Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Me no aefa Iw̃a'õ da'õ fefu Yesu, Irõi Galilea numalõ ba Yudea yefo Nungo Nidanõ Yoridano.

² Ato niha solo'õ Ya'ia, ba Ifadõhõ ira fefu ba da'õ.

³ La'ondrasi Ia ira Farizai'o ba wanandraigõ Ya'ia. Lasofu khõ-Nia, "Molo'õ huku agama ba khõda, hadia tetehegõ ifabali ndrongania niha ba nilau dõdõnia manõ?"

⁴ Itema li Yesu, "Hadia, lõ nibasomi ba Mbuku Ni'amoni'õ wa Lowalangi zombõi niha, ira alawe ba ira matua.

⁵ Aefa da'õ Imane, 'Andrõ wa irõi namania ba inania ira matua ba tobali ha sambua boto ira wo'omonia!'

⁶ Tobali tenga sa'ae darua ira, ha tõ samõsa. Da'õ mbõrõ wa tebai ifabali niha zi no I'osambua'õ Lowalangi."

⁷ Lasofu khõ-Nia ira Farizai'o, "Hana wa iw̃a'õ Moze, ena'õ na ibe'e zura khõ ndrongania na omasi ia ifabali ndrongania andrõ?"

⁸ Itema li Yesu imane, "Itehegõ khõmi Moze mifabali ndrongami bõrõ me no si tebai nifahaõ ami. Ba wamõbõrõ tenga si manõ zindruhunia.

⁹ Mifondrondrongo da'e: Haniha zamabali dongania -- he w̃a'ae lõ sohorõ ndrongania andrõ -- ba ilau mangowalu ba ndra alawe bõ'õ, ba sohorõ niha da'õ."

¹⁰ Lamane ira nifahaõ khõ Yesu, "Na si manõ waõwaõ warongasa andrõ, abõlõ sõkhi na lõ mangowalu."

¹¹ Itema li Yesu, "Lõ dozi niha fao dõdõ ba wanguma'õ si manõ, ha ya'ira si no Ihonogõi Lowalangi.

¹² Na so zi lõ mangowalu, ba no mu'adonogõ ira si manõ da'õ. So gõi niha si lõ mangowalu bõrõ wolau niha bõ'õ khõnia. So gõi zangahonogõi lõ mangowalu, ena'õ abõlõ i'oigõ dõdõnia wanga'i halõw̃õ Lowalangi. Niha si tola manema famahaõ da'õ, ba akha itema zi manõ."

¹³ So niha solohe iraono khõ Yesu ena'õ na Itufa hõgõra ba wangandrõ salahi ndraono andrõ. Ba latenaw̃a ira nifahaõ Yesu niha solohe iraono andrõ.

¹⁴ Imane Yesu khõ ndra nifahaõ-Nia, "Akha mõi khõ-Gu ndraono andrõ! Bõi mitenaw̃a ira, bõrõ me niha si mane da'e zi tobali ono mbanua Lowalangi."

¹⁵ Itufa hõgõ ndraono andrõ Yesu, Ifahowu'õ ira. Aefa da'õ ba mofanõ Ia.

¹⁶ Samuza ma'õkhõ so niha sangondrasi Yesu, Imane, "He Guru, hadia zi sõkhi ulau ena'õ usõndra wa'auri si lõ aetu?"

¹⁷ Itema linia Yesu Imane, "Hana wa khõ-Gu õsofu hadia ia zi sõkhi? Ha sambua zi sõkhi. Na omasi ndra'ugõ õsõndra wa'auri, ba lõ tola lõ õ'o'õ goroisa Lowalangi."

¹⁸ Itohugõ wanofu niha andrõ, "Hadia zomasi Lowalangi?" Itema li Yesu, "Bõi ange'e; bõi ohorõ; bõi anagõ; bõi falimo;

¹⁹ fosumange namau awõ ninau; omasi'õ nawõu si mane fa'omasiu ndra'ugõ."

²⁰ Imane niha andrõ, "No u'o'õ fefu da'õ, hadia na danõ bõ'õ?"

²¹ Imane khõnia Yesu, "Na omasi'õ mo'ahonoa, ae'e amawa fefu zi so khõu. Ba be'e mbõlinia ba zi numana, ba õsõndra harato ba zorugo. Aefa da'õ ae'e ba da'e ba o'õ Ndra'o!"

²² Me irongo wehede da'õ ono matua andrõ, ba mofanõ ia si fao fa'abu dõdõ, me niha si kayo sibai ia.

²³ Aefa da'õ Imane Yesu khõ ndra nifahaõ-Nia, "Uw̃a'õ khõmi, fondrege wa'afõkhõ sibai ba niha si kayo tobali ndrotondroto mbanua Lowalangi.

²⁴ Da'e nasa niw̃a'õ-Gu khõmi: abõlõ aoha na itõrõ dõgi naha gõ -- nifotõi tõgi walõlõw̃a -- gondra moroi na mõi bakha ba Mbanua si Bohou khõ Lowalangi niha si kayo."

²⁵ Me larongo ira nifahaõ-Nia niw̃a'õ Yesu andrõ, ba ahõlihõli dõdõra. Lamane, "Na si manõ haniha ni'orifi?"

²⁶ Ifaigi ira Yesu ba Imane khõra, "Na ba niha ba tebai! Ba na khõ Lowalangi ba lõ si tebai!"

²⁷ Aefa da'õ imane Fetero, "Faigi, no marõi fefu hadia ia ba wolo'õ Ya'ugõ. Ba hadia dania nitemama?"

²⁸ Imane khõra Yesu, "Ya faduhu dõdõmi: Ba mbanua si bohou andrõ, dumadao dania Nono Niha yaw̃a ba dadaoma-Nia solakhõmi. Ba ginõtõ da'õ gõi dania dumadao ami ya'ami ira nifahaõ-Gu yaw̃a ba dadaoma zi felendrua andrõ, ba wanguhuku si felendrua mado soi Gizera'eli!

²⁹ Dozi niha sondrõi omonia, talifusõnia matua, ma talifusõnia alawe, ma zui ama ba inania, ma iraononia, ma nowinia bõrõ Ndra'o, itema dania niha andrõ otu kali fabali. Awõ wa itema gõi dania wa'auri si lõ aetu.

³⁰ Hiza, ato niha si fõfõna iada'e tobali dania safuria, ba ato zafuria iada'e tobali dania si fõfõna."

Matius

Video Matius 19

Ikuti Kami:

KONTAK | PARTISIPASI | DONASI