Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Surad gini dau dang, Adehsud, dou bang, Gayus, gedig dan indoc gororougb ban dag misen namcir.

² Hang dan dacgeij Allah naugb en eseyeiyo ban dougwo areg gecgu augwan. Dauntoba areg geigouhw mogud eb naugb ban toua terimda. Anai bani dan insi gedig dan indoc gororougb ban dag misenohob. Dara dan dacgeij Allah, dauntoba en eic ban abug esgiraha, aninim dag dan decinaga ban abdoc mes, kaba, eigouhw touohob.

³ Anai astesda sug ban absir se Krisdus len ledebeij dan, kaba, len louma debin ban dag ban bemobsara dau ucina se geica touwero. Doba ban baimo augwan gini esesa terimda. Hanoba len lenara dou dan, lendagai: Gayus hom gin, kaba, en esogwa deisa areg se geica dag misen terimda.

⁴ Hang emeic dan indoc agahugouhw an ban toua. Anai sug dan douman, doba indan logodeh lesogwa deisa areg se geica dag misen terimda, kaba, eic dag dan indoc agahugouhw edreg dau aremer gus augwan toua namcir.

⁵ Dan insirija, gedig dan indoc gororougb ban, dan douman dau sug lusud lesai Mer Geigouhw eisaugb Krisdus dou lusud sungga sungga, kaba, dag ban bemebin ban abaguner dara ban abdamouwer misen dousero. Doba ban bebin leng lesai Krisdus moro dau lugmahara len laugwan esesa terimda toua.

⁶ Anai sug len ledebeij emen sugin, kaba, len lens dau ban abdoc gororougb gini meijouhw augwan asesa dou emen se goucimdeb sugin touohob. Hang ban bemarges dau aban geicara geigouhw gin touwero. Doba ban beic ara ara dou len naugb ucina mogumsi baimo dau areg geic Allah medoc agahugouhw dou en toua terimda.

⁷ Anai sug len leihweda sungga sungga naugb len lesai Mer Geigouhw eisaugb Krisdus dou lusud, kaba, len merirs emohos naugb lemacgeij ared, dara aregoufu, dara areg gus augwan dau leng medigo Krisdus touwero. Doba len laiyan merdocesem dougwo gini namcir.

⁸ Dangga hang, esloulougb medam naugb maman mamarges dau sug maman maic ara ara dou len touwero. Doba maman mabin len naugb mausa len toua terimda. Anai sug maman maicara dag gin, kaba, gini aninim dag maman maimo len naugb maman masai mer geica dou lusud touohob.

⁹ Dara dan dog surad gagarougb eisaugb aremer graga augwan dou lusud se aban goucimdeb touohob. Doba Diotrepes, kaba, en ouwan eigdoumesa enin moho edag mougt mera medam naugb yen. Hang en emebin dan dag meijen majelis touwero. Doba en esbes an areg dan dog dou yen gin terimda.

¹⁰ Dangga hang, sug dan dedebeij yenohob, kaba, dan dens dau men geicara ecgu augwan eb ainyes dou yen toua. Anai men geicara ecgu gin, kaba, dag en ecic dan indoho gouhw genes dou lusud terimda. Dara en medoc emobsara doc aremer hom gin dousero. Doba sug maman mamsir gedig len lesai Krisdus moro dou lusud len ledebeij men cinogo, kaba, en emebin len touwero. Doba en ohw medigo dou len namcir. Hanoba en ebehnehino dougwo lusud gus toua, dauntoba len lemebin len ingga touwero. Dangga gareg en aihagab en mer an gin, kaba, en ocirma len dau men goucimdeb toua.

¹¹ Dan indagunerij, dara dan indamouwerij gedig dan indoc gororougb yen, eigouhw naugb yen yemaimo lusud aud areg gecgu touwero. Doba yen yaimo leng leicara geigouhw an meren geicara dous. Anai gareg en aimo areg geigouhw, kaba, en edag Allah mogwihi mogo en dag misenohob. Doba gareg en aimo areg gecgu terimda, kaba, en emecinaga areg asesa Allah enin medoc mes augwan mougwa hom touebma.

¹² Doba Demetrius, kaba, lusud laugwan lecic en moho dag men geicara augwan edag beim terimda. Dara men geicara se geica, kaba, augwan gini ouma debin en toua. Anai en aimo areg dag misen gin namcirohob. Dara danin toua douma debin en dag men geicara augwan eigouhwohob. Augwan gin, kaba, se misen namcir, anai ban becinaga dag dan demereiyara dou ban touwero, doba dan denara misen dou ban dous.

¹³ Aremer gus einyana inggebga naugb dan desulou ban an gini. Doba dan demouwan naugb dan dog augwan gini se surad ginero.

¹⁴ Anai danin demenbo dedemeda naugb dan demdenara ai danin indirs dou ban toues. (1-15 ) Allah eseyeiyo ban dougwo areg gecgu augwan namcir. Ban absir se goucimdeb sugini len laugwan lou ban. Hang ban besai emen emuro naugb ban bou emen emsir len laugwan sungga toua.

3 Yohanes

Video 3 Yohanes 1

Ikuti Kami:

KONTAK | PARTISIPASI | DONASI