Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sura e'i nggari ja'iku topanggeniaka topomparasaya, ka i Gayus, wega rapaku to mpu'u-mpu'u nipotoweku.

² Wegaku, kuperapi ka Pue Alatala ala katuwumu mabelo-belo pade maroso koromu nasimbayu ewa pomparasayamu naroso.

³ Nadamba mpu'u raraku tempo bara sakuya mba'a topomparasaya narata nanguli ka aku komi naroo nomparasaya pepatuduki to nakonona. Niuli ira komi mpu'u-mpu'u natuwu nantuki pepatuduki etu.

⁴ To mpu'u-mpu'u nompakadamba raraku etumo nangepe kareba to nanguli ana-anaku naroo natuwu nantuki pepatuduki to nakonona.

⁵ Wegaku, komi mpu'u-mpu'u natutu nantulungi sampesuwu-sampesuwuta topomparasaya to nesai ri ja'imu, naupa komi da'apa nosinjani ante ira.

⁶ Ira nanguli ka topomparasaya ri se'i tempo kami nasiromu, neliu mpu'u towemu nantulungi ira. Jadi kuperapi, ane ira mesai wo'u ri setu, tulungimo ira ante akala nabelo to nompakadamba rara Alatala, ala ira mamala mompapola polumako ira.

⁷ Ira nalau mompatolele Kareba Yesus ante da'a mantarima petulungi nuapa-nuapa nggari ja'i ntau to da'apa nomparasaya Alatala.

⁸ Sabana etu kita topomparasaya masipato mantulungi ira, ala kita wo'u masintuwu ante ira mompatolele pepatuduki to nakonona nggari ja'i Alatala.

⁹ Nariamo sura to nitulisiku ka topomparasaya ri setu, tapi i Diotrefes da'a nadota mantuki tesaku. I'a aga madota ala tesana njamba'ana ratuki ntau.

¹⁰ Jadi tempo aku marata ri setu kana kutesa mpakanoto ka komi nuapa pura to nikawiana, sabana powiana etu naja'a mpu'u. Nadea tesa dawa to naja'a mpu'u to niulina ewa kami. Pade da'a aga etu. Tempo roa-roata topomparasaya narata ri setu, i'a da'a nadota mantarima ira riara njapona. Pade i'a nombatagi topomparasaya ntanina ri setu mantarima ira. Pade ira to da'a nantuki tesana etu nisuwurakana nggari tatongo topomparasaya.

¹¹ Wegaku, ne'e mupasiala powia to nadenggona, tapi pasialamo to nabelona. Tau nompowia to nabelona i'a ana nu Alatala. Tapi tau nompowia to naja'ana da'a ntoto nosinjani ante Alatala.

¹² Pura-pura tau nantoiya i Demetrius. Nggari pokaingguna to nanoana nanotomo ka ira i'a nantuki pepatuduki to nakonona. Kami wo'u nantoiya i'a, pade ninjanimu nuapa to niuli kami namala raparasaya.

¹³ Danadea mpu'u tesa paraluu kutesa ka komi, tapi nipekiriku nabelopa ne'e ratulisi riara sura.

¹⁴ Nisarumakaku mana masaeka aku momposirata komi pade mamala kita motesa mosirata mata. (1-15) Perapi Pue mombagane komi. Nadea tabe nggari ja'i roa-roata ri se'i. Pakasampe tabeku ri ja'i roa-roaku ri setu samba'a bo samba'a.

3 Yohanes

Video 3 Yohanes 1

Ikuti Kami:

KONTAK | PARTISIPASI | DONASI