Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Tou ti Isa ma yilapato longajari lo unga'amila boyito, Tiyo lolola mao lipu lo Galileya lonao ode lipu lo Yudeya to ngotuwali lo dutula lo Yordan.

² Ngohuntuwa da'a tawu u'uyuhe hedudua o-Liyo wawu Tiyo olo lopo'oluli olimongoliyo teto.

³ Lapatao lonao mayi tawu-tawuwala ta o pahamu Parisi ohila mohimontala o-Liyo. Timongoliyo lohintu ode o-Liyo odiye, ”Moturuti mao hukum lo agama mowali ta lolai ngota motalaki mao dileliyo wolo bolo tonu lomao alasani?”

⁴ Tameti Isa ode olimongoliyo odiye, ”Tantu ma pilobaca limongoli to delomo kitabi deu Allahuta'ala ta lopowali lo manusiya, ma lopowali mayi limongoliyo ta lolai wawu tabuwa lonto awwaliliyo lomayi.”

⁵ Ti Isa loloiya poli odiye, ”To delomo kitabi woluwo tula-tuladu odiye, ’Sababu uwito, ta lolai ngota ma molola mao oli papaliyo woli mamaliyo wawu mota motituwawu wolo dileliyo, tunggulo timongoliyo dulota ma mowali batanga tuwawu.’ Odito u tula-tulade to kitabi.”

⁶ Ti Isa loloiya poli odiye, ”Timongoliyo dilalo dulota bo batanga tuwawu. Sababu uwito, u pilopotuwawu lo Allahuta'ala keke dila mao popobuaya.”

⁷ Timongoliyo loloiya mao ode o-Liyo odiye, ”Wonu odito, wolo sababuliyo ti nabi Musa lohutu aturangi wonu ta lolai ngota motalaki dileliyo, tiyo mowali mongohi mao tuladu talaki ode dileliyo boyito?”

⁸ Loiya li Isa ode olimongoliyo odiye, ”Sababu hila limongoli odelo toheto botu ti nabi Musa longohi ijini olimongoli motalaki mao dile limongoli. Bo lonto awwaliliyo lomayi dila odito.

⁹ Bo polele-U mayi ode olimongoli: Titalotita ta motalaki dileliyo wawu alasaniliyo dila jina lo dileliyo lapatao tiyo lonika wolo tabuwa wuwewo, tiyo lojina sababu tiyo dila lodaha hiyala limongoliyo.”

¹⁰ Mongomuri boyito loloiya mao ode oli Isa odiye, ”Wonu malo odiye pasali lo ta motolohiyalo, lebe mopiyohu dila monika.”

¹¹ Bo ti Isa loloiya mao ode olimongoliyo odiye, ”Dila nga'amila tawu mowali mololimo u dila monika, bo timongoliyo ta yilohiya mao lo Allahuta'ala karuniya odito.

¹² Woluwo tawu ta dila monika sababu memangi tiyo pilotutuliyo mayi odito lonto ombongi mamaliyo. Woluwo tawu ta pilopowali lo tawu wuwewo dila mowali monika. Wawu woluwo tawu ta lolulawota u dila monika sababu Yiladiya lo Soroga. Titalotita ta mongarati, tiyo musi mololimo pongajari boti.”

¹³ Lapatao tawu lodelo mayi ode oli Isa ta ukekeingo, alihu ti Isa mopodutu mao lo olu'u-Liyo wawu modua olimongoliyo. Bo mongomuri li Isa lodini tawu-tawuwala boyito.

¹⁴ Ti Isa loloiya ode mongomuri-Liyo boyito odiye, ”Dila mao diniya timongoliyo wawu hulimao ta ukekeinga boyito monao mayi ode ola-U, sababu ta odelo timongoliyo botiye ta o haku momaso ode Yiladiya lo Soroga.”

¹⁵ Lapatao Tiyo lopodutu mao lo olu'u-Liyo to lunggongi mongoliyo wawu lodua olimongoliyo. Lapatao ti Isa lolola mao tambati boyito.

¹⁶ Debolo woluwo ta bohulotawu ngota lonao mao ode oli Isa wawu loloiya odiye, ”Guru, huhutu mopiyohe wolo u musi pohutuwo latiya, alihu watiya mo'otapu tutumula kakali?”

¹⁷ Tameti Isa ode oliyo, ”Wolo sababuliyo yio hemohintu ola-U wolo umopiyohu? Bo ngota ta mopiyohu. Bo wonu yio ohila momaso ode delomo tutumula kakali, dudui mao nga'amila parenta lo Allahuta'ala.”

¹⁸ Tawu boyito loloiya mao ode o-Liyo, ”Parenta tonu, Guru?” Tameti Isa ode oliyo, ”Dila pohinggi nyawa lo tawu, dila pojina, dila potao wawu dila posakusi lo u yimbulo.

¹⁹ Hurumatiya mao ti papamu woli mamamu wawu yio musi motoliango tawu ta titiliya wolemu odelo yio motoliango batangamu lohihilawo.”

²⁰ Ta bohulotawu boyito loloiya mao ode oli Isa, ”Nga'amila boyito ma hepilohutu latiya. Donggo wolo u i'ilangi to olatiya?”

²¹ Ti Isa loloiya mao ode oliyo, ”Wonu yio ohila molimomoto, ponaolo mota potaliya lomao nga'amila haratamu wawu wohiya mao doyiliyo ode ta misikini. Yio ma mo'otapu harata to soroga. Lapatao ponao lomayi modudua ola-U.”

²² Lo'odungoheo u odito ta bohulotawu boyito ma lonao wolo uwolo-wololo sababu harataliyo ngohuntuwa.

²³ Ti Isa loloiya mao ode mongomuri-Liyo, ”Tutuliyotutu polele-U mayi ode olimongoli: Susa da'a ta kaya momaso ode delomo Yiladiya lo Soroga.

²⁴ Pe'entapo polele-U mayi ode olimongoli: Lebe gambangi unta tuwawu momaso moli huwango dudetu popobandingiyo mao wolo ta kaya momaso ode Yiladiya lo Allahuta'ala.”

²⁵ Tou mongomuri-Liyo lo'odungoheo u odito boyito, timongoliyo lebe hilerani wawu hepoloiyawa odiye, ”Wonu odiye, tatonu ta mowali salamati?”

²⁶ Ti Isa lomilohe mota olimongoliyo wawu loloiya, ”To manusiya pasali boti dila ponga lo akali, bo to Allahuta'ala nga'amila mowali.”

²⁷ Lapatao te Petrus loloiya ode oli Isa, ”Amiyatiya boti ma lolola mayi nga'amila uhetuwa-tuwawuwa wawu lodudua oli Guru. Wonu odito, wolo u ma motapu lamiyatiya?”

²⁸ Ti Isa loloiya mao ode olimongoliyo, ”Tutuliyotutu polele-U mayi ode olimongoli: Ta ma hedudua ola-U, to duniya bohu to wakutu Walao Manusiya motihuloa to arasi-Liyo u gaga da'a, timongoli boti ma motihuloa to biluloamopula duluwo momutoa suku lo Israel mopuladuluwo!

²⁹ Wawu titalotita ta sababu tanggulu-U ma lolola mayi beleliyo, wutatiyo ta lolai, wutatiyo tabuwa meyalo ti papaliyo wawu ti mamaliyo, mongowalaiyo meyalo ilengiliyo, tiyo ma muli mololimo po'ohetuto piu wawu ma mo'otapu tutumula kakali.

³⁰ Bo ngohuntuwa ta hemulowa ma mowali meyoli wawu ta hewoliya ma mowali memulo.”

Matius

Video Matius 19

Ikuti Kami:

KONTAK | PARTISIPASI | DONASI