Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Idé-idé luk manu idi Yésus ineh Keristus, idi lemulun ineh tinganak ratnan Allah, idi idé-idé luk mawa inan Taman, ieh pana' mawa inan anakNeh teh.
2 Ratnan ini tau kali', idi tau mawa inan anak-anak Allah, ieh ineh kudeng tau mawa inan Allah idi maya ukum-ukumNeh.
3 Ngaceku ini awa inan Allah, ieh ineh maya' ukum-ukumNeh. Idi ukum-ukumNeh ineh baken meberat.
4 Ngaceku idé-idé pana' luk tinganak ratnan Allah miak ngelaya' tana' ini. Idi ini tueh tau luk ngelaya' tana' ini, ieh ineh anu tau.
5 Idéké miak ngelaya' tana' ini? Lemulun luk manu idi Yésus ineh Anak Allah mo'.
6 Yésus Keristus ineh luk pangeh nacing. Ieh nacing dengan abpa' rerebNeh idi dara' atéNeh. Ieh nacing baken dengan abpa' mo', iamo' dengan abpa' idi dara'. Idi Roh ineh mangun ku luk nekali' ratnan ineh matu, ngaceku Roh ineh matu.
7 Inan teluh luk mangun ku luk nekali',
8 ieh ineh Roh, abpa', idi dara'; luk teluh ini mangun ku luk nekali' luk mepad mo'.
9 Tau manu ku luk nekali' lemulun, iamo' luk nekali' Allah meluun lalud. Idi ini luk nekali' Allah, idi luk pangeh bilaNeh ratnan AnakNeh ineh.
10 Ngaceku ineh, lemulun luk manu inan Anak Allah, inan luk nekali' bang niatneh, idi lemulun luk na manu inan Allah, ieh mala Allah mebalih, ngaceku lemulun ineh na manu ku luk nekali' luk pangeh biré Allah ratnan AnakNeh.
11 Idi ini luk nekali' luk pangeh bida'Neh: Allah pangeh nemaré ulun luk meruked kuan tau, idi ulun ineh bang Anakneh.
12 Idi lemulun luk kuan Anak inan ulun; idi lemulun luk na kuan Anak ineh na luk idi ulun neneh.
13 Ui nengayud ini kuan muyuh pad muyuh kali' idi muyuh pangeh nengalap ulun luk meruked, ieh ineh muyuh luk pangeh manu ku ngadan Anak Allah.
14 Tau mekuu' pa kiung Allah ngaceku tau kali' Ieh ninger sembayang tau kareb tau mutuh anun-anun maya' luk pianNeh.
15 Kudeng tau kali' Ieh ninger ratnan anun-anun luk pituen tau Neneh, idi tau kali' tau ngalap amung-amung luk pituen tau rat Neneh.
16 Kudeng idé lemulun lu nier kinanakneh nganau' sala' luk na ngacing até, idi do' ieh sembayang kuanneh, idi Allah miak maré ulun kuanneh, ieh ineh anid-anid lemulun luk nganau' sala' luk na ngacing até. Idi inan aceh sala' luk ngacing até; idi na ui ngecuk nemuyuh mutuh nan Allah ratnan sala' ineh.
17 Idi anid-anid kekamen luk dat, ieh ineh sala'; idi inan sala' luk na ngacing até.
18 Tau kali' idi idé lemulun luk tinganak ratnan Allah na megéi' nganau' sala'; iamo' lemulun luk tinganak ratnan Allah ineh nginita bururneh, idi Luk Dat ineh na miak ngakem neneh.
19 Tau kali' tau ini ratnan Allah, idi amung-amung tana' ini pa liang imet Luk Dat ineh.
20 Tau kali' Anak Allah pangeh nacing idi pangeh nemaré ileh kuan tau pad tau miak ngiti Allah luk matu; idi tau ini idi bang Allah luk matu, ieh ineh bang AnakNeh, Yésus Keristus. Idi Ieh ineh Allah luk matu, idi ieh ineh ulun luk meruked.
21 O anak-anakku, nginita burur muyuh ratnan akang-akang luk mebalih.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA