Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Allahn fanowap henebuhuwon misig monde fuhuk ulug sali ibahon ino Yesus fahet ibag ulug tem toho peruk ahun ino Allah amloho wereg. Ikni fahet indi roho wereg ahun inowen Amloho faher oho indi haruk lit wereg.
2 Allahn hiyag nisarukon holtuk lit ninindi reg lahe halug Allah umalikisi faher oho ninindi enesug lahe ane seleg atuk.
3 Ap san Allahn komo neneptuk ane holtuk lit hikit toho turuk ahun inowen Allah indi reg lit wereg. Allahn komo neneptuk ane anggin eleg.
4 Allah umalikisi Aren mumal eneptisiyon arimanowen kinangman turuk ane apmayap tuk teg. Niren Yesus Kristus fam ninindi wenggel haruk laheyon ariyen kinangman turuk ane apmayap turukuk.
5 Ap san kinangman turuk ane apmayap tuk teg? Yesus Kristus Allah amloho wereg ulug wenggel haruk ahun inowen eneg apmayap tuk teg.
6 Yesus Kristus ino kinangma waharuk lit ik men mep men walug watfag. At ino waharuk lit ik eneg walug watfag fug, iket mebet walug watfag. Allah hime fanowon tem toho perukon inowen alem tu teko laha ulug enehangge imbibag.
7 Inilen hibahon itano enebe hinahan poholma werehon tu: Ikni men wene fanowon men Allah hime fanowon men it enebe hinahanen alem misihon fahet eneg hiyag nisaruk.
8 Enehangge enebe hinahan kinangma werehon tu: Allah hime fanowon men ik men mep men it enebe hinahanen alem misihon fahet eneg hiyag nisaruk.
9 Alem aru aben fag toho hiyag nisarusa ane fahet niren tem toho perukuk. Ari reg angge famen Allah inggarehen fag toho hiyag nisaruk ane mondabi palimu reg lit wereg. Allahn fag toho hiyag nisarisi ane ari Amloho fahet hiyag nisarisi.
10 Ap san Allah amloho fahet indi wenggel harukon inowen Allahn fag toho irisi ane holtisireg indimu foroho lit wereg. Ap san Allah fam indi wenggel haruk elehon inowen Allah ino ele si ane uruk peruk. At inowen Allahn Amloho fahet fag toho hiyag nisarisi ane indimuwen tem peruk eleg.
11 Allahn Amloho fahet fag toho hiyag nisarisi ane alem tu imin: Nit ap kinangmon mondabi onoluk welamag ulug Amloho monde fibag.
12 Ap sa Amloho men mangno roho werehon ino at mondabi oluk welaruhu. Ap sa Amloho men hili roho werehon ino at oluk welaruhu fug.
13 Hit mondabi honoluk welamuhup ane fahet hinindi anggar amag ulug hiren Allah amloho unuk fahet wenggel haruk lahepma suwesingga aru fam emberuk lahi.
14 Niren sembahyang uruk lit Aren peruk ane hikit toho heng turuk lamuhukmu nenele holtuk laruhu. Ari nonoluk tehen At alukema nenembong se roho unduhuk lamuhuk.
15 Niren sembahyang urukmu nenele holtuk laruhu ane ari nit nonoluk. Ari nonoluk teg lit heng turuk lamuhukmu og nisahu ane ari nonoluk.
16 Siyag ane turukon ambiyangma war atuk ane inam am fug tohon ari ap misihen turukmu areyen yet hahureg ubahet sembahyang uruk laruhu. Ubahet sembahyang urukmu Allahn at ino fanowap tuhu. Siyag ane turukon ambiyangma war atuk ane inam am fug tohon ari turuk inap Allah fanowap enebuk teg. Siyag ane turukon ambiyangma war atuk ane inam atukon ari turuk inap Allahn fanowap enebuk fug teg. Ari roho turuk inap fahet sembahyang uk fug teg peruk lahi.
17 Aben onolok ane turukon obog toho siyag ane turuk angge famen siyag ane turukon obog toho war am fug teg.
18 Allah umalikisi atuson arimanowen siyag ane turuk eleg ane ari nit nonoluk. It arimano Allah amloho inowen fet enesug lit weregma siyahonen ininggik lir enebuk fug teg.
19 Ap kinangmon obog toho siyahonen inggik ine roho sen enesugmu nit Allah umalikisi atukuk ane nonoluk.
20 Allah tem ane urukon ino onoluk amag ulug Amlohowen nit ninindi anggarap nenebik watfag. Amloho Yesus Kristus men nininggik ahandip toho wereg lit Allah tem ane urukon ino men oho nininggik ahandip toho welahe. Yesus Kristus ino Allah tem toho urukon werehen mondabi onoluk welamuhup ane alem ino At wereg.
21 Numalikisi, hinil wirik toho wereg lit usane turuk inap kahal enesug lamuhup.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA