Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Gayus, vega nipotoveku: Sura hitu lako nte yaku, i Yohanes, pakeni ntopomparasaya. Yaku mpuu-mpuu nompotove iko.

² Vegaku, kuperapi nte Alatala, ala katuvumu mabelo bo karomu maroso, nasimbayu mpo karoso pomparasayamu.

³ Nadamba mpuumo raraku, sabana bara sako-ndua topomparasaya nakava nte yaku nanguli iko naroo nomparasaya pepatuduki nakana. Niulira iko mpuu-mpuu natuvu nangoseaka pepatuduki nakana.

⁴ Ledo ria anu nompakadamba raraku nelabipa pade nangepe kareba nanguli ana-anaku natuvu nangoseaka pepatuduki nakana.

⁵ Vegaku, pokainggumu nosinggambela nte pomparasayamu tempo iko nantulungi sampesuvuta sampomparasaya anu nesai nte iko. Nau iko dopa nosisani ante ira, iko batena nombatulungi ira.

⁶ Riara podade kami ri sii, nitesara kabelo nu raramu nantulungi ira. Jadi kuperapi, ane ira mesai vai nte iko, tulungimo ira mompapola polipara, ala madamba rara nu Alatala.

⁷ Apa sampesuvuta haitu nanggeni kareba i Kristus bo ledo ria nuapa-nuapa nitarimara lako nte tona anu ledo nosisani nte Alatala.

⁸ Jadi, masipato kita topomparasaya mombatulungi ira, bo ane kita nombatulungi ira, nasimbayu mpo niporoata muni ira nompatolele pepatuduki nakana lako nte Alatala.

⁹ Nariamo sura nitulisiku ka topomparasaya hamai, tapi i Diotrefes ledo nadota nangoseaka tesaku. Patujuna, ia mboto majadi pakeni ntopomparasaya.

¹⁰ Ane makava ri situ yaku, kana kupakalanto ka komiu pura-pura anu nipoviana, sabana poviana haitu ledo ntoto nabelo. Nadea mpuu tesa dava niulina nompakadaa sanga kami. Bo ledo aga haitu. Tempo roa-roata sampomparasaya nakava nanggeni Kareba Belo, ledo nadota ia nantarima ira ri banuana. Bo nitagina muni topomparasaya ntanina mantarima ira. Isema ledo nantuntuni tesana haitu, nipopalaina lako ri kasiromu ntodea topomparasaya, ledo nipalogana ira mantuntuni podade.

¹¹ Vegaku, nee mupasiala pokainggu nadaa, tapi pasialamo pokainggu nabelo. Isema-sema novia anu nabelo, iramo ana-ana nu Alatala. Tapi isema-sema novia anu nadaa, ledo ntoto nosisani nte Alatala.

¹² Pura-pura tona nantoiya i Demetrius. Lako ri pokaingguna nanoa, nisaniramo ia nangoseaka pepatuduki nakana. Kami muni nantoiya ia, bo nisanimu nuapa-nuapa niuli kami, namala raparasaya.

¹³ Da nadeapa tesa kutesa ka iko, tapi nipekiriku nabelopa domo kutulisi ri sura.

¹⁴ Nisarumakaku domo masae, yaku tou mosinggava nte iko bo mamala kita motesa ri mata. (1-15) Kuperapi Alatala mompakatinonto raramu. Nadea tabe lako nte roa-roata ri sii. Pakapola tabe kami ka roa-roata ri situ. Tabe lako nte yaku, YOHANES

3 Yohanes

Video 3 Yohanes 1

Ikuti Kami:

KONTAK | PARTISIPASI | DONASI