Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Intau inta mopirisaya kong ki Yesus tua in Raja Mopoposaḷamat inta namangoi nongkon i Allah, intau tatua ki adií i Allah. Intau inta motabi ko'i-Nia inta nopoaíngoi tua im motabibií doman ko'i-Nia inta namangoi nongkon i Allah.
2 Na'a in daḷan naton monota'au kong kita motabi ko'i adií mita i Allah: Kita motabi ko'i Allah bo motoindudui kom parentah-Nya mita.
3 Sin aka motabi ko'i Allah yo mustibií motoindudui kom parentah-Nya mita. Bo parentah-Nya mita diaíbií mobogat ko'i naton,
4 sim bayongan intau inta nobaliídon ki adií i Allah mokosanggupbií mita monaḷow kon dunia inta mora'at na'a. Bo tongaíbií pirisaya naton ko'i Tuhan tua im monaḷow kon in dunia na'a.
5 Ki ine degaí im mokotaḷow kon dunia na'a? Tongaíbií intau inta mopirisaya kong ki Yesus tua ing ki Adií i Allah.
6 Ki Yesus Kristus tuata inta namangoi kon dunia takin tubig inta pinobaptisan ko'i-Nia bo takin doman duguí kinopatoian-Nya. Sia namangoi de'emanbií tongaí takin tubig, ta'e takinbií tubig bo duguí. Bo Roho i Allah tontanií nobogoi ing kosaksian kon totu'ubií intua, sin Roho in diaíbií pernah monguboḷ.
7 Toḷu in saksi kon soroga, ki Amaí, Pirman bo Roho Mokudus. Toḷu tatua in notobatuíbií.
8 Toḷu doman in saksi kon dunia na'a, tuata in Roho i Allah, tubig bo duguí. Toḷu tatua komintan nobogoi ing kosaksian inta notongkai.
9 Kita mopirisayabií kong kosaksian intau, ta'e kosaksianbií i Allah im moropo-ropot kon tua. Bo tuata ing kosaksian inta ain inogoi i Allah soaáḷ ki Adií-Nya.
10 Tuamai, intau inta mopirisaya ko'i Adií i Allah ain notarima kong kosaksian tatua kom bonu ing ginanya; ta'e intau inta diaí mopirisaya ko'i Allah, inanggapnya ki Allah tua mo'uboḷ, sin diaí in sia mopirisaya kon onu inta pinoguman i Allah soaáḷ ki Adií-Nya.
11 Na'a ing kosaksian tatua: Ki Allah ain nobogoi ko'i naton ing kobiagan mopia bo mononoi, bo ki Adií-Nya tatua im pangkoi kobiagan tatua.
12 Intau inta mopirisaya ko'i Adií i Allah, moko'ulií kong kobiagan tatua; bo intau inta diaí mopirisaya ko'i Adií, diaíbií moko'ulií kong kobiagan tatua.
13 Pinaisku in na'a ko'i monimu inta ain nopirisaya ko'i Adií i Allah, simbaí kota'auandon monimu kon mo'ikow ain noko'ulií kong kobiagan mopia bo mononoi.
14 Bo kita im mobaranibií mayak kon tayowon i Allah, sim moyakinbií ing kita kon indongoganbií i Allah onu im pino'igum naton, aka inta pino'igum naton tua noyoka'an kon onu inta kino ibog-Nya.
15 Sing kinota'auandon naton kon indongogan-Nyabií ing kita aka mopo'igum ko'i-Nia, daí kinota'auan domandon naton kon ogoi-Nyabií onu inta aim pino'igum ko'i-Nia.
16 Aka mo'ikow bo moko'ontong kon tobatuí intau inta tumpaḷa Keresten nogaid kon dosa inta diaí mokopopisií kon intau tatua kobuliandon ing kobiagan inta mopia bo mononoi, yo mo'ikow musti mosambayang ko'i Allah; bo ki Allah mobogoibií ing kobiagan tatua ko'inia. Na'a in tongaíbií ko'i monia inta nogaid kon dosa inta diaí mokopopisií ko'i monia kobulian ing kobiagan tatua. Ta'e oyuíon in dosa inta mokopopisií kon intau kobulian ing kobiagan tatua. Aka kon soaáḷ tana'a yo aku'oi in diaíbií moguman ko'i monimu kom mo'ikow im musti mosambayang ko'i Allah.
17 Bayongan oaíid inta mo'itaḷaí in dosabií, ta'e oyuíon in dosa inta diaíbií mokopopisií kon intau tatua kobulian ing kobiagan mopia bo inta mononoi tua.
18 Kinota'auan naton kom bayongan intau inta ain nobalií ki adií mita i Allah, diaíbií umuran mogaid kon dosa, sing ki Adií i Allah umuran moḷukad ko'inia, bo ki Inta mora'at diaí mokopongonu ko'inia.
19 Kinota'auanbií naton kong kita na'a ing kapunya'anbií i Allah, umpakahbií komintan dunia kinawasa'andon i Inta Mora'at.
20 Kinota'auan bidon naton kong ki Adií i Allah ain namangoi bo ain nobogoi im pongortian ko'i naton, simbaí kota'auan naton ing ki Allah inta mobanar. Kita nobiag notobatuí takin i Allah inta mobanar tatua bo nobiag notobatuí takin i Adií-Nya ki Yesus Kristus. Na'adon ing ki Allah inta mobanar, bo na'adon ing kobiagan inta mopia bo mononoi.
21 Adiíku mita, mokopoyayukdon im mo'ikow kom berhala mita!
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA