Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Taretan Gayus se kakase! Kaula, pamimpinna jema’at, neser onggu ka sampeyan;

² kaula nyo’on ka Pangeran moga-moga sampeyan eparengngana baras ban ta’ manggi alangan pa-ponapa, akadi sokmana sampeyan ta’ manggi alangan pa-ponapa.

³ Kaula ce’ peragga e bakto badha tan-taretan Kristen dhateng ban abala ka kaula saponapa estona sampeyan ka Allah se lerres, sabab sampeyan pajat terros odhi’ atoro’ ka pangajaranna Allah.

⁴ Tadha’ se lebbi maperak kaula etembang se ngedhing ja’ na’-ana’ kaula padha odhi’ menorot pangajaranna Allah.

⁵ Taretan! Sampeyan ce’ estona e dhalem lalakonna sampeyan kaangguy ca-kanca se padha Kristenna; la’-mala’ reng-oreng Kristen se sampeyan gi’ ta’ kennal, bi’ sampeyan eladine.

⁶ Reng-oreng ganeka ampon notorragi ka jema’at e kennengngan kaula parkara kataresna’anna sampeyan. Tolong reng-oreng ganeka me’ olle bisa nerrossagi parjalananna, ban kalaban cara se sapaneka masenneng panggaliyanna Allah,

⁷ sabab e dhalem parjalanan kaangguy aladine Almasih, reng-oreng ganeka ta’ narema bantowan pa-ponapa dhari reng-oreng se ta’ kennal ka Allah.

⁸ Daddi, sampeyan ban kaula sadaja se Kristen paneka kodu nolong ca-kanca se padha Kristenna akadi reng-oreng ganeka, sopaja sampeyan ban kaula sadaja bisa noro’ tan-taretan e dhalem ehteyarra kaangguy mabalattra pangajaran se lerres dhari Allah.

⁹ Kaula ampon noles sorat se pandha’ ka jema’at, nangeng Diotrefes se terro daddiya pamimpinna jema’at, ta’ poron atoro’ ka kaula.

¹⁰ Dhaggi’ mon kaula ampon napa’ ka’anja, kaula mokka’a sadajana se ampon elakone oreng ganeka, enggi paneka ra-parkara se jahat ban lecek se ekoca’agi oreng ganeka parkara kaula sadaja! Nangeng ganeka sadaja gi’ ta’ cokop monggu ka oreng ganeka. E bakto ca-kanca sasama Kristen ka’issa’ dhateng, oreng ganeka ta’ poron narema. La’-mala’ alarang reng-oreng se narema’a reng-oreng Kristen se dhateng ganeka, ban oreng ganeka nyoro reng-oreng gella’ kalowar dhari jema’at!

¹¹ Taretan se kakase, ja’ nero barang se juba’. Tero se sae. Oreng se lalakonna sae, kaagunganna Allah. Ban oreng se lalakonna juba’ gi’ ta’ kennal ka Allah.

¹² Sadajana oreng padha ngalem Demetriyus. La’-mala’ Allah ngalem jugan. Kaula sadaja jugan ngalem, ban sampeyan oneng, taretan, ja’ se ekoca’agi kaula sadaja ekenneng parcaja.

¹³ Ce’ bannya’na se terro ekoca’agiya kaula ka Sampeyan, nangeng ca’na kaula bango’an ta’ ngangguy sorat.

¹⁴ Kaula ngarep duliya bisa tapanggi bi’ sampeyan, daddi kaula ban sampeyan bisa abu-dhabu dhep-adhebban. (1-15) Moga-moga Pangeran aberkadana sampeyan. Ca-kancana sampeyan e kennengngan kaula paneka akerem salam ka sampeyan. Panapa’agi salam kaula ka sadajana ca-kanca bang-sebang.

3 Yohanes

Video 3 Yohanes 1

Ikuti Kami:

KONTAK | PARTISIPASI | DONASI