Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Rat negku, seburur lun rayeh — Kuan Gayus luk inanku mawa dengan matu.

² O luk inanku mawa, ui sembayang pad iko miak uen ngeperuan bang luk amung-amung, idi pad iko do' ulun — mepad kudeng niatmu pangeh nengalap do' teh.

³ Ui pelaba awang niat kareb tuda'-tuda' kinanak nacing idi nemaré kali' ratnan sirimu, idi kudeng apeh iko mulun bang luk matu.

⁴ Idi na luk idi awang negku luk meluun rayeh ratnan ini, ieh ineh ninger ratnan anak-anakku luk mulun bang luk matu.

⁵ O luk inanku mawa, iko lutep bang kekamen luk ruenmu kuan kinanak-kinanak tau, sagan pana' lemulun ineh sakai.

⁶ Ideh nemaré kali' ratnan awamu pa kiung sidang tungé'. Do' ngedengan nedeh pad ideh nacu lawédeh maya' kudeng luk petulu dengan Allah.

⁷ Ngaceku ideh nenalan ngakem kuan Keristus dengan na ngalap tabpar rat nelun lukna manu ineh.

⁸ Ngaceku ineh do' tau lun manu ngedengan lemulun ineh, pad tau miak ngalap babpat bang kekamendeh kuan bada' luk matu ineh.

⁹ Ui nengayud tuda'-tuda' bala kuan sidang, iamo' Diotrepes luk sikal pa luundeh, na pian ngalap nekai.

¹⁰ Ngaceku ineh kareb ui macing, ui pian ngegala' amung-amung luk inau'neh ineh: ieh neh kuyoneh nekai, idi balihneh pana'! Iamo' na ieh musam ku ineh. Iamo' ieh ara' nganak kinanak-kinanak tau, kareb ideh macing idi ieh mebpeng lemulun luk sikal nganak nedeh, idi nala' nedeh rat bang sidang.

¹¹ O luk inanku mawa aleg iko nginud luk dat, iamo' nginud luk do'. Lemulun luk nganau' luk do', ieh ineh ratnan Allah; idi lemulun luk nganau' luk dat ineh nateh nenier Allah.

¹² Amung-amung lemulun ngubur ni Demitrius. Luk matu ineh pana' ngubur neneh. Idi kai pana' maré kali' ratnan ineh, idi muyuh kali' bala kai ineh matu peh.

¹³ Inan teh mula' luk belénku namu, iamo' na ui pian ngayud ku dawat idi pén.

¹⁴ Iamo' na mio teh ui meraept papu' namu, idi kiteh miak pegayam petutup. (1-15) Awang kuanmu. Amung-amung lun rurummu maré tabi' namu. Do' maré tabi' kuan anid-anid lun rurum kiteh.

3 Yohanes

Video 3 Yohanes 1

Ikuti Kami:

KONTAK | PARTISIPASI | DONASI