Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sudaro Gayus nan tacinto! Ambo, pamimpin jamaat, nan sabana-bana mangasiahi angkau,

² badowa mudah-mudahan angkau siyaik-siyaik, sarato kasadonyo baiak jo angkau, samo jo bakcando jiwa angkau baiak-baiak pulo andaknyo.

³ Ambo suko sangaik kutiko babarapo urang sudaro kito nan Kristen bi tibo, sarato mancuritokan kabake ambo, baralah ka satiyanyo angkau kapado Allah nan bana, dek karano, nan angkau iyo tatap iduik manuruik pangajaran Allah.

⁴ Indak ado doh nan dapek manjadikan ambo labiah bagadang ati, salain dari mandanga, baraso anak-anak ambo iduik manuruik pangajaran Allah.

⁵ Sudaro ambo! Angkau sabana satiya dalam karajo nan angkau karajokan untuak kanti-kanti sasamo Kristen; malahan urang Kristen nan alun bakatawuan jo angkau pun, angkau layani.

⁶ Urang-urang tu lah mancuritokan kabake jamaat di tampaik kami, tantang kasiah angkau. Tolonglah urang-urang tu, supayo inyo dapek manaruihkan pajalanannyo, jo caro nan baitu, manyanangkan ati Allah,

⁷ dek karano, dalam pajalanan untuak malayani Isa Almasih, inyo indak ado doh manarimo bantuan apo pun juwo, dari urang-urang nan indak tawu jo Allah.

⁸ Dek karano itu, kito nan urang-urang Kristen, musti manolong kanti-kanti sasamo Kristen nan bakcando itu, supayo kito dapek sato dalam usawonyo, untuak manyebarkan pangajaran nan bana dari Allah.

⁹ Ambo lah mambuwek surek nan singkek kabake jamaat, tapi, si Diotrefes nan niyo nak manjadi pamimpin di dalam jamaat, indak namuah manuruikti ambo.

¹⁰ Isuak jikok ambo datang, ambo ka mambongka sagalo sasuatu nan lah dikarajokannyo, iyolah tantang parkaro-parkaro nan jahek sarato jo duto, nan inyo katokan tantang diri kami! Tapi kasadonyo tu alun cukuik untuaknyo. Dikutiko kanti-kanti sasamo Kristen tu bi tibo, inyo indak namuah doh manarimo urang-urang tu. Malah inyo managah, urang-urang nan namuah manarimo sudaro-sudaro tu, inyo suruah kaluwa dari jamaat!

¹¹ Sudaro nan tacinto, janlah maniru apo nan buruak. Tirulah apo nan baiak. Urang nan babuwek baiak adolah miliak Allah. Urang nan babuwek jahek alun tawu jo Allah.

¹² Kasadonyo urang bi mamuji si Demetrius. Malahan Allah pun mamujinyo. Kami mamuji inyo pulo, sudaro tawu, baraso apo nan kami sampaikan dapek dipicayoi.

¹³ Sabana sambuah nan paralu ambo katokan kabake angkau, tapi ambo raso labiah elok jan malalui surek.

¹⁴ Ambo ma arokkan sacapeknyo basuwo jo angkau, buliah kito ka mangecek lansuang. (1-15) Mudah-mudahan Tuhan mambarakaik-i angkau. Kanti-kanti angkau nan di tampaik ambo ko, mangirin salam kabake angkau. Sampaikan salam ambo kabake sadonyo kanti kito.

3 Yohanes

Video 3 Yohanes 1

Ikuti Kami:

KONTAK | PARTISIPASI | DONASI