Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Saellana mare adhabu parkara jareya kabbi, Isa laju meyos dhari Galilea ka dhaera Yudea e temorra Songay Yordan.

² Bannya’ oreng se ngereng, ban reng-oreng jareya bi’ Isa epabaras e jadhiya.

³ Reng-oreng Farisi pas entar ka jadhiya nyoba’a Isa. Ca’na patanyana reng-oreng jareya, "Menorot hokomma agamana sampeyan sareng kaula, ponapa kengeng oreng nellak binena ponapa’a saos margana?"

⁴ Dhabuna Isa, "Apa ba’na gi’ ta’ maca e dhalem Alketab ja’ Se Amorba Jagat abadhi manossa lalake’ ban babine’?

⁵ Salerana laju adhabu, ‘Jareya sababba oreng lalake’ adina’agi rama ebuna ban daddi settong bi’ binena, ban se kadhuwa jareya laju daddi settong.’

⁶ Daddi se kadhuwa jareya banne kadhuwa pole, tape la daddi settong. Daddi apa se la epadaddi settong bi’ Allah ta’ ekenneng pesa manossa pole."

⁷ Reng-oreng Farisi jareya pas atanya ka Isa, "Manabi sapaneka aponapa Mosa me’ makon oreng apareng sorat panellak ka rajina se etellak?"

⁸ Dhabuna Isa, "Mosa ngedine ba’na nellak binena polana ba’na malarat se ekennenga ajar. Tape dha’-adha’na sabendherra ta’ kantha jareya.

⁹ Daddi, edhingngagi, ya: Pa’-sapa’a se nellak binena, mangkana binena jareya ta’ nyalethong, saellana jareya laju abine babine’ laen, oreng jareya azina."

¹⁰ Red-moredda Isa pas mator, "Manabi parkara oreng alake bine sapaneka, langkong sae ta’ osa alake otaba abine."

¹¹ Dhabuna Isa, "Ta’ sakabbiyanna oreng bisa narema ca’-oca’ jareya, kajabana reng-oreng se la etantowagi bi’ Allah.

¹² Sabab badha oreng se ta’ alake otaba ta’ abine polana molae lahir la pajat cara jareya. Badha keya se ta’ bisa alake otaba abine polana ban oreng laen ekagabay kantha jareya. Ban badha keya se mele dibi’ ta’ abine otaba ta’ alake, sopaja bisa’a aladine Allah. Reng-oreng se sanggup narema pangajaran reya, dina me’ olle narema."

¹³ Badha reng-oreng ngeba na’-kana’ ka Isa. Reng-oreng jareya menta sopaja Isa kasokana nompangngagi astana ka cethagga na’-kana’ jareya ban nyo’onnagi na’-kana’ jareya ka Allah. Tape reng-oreng jareya bi’ red-moredda Isa egigiri.

¹⁴ Daddi Isa adhabu ka red-moredda jareya, "Dina panneng ma’ olle na’-kana’ jareya nyander ka Sengko’! Ja’ langlang, sabab reng-oreng se akantha na’-kana’ reya se daddi anggotana ommadda Allah."

¹⁵ Isa laju nompangngagi astana ka cethagga na’-kana’ jareya sarta aberkadi na’-kana’ jareya. Saellana jareya Salerana pas meyos dhari jadhiya.

¹⁶ Kacatora e settong are badha oreng lalake’ nyander ka Isa. "Guru," atorra, "lalakon becce’ ponapa se kodu elakone abdina sopaja kengenga odhi’ se salerressa sareng se langgeng?"

¹⁷ Dhabuna Isa, "Arapa ba’na me’ atanya ka Sengko’ parkara apa se becce’? Pera’ badha Settong se becce’. Mon ba’na terro odhi’a, toro’ pa-apa se eparenta’agi Allah."

¹⁸ "Parenta se ka’dhimma?" ca’na oreng jareya. Dhabuna Isa, "Ja’ mate’e oreng, ja’ azina, ja’ co’-ngeco’on, ja’ daddi sakse palsu,

¹⁹ hormadi rama ebuna; ban kataresnae sasamana manossa papadha ban kataresna’anna ba’na ka aba’na dibi’."

²⁰ "Sadajana ampon etoro’ sareng abdina," sambidda oreng ngodha jareya. "Ponapa pole se gi’ parlo elakone abdina?"

²¹ Dhabuna Isa ka oreng jareya, "Mon ba’na terro samporna’a, kassa’ juwal sakabbiyanna dhi’-andhi’na ba’na. Pessena bagi ka oreng se mesken, ban ba’na bakal olleya arta e sowarga. Mon la mare, pas noro’ Sengko’!"

²² Ngedhing ca’-oca’ buru, oreng ngodha buru pas nyengga; atena sossa polana aba’na ce’ sogina.

²³ Isa laju adhabu ka red-moredda, "Sengko’ ngoca’a ka ba’na, ce’ malaradda oreng sogi se daddiya anggotana ommadda Allah.

²⁴ Ban areya’ pole se ekoca’agiya Sengko’ ka ba’na: agampangan onta maso’ ka lobangnga jarum etembang oreng sogi maso’a ka Dunnyana Allah Se Anyar."

²⁵ E bakto ngedhing dhabuna Isa se kantha jareya, red-moredda padha heran. "Manabi kadi ka’dhinto’," atorra, "pasera se bisa’a salamet?"

²⁶ Isa ngoladi ka red-moredda jareya laju adhabu, "Monggu ka manossa, jareya mostahel! Tape monggu ka Allah, tadha’ barang se mostahel."

²⁷ Petrus pas mator, "Mangken oladi, abdina sakanca ka’dhinto’ ampon adinggallagi sadajana kaangguy ngereng Panjennengngan. Ba’ ponapa se ekaolleya abdina sakanca ka’dhinto’?"

²⁸ Dhabuna Isa ka red-moredda jareya, "Ba’na kodu paparcaja, ya. E Dunnya Se Anyar, Pottrana Manossa bakal alenggiya e tahtana se molja. E bakto jareya ba’na Tang red-mored se dhubellas reya, bakal toju’a e tahta se dhubellas meggi’ kaangguy ahakime suku bangsa Isra’il se dhubellas!

²⁹ Ban sapa’a bai se adina’agi bengkona, otaba taretan lalake’na otaba taretan bine’na, otaba rama ebuna, otaba na’-ana’na, otaba teggalla polana Sengko’, oreng jareya bakal narema’a gantena se bannya’na saratos kalena. Ban oreng jareya bakal narema’a odhi’ se sabendherra ban se langgeng.

³⁰ Tape bannya’ oreng se sateya reya daddi se dha’-adha’ bakal daddiya se dhi-budhi ban se sateya daddi se dhi-budhi bakal daddiya se dha’-adha’."

Matius

Video Matius 19

Ikuti Kami:

KONTAK | PARTISIPASI | DONASI