Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Talifusõgu Gayo Ni'omasi'õ! Ya'o, sondrõnia'õ banua Niha Keriso, si no mangomasi'õ ya'ugõ sindruhundruhu,

² mangandrõdo salahiu ena'õ lõ fõkhõfõkhõu ba sõkhi ma'afefu hadia khõu si mane nosou oi si sõkhi manõ.

³ Omuso sibai dõdõgu me tohare ndra talifusõ andrõ ba la'ombakha'õ ha wa'alõfarõimõ ba duria sindruhu andrõ soroi Lowalangi, bõrõ me duhu lõ mamalõ no solo'õ famahaõ khõ Lowalangi ndra'ugõ.

⁴ Sambalõ tõ lõ hadõi gõi si tola mangomusoi'õ tõdõgu wamondrongo wa iraono khõgu no solo'õ famahaõ Lowalangi.

⁵ He ya'ugõ talifusõgu! Fa'alõfarõimõ andrõ oroma ba ngawalõ nilaumõ ba dalifusõ ndrotondroto mbanua Niha Keriso; he gõi ba Niha Keriso si lõ õ'ila na'i, mõi ndra'ugõ enonira.

⁶ No la'ombakha'õ ba mbanua Niha Keriso ba da'e wa'omasimõ andrõ. Tohugõ wanolo ya'ira fatola latohugõ wofanõra, ena'õ omuso dõdõ Lowalangi wamaigi.

⁷ Bõrõ me ba wofanõ ndra talifusõ andrõ wohalõw̃õ khõ Keriso, ba lõ latema wanolo hadia ia gõi soroi niha si lõ mangila Lowalangi.

⁸ Bõrõ da'õ, ya'ita Niha Keriso lõ tola lõ tatolo nawõda ndrotondroto Niha Keriso si mane da'õ, ena'õ tola fao ita ba halõw̃õra wanuriaigõ turia sindruhu andrõ soroi Lowalangi.

⁹ No usura sagõrõ zura sadogodogo ba mbanua Niha Keriso; ba Dioterefe andrõ somasi tobali sondrõnia'õ bakha ba mbanua Niha Keriso, lõ omasi i'o'õ khõgu.

¹⁰ Na so ndra'o dania, ba ufatunõ ngawalõ zi no ifalua, sanandrõsa ba ngawalõ zi lõ sõkhi ba faya si no iw̃a'õ! Ba fefu da'õ lõ nasa tobõnõ khõnia. Me inõtõ tohare ndra awõda ndrotondroto Niha Keriso andrõ, lõ omasi ia itema ira. Itenaw̃a na'i niha somasi manema ira talifusõ andrõ, awõ wa i'efa'õ niha da'õ banua Niha Keriso.

¹¹ He ya'ugõ talifusõ ni'omasi'õ, bõi halõ khõu zi lõ sõkhi. Halõ khõu zi sõkhi. Niha samalua si sõkhi, no moroi ba Lowalangi. Ba niha samalua si lõ sõkhi, lõ nasa si falukha ia khõ Lowalangi.

¹² Fefu niha oi lasuno Dimeterio. Isuno gõi ia Lowalangi. Ya'aga gõi masuno ia, ba ya'aboto ba dõdõu wa no sindruhu nifa'emama andrõ.

¹³ Oya zinangea uw̃a'õ khõu mena'õ, ba uw̃a'õ tõdõgu abõlõ sõkhi bõi faoma sura.

¹⁴ Udõnadõna wa lõ ara tõ falukha ndra'o khõu, ba fahuhuo ita dania. (1-15) Ya Ifahowu'õ ndra'ugõ Lowalangi. La'owai ndra'ugõ ira talifusõ si so ba da'e. Fa'ema wangowaigu ba dalifusõda fefu, samõsamõsa.

3 Yohanes

Video 3 Yohanes 1

Ikuti Kami:

KONTAK | PARTISIPASI | DONASI