Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 I sain mạngimang u Mawu Yesus e kai Ratun Sal᷊amatẹ̌ nikědon Mawu Ruata e, ute i sie anạ u Ruata. I saing kụkěndagu sěngkatau i amang ute mal᷊aing kụkěndagu anạ e.
2 Kai kere ini katatainge i kitẹ masingkạ u i kitẹ kụkěndagu manga anạ u Ruata: I kitẹ kụkěndagu Mawu Ruata ringangu tụtuhụ kal᷊awọu titan'E.
3 Batụu kuměndagu Ruata e mangal᷊ene tụtuhụ kal᷊awọu titan'E. Dingangu manga titan'E mahaěng bue si kitẹ,
4 batụu apan anạ u Ruata e makạbatạ dunia ral᷊aị ini. I kitẹ e měmatạ dunia e ringangu pěngangimang i kitẹ.
5 I sai kai makawatạ dunia e? Kětạbeng taumata kụ mangimang si Yesus Ahusu Ruata e.
6 Kai i Yesus Kristus e riměnta su dunia ringangu akẹ sasahani e ringangu rahang kapapohong'E. I Sie riměnta e wal᷊inewe kětạu ringangu akẹ sěmatang, kaiso kai ringangu akẹ dingangu raha. Mase Rohkẹ̌ u Ruata e sẹ̌sane nangonggọu sasahidi u ene e mambeng kahěngang, batụu Rohkẹ̌ e tawe mẹ̌kakakonti.
7 Kai piạ sahidi tatěllu: Rohkẹ̌ u Ruata, akẹ, dingangu raha -- i sire těllu mạngonggọu sasahidi mẹ̌sul᷊ung.
8 (5:7)
9 I kitẹ mangimang su sasahidin taumata, kaiso sasahidin Mawu Ruata e limembon lai katoghase. Kụ kai ene sasahidi kụ seng nionggọ u Mawu Ruata e mạanung Ahus'E.
10 Ual᷊ingu ene e, i sain mạngimang su Ahusu Ruata e, seng něnarimạ sasahidi ene su ral᷊ungu naunge; arawe i sain tawe mangimang su Mawu Ruata e, seng nẹ̌sipiru Ruata e kai tahakontiang, u i sie kai tawe mangimang apan nipěhengetangu Mawu Ruata e mạanung Ahus'E.
11 Kai ini sasahidi ene: Mawu Ruata e seng něngonggọ si kitẹ pẹ̌bawiahẹ̌ tutune ringangu kakalẹ̌, dingangu Ahus'E kai pungu pẹ̌bawiahẹ̌ e.
12 I saing mạnaghuang Ahusu Ruata, mạnaghuang pẹ̌bawiahẹ̌ ene: ringangu isain tawe managhuang si Sie, tawe managhuang pẹ̌bawiahẹ̌ ene.
13 Iạ manuratẹ̌ si kamene měmpạngimang Ahusu Ruata e, tadeạu i kamene masingkạu i kamene seng něnaghuang pẹ̌bawiahẹ̌ tutune ringangu kakalẹ̌.
14 Mase i kitẹ e ringangu karal᷊oahu naung mẹ̌těngon Mawu Ruata, ual᷊ingu i kitẹ e měngiakingu i Sie mamben tumuhụ apang kal᷊iomanengang i kitẹ e kereu piạ dorong i kitẹ e mẹ̌tatahinowe su kapulun'E.
15 Batụu i kitẹ masingkạ u i Sie rumaringihẹ̌ si kitẹ kereu i kitẹ e mẹ̌gẹ̌gausẹ̌ si Sie, tangu i kitẹ e mal᷊aing masingkạ u i Sie měngonggọ si kitẹ e apan dẹ̌dorongang i kitẹ si Sie.
16 Kereu i kitẹ makasilo sěngkatau wọu sěndinganeng i kitẹ lawọ tau Sahani e měkẹ̌koạ dosa kụ makakoạ i sie ta kailangengu pẹ̌bawiahẹ̌ tutune ringangu kakalẹ̌, ute i kamene pěmpẹ̌kal᷊iomanengke su Mawu Ruata; wọu ene Mawu Ruata e sarungbe měngonggọu pẹ̌bawiahẹ̌ ene si sie. Ini e nihinowe si sire apan dosane tawe makapẹ̌kapura si sire wọu pẹ̌bawiahẹ̌ tutune ringangu kakalẹ̌. Kutẹu kai piạ dosa makạkoạ sěbapẹ̌ u tau ene e kailangengu pẹ̌bawiahẹ̌ e. Kụ baụgu ene ute iạ e tawe nẹ̌berau i kamene harusẹ̌be pẹ̌kal᷊iomaneng su Mawu Ruata.
17 Patikụ kakanoạ ta nihino e kai rosa, kaiso piạbe rosa ta makal᷊ailang pẹ̌bawiahẹ̌ tutune ringangu kakalẹ̌ e.
18 I kitẹ e masingkạ u patikụ taumata apan seng nariadi manga anạ u Mawu e tawe měngkai hanesẹ̌ měbẹ̌baradosa, u Ahusu Ruata e měnaněntanude, dingangu i ral᷊aị e tawe makakoạ manga apa-apa si Sie.
19 I kitẹ e masingkạ u i kitẹ e kai tataghuanengu Mawu Ruata, manịeng kạguwạu dunia ini e su al᷊ungu kawasan dal᷊aị.
20 I kitẹ e masingkạ u Ahusu Ruata e seng diměnta ringangu seng nangonggọu tatahuěnna si kitẹ, tadeạu i kitẹ makakiral᷊a Ruata kahěngang. I kitẹ e mẹ̌biahẹ̌ nasěmbaụ dingangu Mawu Ruata kahěngang dingangu mẹ̌biahẹ̌ masěmbaụ dingangu Ahuse i Yesus Kristus. Kai ini e Ruata kahěngang dingangu kai ini e pẹ̌bawiahẹ̌ tutune ringangu kakalẹ̌.
21 Manga anạku, pěmpẹ̌teghang u mahang duata e!
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA