Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sesampun Deside Isa tutuq manikang selapuq hal nike, Ie lumbar lẽman Galilea ojok daẽrah Yudea, lẽq itoqan Kokoq Yordan.

² Luwẽq dengan ngiring Deside Isa, dait Ie nyelahang ie pade lẽq derike.

³ Beterus dengan-dengan Parisi dateng jari boyaq kesalaqan adẽqne bau nyalahang Deside Isa. Dengan-dengan nike metakẽn, "Napi kanggo dengan sẽang seninene lantaran alasan napi juaq?"

⁴ Jawab Deside Isa, "Napi side pade ndẽqman bace lẽq dalem Kitab Suci bahwe Allah cipteang manusie, lẽman penembẽqne Allah jariang ie pade mame dait nine?

⁵ Dait manik-Ne, 'Keranaq nike dengan mame gen bilin inaq amaqne dait besopoq kance seninene, make deduaqne jari sopoq.'

⁶ Jari ie pade ndẽqne due malik, laguq sopoq. Keranaq nike napi saq tepesopoq siq Allah, ndẽq kanggo tesẽang siq manusie."

⁷ Beterus dengan-dengan Parisi metakẽn lẽq Deside Isa, "Lamun maraq nike kembẽq Musa suruq dengan ngebẽng surat sẽang lẽq seninene saq ie sẽang?"

⁸ Jawab Deside Isa, "Musa ngijinang side pade sẽang seninende sẽngaq side pade sengke gati teajah. Laguq setetune ndẽq maraq nike lẽq penembẽqne.

⁹ Tiang badaq side: Sai-sai saq sẽang seninene -- padahal seninene nike ndẽq nyelẽwẽng -- beterus ie merariq malik kance dengan nine lain, artine dengan nike bezinah."

¹⁰ Make pengiring-pengiring-Ne matur lẽq Deside Isa, "Lamun maraq nike entan semame lẽq senine, bagusan ndaq merariq."

¹¹ Jawab Deside Isa, "Ndẽq selapuq dengan bau terimaq hal nike, cume dengan-dengan saq sampun tetentuang siq Allah.

¹² Sẽngaq araq dengan saq ndẽq mauq merariq, lantaran ie pade mule tebijeang maraq nike. Araq ẽndah dengan saq ndẽq iniq merariq lantaran tepiaq siq dengan lain. Dait araq ẽndah saq ndẽq merariq, lantaran kemẽlẽqne mẽsaq demi Kerajaan Sorge. Sai saq bau ngerti, alurang ie ngerti."

¹³ Araq dengan-dengan jauq kanak-kanak kodẽq ojok Deside Isa adẽq Deside Isa toloq gading-Ne lẽq atas ie pade dait do'eang ie pade. Laguq pengiring-pengiring Deside Isa siliq dengan-dengan nike.

¹⁴ Make Deside Isa bemanik lẽq pengiring-pengiring-Ne, "Alurang kanak-kanak nike dateng ojok Tiang! Ndaq balaq ie pade sẽngaq dengan-dengan maraq niki saq bedowẽ Kerajaan Sorge."

¹⁵ Beterus Deside Isa toloq gading-Ne lẽq atas kanak-kanak nike. Sesampun nike Deside Isa margi lẽman derike.

¹⁶ Araq sopoq terune parek tipaq Deside Isa dait matur, "Paq Guru, perbuatan solah napi saq harus tiang piaq adẽq tiang mauq idup sejati dait kekel?"

¹⁷ Jawab Deside Isa, "Kembẽq side beketuan lẽq Tiang mengenai napi saq solah? Cume araq Sopoq saq solah. Lamun side mẽlẽ idup, side harus taat lẽq prẽntah-prẽntah Allah."

¹⁸ "Prẽntah saq mbẽ nike?" basen dengan nike metakẽn. Jawab Deside Isa, "Ndaq nyematẽq, ndaq bezinah, ndaq memaling dait ndaq jari saksi duste,

¹⁹ pade hormatin amaq dait inaqde; dait kasihin sepadende manusie maraq side ngasihin diriqde mẽsaq."

²⁰ "Selapuq prẽntah nike sampun tiang turut," jawab terune nike. "Napi malik saq perlu?"

²¹ Deside Isa bemanik lẽq terune nike, "Lamun side mẽlẽ jari sempurne, lumbar, jual selapuq dowẽnde. Bẽng kẽpẽngne tipaq dengan-dengan miskin, make side gen mauq harte lẽq sorge. Sesampun nike side dateng turut Tiang!"

²² Sesampun dengah manik Deside Isa nike, terune nike lumbar siq susah angenne sẽngaq ie sugih gati.

²³ Beterus Deside Isa bemanik lẽq pengiring-pengiring-Ne, "Tiang badaq side, sengke gati dengan sugih tame ojok dalem Kerajaan Sorge.

²⁴ Dait niki ẽndah saq Tiang gen sampẽang lẽq side: Molahan onte tame ojok dalem loang jarum, ketimbang dengan sugih tame ojok dalem Kerajaan Allah."

²⁵ Sewaktu pengiring-pengiring-Ne dengah manik Deside Isa nike, ie pade bengaq. "Lamun maraq nike," atur ie pade, "sai saq bau selamet?"

²⁶ Deside Isa merhatiang ie pade terus bemanik, "Bagi manusie hal nike mustahil! Laguq bagi Allah nẽnten araq sopoq juaq saq mustahil."

²⁷ Beterus Petrus matur, "Pelungguh cingakin, tiang pade sampun bilin selapuq-lapuqne jari ngiring Pelungguh. Dait napi saq gen tiang pade terimaq?"

²⁸ Deside Isa bemanik lẽq ie pade, "Tiang badaq side: Setetune lẽq Dunie saq Baru, Bije Manusie gen melinggih lẽq atas tahte-Ne saq mulie. Lẽq waktu nike side pade pengiring-pengiring Tiang gen tokol lẽq atas due olas tahte jari hakimin kedue olas suku bangse Israel!

²⁹ Dait sebilang dengan saq sampun bilin balẽ, atao semeton mame atao nine, atao inaq amaqne, atao bije-bijene, atao kebon bangketne lantaran Tiang, dengan nike gen nerimaq satus kali lipet. Dait ie gen nerimaq ẽndah idup saq sejati dait kekel.

³⁰ Laguq luwẽq dengan saq mangkin niki jari penembẽq, gen jari saq penutuq dait luwẽq saq mangkin niki jari penutuq gen jari saq penembẽq."

Matius

Video Matius 19

Ikuti Kami:

KONTAK | PARTISIPASI | DONASI