Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sura’ iate lu dio mai kaleku, misa’ to matua, lako Gayus tu dipakaboro’ sia aku te umpakaboro’ tonganni.

² E pa’kaboro’ku, massambayangna’ kumua ammu maupa’ lan mintu’na sia malaga’-laga’, susi duka deatammu maupa’.

³ Belanna lendu’ tongan parannungku, tonna rampo ba’tu pira-pira tau ungkatottongi gau’mu situru’ kamanapparan, umba mukua lolang lan kamanapparan.

⁴ Tae’ dio kaleku tu kaparannuan mandu kapua na iate, urrangii tu mai anakku lolang lan kamanapparan.

⁵ E pa’kaboro’ku, mangkamoko umpalolang maruru’ kalemu lan mintu’ penggaurammu lako sangsiuluran, moi anna tau iato mai to sae.

⁶ Tu mangkamo ungkatottongi pa’kaboro’mu dio olona kombongan; melo dukamo penggaurammu ke mukinalloi tu tau iato mai, susi sipato’na dio oloNa Puang Matua.

⁷ Belanna tete dio sanganNa Puang ke’de’mo tu tau iato mai, tang ungkabudai barang apa dio mai to kapere’ iato.

⁸ Iamoto kita te pato’ki’ untundui tu tau susito, kumua tama’din sangayoka mengkarang umpalolang kamanapparan.

⁹ Ba’tu pira-piramo apa mangka kusura’ lako kombongan, apa iatu Diotrefes tu la morai dadi pangulu lako tau iato mai, manoka unnakukan.

¹⁰ Iamoto iake saena’ la kupakilala tu mintu’ penggauran napogau’, belanna mangkamokan natelle kada mabiri’; apa tae’pa nasangai silasa to, belanna tangia manna kumua manoka untarimai mintu’ to mai siulu’, sangadinna nagagai duka tu tau la morai untarima tau iato mai, sia natassu’i lan mai kombongan.

¹¹ E pa’kaboro’ku da muturu’i tu sangka’ kadake, sangadinna melona. Iatu to umpogau’ melo, lu dio mai Puang Matua; apa iatu to umpogau’ kadake, tae’pa anna tiro Puang Matua.

¹² Diona a’ganna Demetrius nakatonganni melo mintu’ tau sia dio duka mai kamanapparan iato; na kami duka te ungkatonganni meloi, sia mutandai kumua iatu pa’tonganningki tonganna.

¹³ Budapa tu apa la kusurasangko, apa tae’ kuporai ussura’i tinta sia peoki’.

¹⁴ Apa kurannuan la sitiroki’ madomi’ anta sipuduk sipa’kada. (1-15) Narampoimoroko kamarampasan. Mintu’ sangmuane umparampoangko salama’na. Parampoan simisa’-misa’i salama’ku tu mintu’ sangmuaneta.

3 Yohanes

Video 3 Yohanes 1

Ikuti Kami:

KONTAK | PARTISIPASI | DONASI