Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sebilang dengan saq percaye bahwe Deside Isa nike Almasih, dengan nike asalne lẽman Allah. Sai-sai saq ngasihin Allah, make ie ẽndah ngasihin dengan saq asalne lẽman Allah.

² Siq care niki ite nenaoq bahwe ite ngasihin bije-bije saq asalne lẽman Allah: Ite ngasihin Allah dait taat lẽq prẽntah-prẽntah-Ne.

³ Sẽngaq, kasih tipaq Allah artine: Bahwe ite taat lẽq prẽntah-prẽntah-Ne. Dait prẽntah-prẽntah-Ne nike ndẽqne berat umaq ite,

⁴ sẽngaq sai saq asalne lẽman Allah, ie ngalahang dunie. Niki kemenangan saq ngalahang dunie, nike imante.

⁵ Sai saq bau ngalahang dunie, selain dengan saq percaye bahwe Deside Isa nike Bije saq asalne lẽman Allah?

⁶ Niki Ie saq rauh ojok dunie siq aiq dait daraq, nike Deside Isa Almasih; ndẽqne siq aiq doang, laguq ẽndah siq daraq. Dait Roh Allah mẽsaq saq ngicanin kesaksian bahwe nike kenaq, sẽngaq Roh nike kebenaran.

⁷ Sẽngaq araq telu saksi lẽq dalem sorge: Bapa, Manik dait Roh Suci; dait ketelune nike sopoq.

⁸ Dait araq telu saq jari saksi lẽq gumi: Roh, aiq dait daraq, ketelune nike sopoq.

⁹ Ite percaye lẽq kesaksian manusie, laguq kesaksian Allah kuatan malik. Dait nike kesaksian saq sampun teicanin siq Allah mengenai Bije-Ne.

¹⁰ Keranaq nike, dengan saq percaye lẽq Bije saq asalne lẽman Allah, sampun nerimaq kesaksian nike lẽq dalem atẽne; laguq dengan saq ndẽq percaye tipaq Allah, sampun anggep bahwe Allah beduste, sẽngaq ie ndẽq percaye napi saq temanikang siq Allah mengenai Bije-Ne.

¹¹ Niki kesaksian nike: Allah sampun ngicanin ite idup sejati dait kekel, dait idup nike araq lẽq dalem Bije-Ne.

¹² Dengan saq bedowẽ Bije saq asalne lẽman Allah, bedowẽ idup nike; dait dengan saq ndẽq bedowẽ Bije saq asalne lẽman Allah nike, ndẽq bedowẽ idup nike.

¹³ Tiang nulis tipaq side pade, adẽq side pade saq percaye tipaq Bije saq asalne lẽman Allah, nenaoq bahwe side pade sampun bedowẽ idup sejati dait kekel.

¹⁴ Dait ite parek tipaq Allah siq keyakinan saq pasti, sẽngaq ite yakin Ie ngabulang do'ente, lamun ite tunas sopoq hal saq sesuai kance pekayunan-Ne.

¹⁵ Lamun ite nenaoq bahwe Ie mirengang ite dait napi saq ite tunas, make ite ẽndah nenaoq bahwe ite sampun nerimaq selapuq hal saq sampun ite tunas lẽman Ie.

¹⁶ Lamun side pade serioq salaq sopoq semeton seiman piaq dose saq ndẽq datengang kematẽan, side pade harus bedo'e tipaq Allah; dait Allah gen ngicanin ie idup nike. Hal niki berlaku tipaq ie pade saq dosene ndẽq datengang kematẽan. Laguq araq dose saq datengang kematẽan. Mengenai hal nike tiang ndẽq badaq bahwe side pade harus bedo'e tipaq Allah.

¹⁷ Selapuq kejahatan nike dose, laguq araq dose saq ndẽq datengang kematẽan.

¹⁸ Ite nenaoq bahwe selapuq dengan saq asalne lẽman Allah, ndẽq terus-terusan piaq dose, sẽngaq Bije saq asalne lẽman Allah ngelindungin ie, dait Si Jahat ndẽq bau piaq napi-napi lẽq ie.

¹⁹ Ite nenaoq bahwe ite dowẽn Allah, dait seantẽro dunie niki araq lẽq bawaq kekuasean Si Jahat.

²⁰ Ite nenaoq bahwe Bije saq asalne lẽman Allah sampun rauh dait sampun ngicanin ite pengertian, adẽq ite kenal kance Allah saq kenaq. Ite idup lẽq dalem Allah saq kenaq dait lẽq dalem Bije-Ne, Deside Isa Almasih. Ie Allah saq kenaq, dait idup sejati dait kekel.

²¹ Bije-bije tiang, jaoqang diriqde lẽman berhale-berhale!

1 Yohanes

Video 1 Yohanes 5

Ikuti Kami:

KONTAK | PARTISIPASI | DONASI