Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Tipaq Gayus saq tiang kasihin lẽq dalem kebenaran, lẽman tiang pemimpin jemaah.

² Tiang bedo'e semoge side tetep sẽhat dait ndẽq araq saq kurang lẽq side, pade maraq jiwende ẽndah sẽhat.

³ Tiang seneng gati sewaktu pire dengan semeton dateng dait ngebẽng kesaksian tipaq tiang berembẽ setiene side lẽq kebenaran, sẽngaq mule side tetep idup menurut kebenaran.

⁴ Ndẽq araq saq miaq tiang lebih besukecite, selain dengah kabar bahwe bije-bije tiang idup menurut kebenaran.

⁵ Semeton tiang saq tiang kasihin, side setie gati lẽq pegawẽan saq side laksaneang tipaq semeton-semeton saq lain; malahan saq ndẽqman side kenal ẽndah.

⁶ Ie pade sampun ngebẽng kesaksian lẽq julun jemaah mengenai kasihde. Tulung ie pade adẽqne bau ngelanjutang kelampan ie pade dait siq care nike nyenengang Allah,

⁷ sẽngaq lẽq dalem kelampan jari ngelayanin Almasih, ie pade ndẽq nerimaq bantuan napi juaq lẽman dengan-dengan saq ndẽq kenal kance Allah.

⁸ Keranaq nike ite harus nulung semeton-semeton saq maraq nike, adẽq ite milu lẽq dalem usahe ie pade jari beriteang kebenaran.

⁹ Tiang sampun nulis surat saq singket tipaq jemaah, laguq Diotrepes saq melẽt jari dengan saq paling utame lẽq dalem jemaah, ndẽqne mẽlẽ ngakuq tiang pade.

¹⁰ Laun lamun tiang dateng, gen tiang ingetang selapuq hal saq sampun ie laksaneang, nike mengenai hal-hal jahat dait duste saq ie ucapang mengenai tiang pade! Laguq selapuqne nike ndẽqman cukup tipaq ie. Lẽq waktu semeton-semeton nike dateng, ie ndẽq mẽlẽ nerimaq ie pade. Malahan ie balaq dengan-dengan saq mẽlẽ nerimaq semeton-semeton nike, dait ie suruq dengan-dengan nike sugul lẽman jemaah!

¹¹ Semeton senamian saq tiang kasihin, ndaq tiru napi saq jahat, laguq tiru napi saq solah. Dengan saq ngelaksaneang saq solah, asalne lẽman Allah. Dait dengan saq piaq jahat, ndẽqne uwah serioq Allah.

¹² Mengenai Demetrius, selapuq dengan ngebẽng kesaksian saq solah, malahan kebenaran nike mẽsaq ngebẽng kesaksian saq maraq nike. Tiang pade ẽndah ngebẽng kesaksian saq solah, dait napi saq tiang pade sampẽang bau tesaduq.

¹³ Luwẽq gati saq perlu tiang sampẽang lẽq side, laguq solahan lamun tiang ndẽq kadu surat.

¹⁴ Tiang beharep becat bedait kance side dait bau ngeraos langsung. (1-15) Damẽ sejahtere araq bareng kance side! Salam lẽman sahabat-sahabatde. Sampẽang salam tiang tipaq sahabat-sahabatte sopoq-sopoq.

3 Yohanes

Video 3 Yohanes 1

Ikuti Kami:

KONTAK | PARTISIPASI | DONASI