Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Puari Gayus sai tecinta! Nyak, jelma sai mimpin jemaah, sai temon-temon mengasihimu,

² bedua semoga Puari sihat-sihat rik sunyinni betik-betik jama niku, gegoh injuk jiwamu betik-betik gaoh.

³ Nyak riang nihan waktu pepira puari Kristen sampai rik ngeni pandai jama nyak hara setiani Puari tehadap Allah sai benor, mani sangun Puari selalu hurik nutuk ajaran-Ni Allah.

⁴ Mak ngedok sai dapok ngejadiko nyak lebih riang, jak ngedengi bahwa anak-anakku hurik nutuk ajaran-Ni Allah.

⁵ Puariku! Puari reno setia delom guai sai Puari lakuko untuk kantik-kantik peperda Kristen; bahkan jelma Kristen sai makkung Puari kenal pun, Puari layani juga.

⁶ Tian radu ngeni pandai jama jemaah di rang sekam tentang kasihmu. Tulungdo tian in dapok nerusko lapahni tian rik jama injuk reno nyenangko hati-Ni Allah,

⁷ mani delom lapahni untuk ngelayani Almasih, tian mak nerima bantuan api pun jak jelma-jelma sai mak kenal jama Allah.

⁸ Ulihni seno, ram jelma-jelma Kristen haga nulung kantik-kantik peperda Kristen sai injuk reno, in ram dapok nutuk delom usaha tian untuk nyebarko ajaran sai benor jak Allah.

⁹ Nyak radu nulis surat sai buntak jama jemaah, kidang Diotrefes sai mirak jadi jelma sai mimpin di delom jemaah, mak haga nutuk nyak.

¹⁰ Kanah kik nyak ratong, nyak haga ngebungkar sunyin hal sai radu dilakukoni, yakdo tentang hal-hal jahat rik buhung sai ia ucakko tentang sekam! Kidang sunyinni ano makkung cukup untuk ia. Waktu kantik-kantik peperda Kristen udi ratong, ia mak haga nerima tian. Malah ia ngelarang jelma-jelma sai haga nerima puari-puari udi, rik ia ngayun jelma-jelma udi luah jak jemaah!

¹¹ Puari sai tecinta, dangdo niru api sai burak. Tirudo api sai betik. Jelma sai ngelakuko sai betik yakdo kedau-Ni Allah. Rik jelma sai ngelakuko sai jahat makkung kenal jama Allah.

¹² Sunyin jelma memuji Demetrius. Bahkan Allah pun memuji ia. Sekam juga memuji ia, rik Puari pandai bahwa api sai sekam sampaiko dapok dipercaya.

¹³ Lamon nihan sai perlu kucawako jama niku, kidang kurasa lebih betik dang liwat surat.

¹⁴ Nyak ngeharap mak mesaka lagi haga betungga niku, rik ram haga cawa langsung. (1-15) Semoga Tuhan ngeberkati Puari. Kantik-kantikmu di rangku inji ngirim salam jama niku. Sampaiko salamku jama sunyin kantik-kantik ram satu-persatu.

3 Yohanes

Video 3 Yohanes 1

Ikuti Kami:

KONTAK | PARTISIPASI | DONASI