Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Astesda gareg en medoc ebdebin an Yesus dag enin eng Sud Hom Geigdoc Maman Dau Sesar Men Gogom Augwan, kaba, Allah eigdoumesa en moho dag en mogwihi mogo en dag misen touohob. Hang en medoc mog mog an Allah mehir gus touwero. Doba en medoc gororougb len toua terimda. Anai gareg en medoc gororougb mena, kaba, en medoc gororougb en mehir gus laugwan toua.
2 Dangga gareg en medoc gororougb Allah mehir dag ginohob, kaba, gini ansins dag en medoc gororougb Allah. Hanoba en aimo Allah en mer an areg en arougb en an gin augwan toua dag misenohob.
3 Anai sug maman mamdoc gororougb Allah dag misenohob, kaba, maman mamedreg en mer gin touwero. Doba maman maicara maimo en mer gin toua.
4 Hang en mer gin, kaba, emogom naugb maman touwero. Doba maman maimo augwan gini dara maman mamdoc esgiraha namcir. Anai sug maman madag Allah mogwihi mogo maman dag misenohob, kaba, maman mamobsara dou lusud gedig Bilis oiharaga len se cinogo gini an meren geicara dag mog mog gin toua deitero. Doba maman maiyan len an gin augwan dau maman namcirohob. Anai sug maman mamdoc ebdebin an Yesus en edag Allah Meisi misen, kaba, gin eng eic goubesa dou maman naugb sug maman maiyan augwan gini dau maman toua.
5 Dangga gareg en medoc ebdebin an Yesus dag eni Allah Meisi misenohob, kaba, enin dous eng men goubesa edeinyum naugb sug en aiyan lusud gedig Bilis oiharaga len se cinogo gin toua. Ara gus, kaba, men goubesa emedeinyum naugb ginero.
6 Dara sud hom gedig en ouwaden dau bogo naugb en eigdoc maman dau sesar men gogom augwan, kaba, en emedag Krisdus dousero. Doba sug en ouwaden dau bogo, kaba, en edag Yesus dara Krisdus toua teiteiyohob. Dangga sud hom gedig Yohanes ogun en se duhu, dara sud hom gedig len leir en mogwihi taiba sogo salib naugb maman sesar gin, kaba, eni Yesus dousero. Doba eni Yesus Krisdus teitei touohob. Hang sug en en gin, kaba, en emen naugb sug Yohanes ogun en se duhu dousero. Doba en en naugb sug len leir en mogwihi taiba sogo salib naugb maman sesar gin toua. Dara Yesus gin, kaba, Mena Gogoufu en toua ouma debin en dag en edag Krisdus teitei touohob. Anai Mena Gogoufu gin, kaba, en emereiyara dou maman touwero. Doba en enara areg se geica dou maman namcir. Hang maman macinaga dag en edag Krisdus sug Yohanes ogun en se duhu dousero. Doba en edag Krisdus sug en eic en mogwihi taiba sogo salib naugb maman toua.
7 Dangga duhu dara mogwihi dara areg Mena Gogoufu ouma debin gin, kaba, homoi gini ens dou maman dag Yesus enin eng Allah Meisi misen gouwaden dau bogo. Hanoba en omom taiba sogo salib naugb maman sesar gin touohob. Anai duhu dara mogwihi maran gansins. Dara areg Mena Gogoufu ouma debin gin, kaba, ingma susugwero, doba dag hom namcir.
8 (5:7)
9 Dara Allah enin toua ouma debin Yesus en edag en Meisi misen gin touohob. Dangga hang, sug maman maod mamina debsa lusud an areg len louma debin ginohob, kaba, eigouhw naugb maman maod mamina debsa Allah en mer gouma debin Yesus dag eni Meisi misen gin toua terimda. Anai areg en ouma debin gini, kaba, mera eisaugb bedreg dau areg lusud misen len louma debin gin toua namcirohob.
10 Dangga gareg en medoc ebdebin an Yesus en edag Allah Meisi misen, kaba, en emesbes Allah an areg en ouma debin Yesus gin touwero. Doba en ebin augwan gini se enin medoc mes toua terimda. Doba gareg en medoc emebdebin an areg Allah ouma debin Yesus ginero, kaba, en owun Allah en moho dag eni sud hom gereiyara dous. Anai en emod mena debsa Allah en mer an areg en ouma debin Yesus dag eni en Meisi misen gin touwero. Doba en esbes an enohob.
11 Dara areg Allah ouma debin en Meisi dou maman, kaba, dag en eic maireseb menau geb huhugb ogdoc en Meisi gin dou maman. Anai maireseb menau geb huhugb gin, kaba, eb se en Meisi gin teiteiyohob.
12 Dangga gareg en ebin Allah Meisi gini se en medoc mes, kaba, maireseb menau geb huhugb eb naugb enohob. Doba gareg en emebin Allah en Meisi gin se en medoc mesero, kaba, maireseb menau geb huhugb emeb naugb en touwero.
13 Dan dog dau areg graga augwan dou yen, dauntoba yen yemeija meijuwesa maireseb menau geb huhugb gin toua deitero. Doba yen meigdoc eica namcir, anai yen meigdoc ebdebin an Allah Meisi ginohob.
14 Hang igdebes emeba maman dau sug maman macgeij ara ara dau Allah touwero. Doba maman maic mamus naugb gin terimda. Anai maman macinaga dau sug maman macgeij areg asesa enin medoc mes, kaba, en emoc dou moms dougwo maman mamir an gin touwero. Doba en ouman maman mamir toua namcir.
15 Dara sug maman macinaga dag areg maman macgeij dau en, doba en ouman maman mamir an ginohob, kaba, maman macinaga dag en ousa deisa maman, hang en emeic augwan dou maman toua.
16 Dangga sug sud hom dau yen, kaba, en eiya en maguna era en medamouwa hom dag en ebesesarohob. Doba sesar gin, kaba, dag sesar gemahwan en aud gomom ucugb namcir touebma, kaba, eigouhw naugb en acgeij Allah, dauntoba en eic maireseb menau geb huhugb ucugb dou en. Hanoba Allah ousa deisa en an gin toua. Anai sesar gin, kaba, eic dag gudec eba en dougwohob. Hang emahwan en aud gomom ucugb namcir touebma. Sesar gudec emeba lusud dougworo, kaba, toua moongga. Dangga sug sud hom dau yen en eiya en maguna era en medamouwa dag en aimo sesar ginohob, kaba, dan den dougwo en dauntoba en emacgeij Allah naugb en eic maireseb menau geb huhugb dou en ucugb touwero. Doba amsoho en deb namcir. Anai sesar hom gin, kaba, ahwan en aud gomom ucugb namcirohob.
17 Areg edreg Allah enin medoc mes, kaba, dag sesarohob. Doba astesda dau sesar augwan gin, kaba, sug gudec eba maman dougwohob, hang emahwan maman aud gomom ucugb touebma. Doba cumougt inggebga naugb mamanaba.
18 Gareg en edag Allah en mogwihi mogo ginohob, kaba, en emebesesar toua deitero. Doba en arges dau namcir. Anai Allah Meisi eseyeiyo en dougwo areg gecgu terimdohob. Hang Sud Hom Mobgos Maha, kaba, en emen aud en naugb eic gecgu dou en touwero.
19 Anai maman, kaba, maman macinaga dag Allah en maga aiga mamanohob. Doba lusud gus, kaba, Sud Hom Mobgos Maha gini en oiharaga len terimdaba.
20 Doba naugb maman, kaba, maman macinaga dag Allah Meisi gin, kaba, en ouwaden dau bogo naugb en ens ucina dou maman. Dauntoba maman macinaga areg geb se Allah enin medoc mes augwan dag misen. Anai en, kaba, sud hom geica namcir. Dangga sug maman mamdoc dag hom dara en Meisi Yesus Krisdus ginohob, kaba, maman mamdoc dag hom dara Allah misen. Anai en Meisi gin, kaba, en moho aninim dag Allah misen gin touohob. Hang maireseb menau geb huhugb gin, kaba, ogdoc en Meisi gin toua.
21 Dan indihirija, sug yen yedag hom dara Allah dag ginohob, kaba, yen yemaimo seiseij aud areg gecgu toua deitero. Doba yen yasid yenin aigus dau augwan gini namcir.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA