, eye, waei keren nale honayete nanemene naise heukonde. Nebei keren nale heukonde na roi keren ban nale ban ro miyaere waheumikonde. Surgana eba he yae weyae eukowende. Nebeisa mele raei moisa meufakoubonde orayende.”
22 Nebei ro nda a wanen boroubokene na kena beko hele hubawoungene, aloungekoke ewole. Rabuhine ban nebei ro keren nale helen sele honowainyelene.
23 Nebeisa Yesus na moisa orate yore weumi, “Na helebe Reyae wamale, na yabi-yabi hele ro mbai keren bele nale bele kiyae, Raei me kelee u keleene nekate yo holo eise enensindere.
24 Benen Reyae wamale, aimake bulure obo unta na hului eweifiube, nebeibe keren bele nale bele yo Raei me kelee u keleene nekate yo holonare enayembondere na yabi-yabi hele.”
25 Yesus na moisa orate yo nda wanen borowatene fa yae bowate. Nebeisa Yesusre hinainye, “Nebei wanenna, nde naeibe wali hena bona enaijaronde naeise hole emmimolombonde?”
26 Nda yore kaeneumikoke wa Yesus yae weumi, “Ro miyae yae nda rambun omokoi hului, nebeibe Allah yae rambun nanemene na hului mokoikoyele!”
27 Nebeinye Petrus yae Yesusre weunge, “Meyae mokandeke rambun nanemene nukewande haiwande, ware mo hakayekokete. Nebei mekainye rahe era yae meyae emayarongkonde?”
28 Yesus yae weunge, “Reyae na helebe nda a wamale, nda kani kela neme ennebensonde hee Reyae Allahle bokora mekale ro miyae uware yeubokale Kiyae one hengko bele yae kendan wameranne nuwerebonde hee, mayae Rare hakaufekoke yo ro me bee oro nen bee bele (12) kendan wameran mokoungehake ranne enrombombe, Israel yoho yoni-yoni mai keleene enainyekende.
29 Nane merau ro miyae nde Raei ro aerene naei imae obe, naei aka baeke, ako nake, kelu omi, na buro kela nukewole, nebei kiyae raka rorele u maehae mbai (100) sele nebei rambun nukewolere enjarongkonde nane merau wali hena bona endowende.
30 Nebeibe rore rowaimi ro miyae helen Allahle bene ro ban inyaibonde. Nane merau nda hee ro ban nekate ro miyae helen ro bele inyaibonde.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA