Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Naonda ing ki Yesus nopaḷut notundú kon tua komintan, nobuatdon in Sia nongkon Galilea bo minayak in lipú Yudea inta kon ḷoḷan Ongkag in Yordan.
2 Intau nobarong totok in dinumudui ko'i-Nia, bo kon tua Sia nongundam ko'i monia inta nongotakit.
3 Bo namangoidon intau mita im Parisi ko'i-Nia si monungkuḷ. Mosia nolibó nana'a, "Aka podudui in hukum agama, mota'au degá doyowa motonibuḷoi mogoga'atan aka oyúon im binalí dodoyonan in soáḷ tatua?"
4 Ki Yesus nolibó bui ko'i monia: "Degá diápa binaca monimu, kon Sia in nogaid kon intau ḷoḷaki bo bobay nongkon pinomangkoianmai?
5 Bo Pirman-Nya noguman, 'Manangka intua ḷoḷaki im monaḷámai ko'i amá bo ko'i inánya bo motobatú takin i buḷoinya, sahingga taya dua motobatúdon kon awak.'
6 Bo mosia tua de'eman bidon doyowa, ta'e tobatú bidon. Tuamai onu inta ain sinobatú i Allah diá bidon mota'au poyoga'aton in intau."
7 Dá mosia nolibó bui ko'i-Nia, "Aka natua, yo nongonu sing ki Musa nomarentahbí kom mobogoi in surat talak aka intau mongga'at ko'i buḷoinya?"
8 Ki Yesus notubag ko'i monia nana'a: "Tua in lantaranbí mo'ikow doí mokidongog, dá ki Musa nobogoi ing kasampatan ko'i monimu mongga'at ko'i buḷoi monimu, ta'e sabanarnya in de'emanbí natua nongkon pinomangkoian mai.
9 Ta'e bá poguman-Ku ko'i monimu: Ki ine im mongga'at ko'i buḷoinya koḷikudea bo sia nokitualing, bo bui mobuḷoi kom bobay ibanea, yo sia in nonualing doman."
10 Murí-Nya mita noguman ko'i-Nia, "Aka natua in doyowa motonibuḷoi yo manikah bo diá mobuḷoi."
11 Ta'e ki Yesus noguman ko'i monia, "Diábí komintan intau nonota'au kon singog tatua, ta'e tongábí mosia inta noko'ulí kong karunia natua.
12 Oyúon in intau diá mobuḷoi sin sia im pinolahirbí natua, bo oyúon doman in nobalí natua sin lantaran intau ibanea, bo oyúon inta ibognyabí tontaní in doí mobuḷoi simbá mota'au mogaid kon oáidan i Allah. Ki ine im mokosanggup motarima kon inta pinoguman-Ku na'a yo pomayakdon makow tarimaannya in na'a."
13 Bo intau mita namangoi nodia kom mongoádí mita ko'i Yesus, simbá barakatan-Nya im mosia. Ta'e murí-Nya mita sinumorú kon intau mita tatua.
14 Ta'e ki Yesus noguman, "Pomayakdon makow im mongoádí mita tanion mamangoi ko'i-Nakó! Dona'ai toko ḷamboian im mosia, sin intau mita inta ná mosia tua im mobalí umat i Allah."
15 Bo binarakatan-Nyadon im mosia bodongka nobuat nongkon tua.
16 Oyúon tobatú tayamobiag namangoi bo nolibó ko'i Yesus, "Pak Guru, degá oáid mopia inta náondapa in aidanku simbá aku'oi moko'ulí kong kobiagan mopia bo mononoi?"
17 Ki Yesus nolibó, "Nongonu sin ikow im molibóbí ko'i-Nakó kon onu inta mopia? Tongábí tobatú im mopia. Aka ikow mo'ibog mobiag, yo duduiaidon im bayongan parentah i Allah."
18 Intau tatua nolibó bui ko'i-Nia, "Parentah inta táonda?" Dá kai Yesus, "Dona'ai molimod, dona'ai monualing, dona'ai monakow, dona'ai mongonguman kon uboḷ,
19 hormatbí ing ki iná bo ki amámu; bo kotabibí in tumpaḷa intau náonda bo kotabimu kon awakmu tontaní."
20 Tubag in tayamobiag tatua ko'i-Nia, "Komintan tua aindon dinuduiainku, yo onupa doman in diá notompod?"
21 Tubag i Yesus kónia, "Aka ikow bo mo'ibog motompod totok, yo bayakdon potaḷui komintan onu inta ko'inimu bo silaidon tua komintan kon intau mita inta bogá dá ikow im moko'ulídon kong kapunya'an kon soroga, onda intua angoidon kon na'a bo dudui ko'i-Nakó!"
22 Naonda in tayamobiag tatua nokodongog kon singog i Yesus tatua, minayak in sia takin moájar ing ginanya, sin totok mobarong ing kapunya'annya.
23 Ki Yesus noguman kom murí-Nya mita, "Poguman-Ku ko'i monimu, mororiga totok in intau no'oyúon tumu'ot mobalí umat i Allah.
24 Simbá poguman-Ku bui ko'i monimu, untabí im mogampa-gampang tumu'ot mongin bubú in dodagum daripada intau no'oyúon tumuot mobalí umat i Allah."
25 Naonda im murí-Nya mita nokodongog kon tua, nongoherang mosia bo nolibó: "Aka natua, yo ki ine im mota'au posaḷamaton?"
26 Ki Yesus inimindoi ko'i monia bo nosingog, "Aka podudui raian in intau tua mororigabí aidan, ta'e aka ko'i Allah mogampangbí totok intua."
27 Bo ki Petrus noguman ko'i Yesus, "Kami na'a aindon nonaḷámai kom bayongan inta ko'inami, bo dinumudui ko'i-Nimu; yo onu degá im mo'ulí nami?"
28 Guman i Yesus ko'i monia, "Popirisayadon: Kon dunia mobagu i Allah; Adí Intau in limitúdon kon tampat pomomarenta'an-Nya inta momulia. Ko wakutu intua mo'ikow murí-Ku mita in limitú doman kon limonik in mopuḷuh bodoyowá in tampat pomomarenta'an bo mohakim kom mopuḷuh doman bodoyowá nosuku kon Israel.
29 Bo pomuḷoi intau inta nonaḷámai kom baḷoinya, kon i utatnya ḷoḷaki bo bobay, ko'i amá bo ko'i inánya, ko'i adínya mita andeka nonaḷámai kong gobánya sin dumudui ko'i-Nakó, yo sia tua im motarima bui kom mo'iliu kon tua bo sia im mokodungkuḷ domandon kong kobiagan mopia bo mononoi.
30 Ta'e moántó in intau inta no'íuna im mobalí mo'itontumi, bo inta no'itontumi mobalí mo'iuna."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA