Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Niha si faduhu tõdõ wa Yesu no Razo Sangorifi si no Ifabu'u Lowalangi, ya'ia andrõ no Ono Lowalangi. Ba niha sangomasi'õ Ama, ba la'omasi'õ nono soroi Nama andrõ gõi.
2 Ba da'e aboto ba dõdõda wa no ta'omasi'õ nono Lowalangi, na no ta'omasi'õ Lowalangi ba ta'o'õ gamakhoita-Nia.
3 Bõrõ me fangomasi'õ Lowalangi andrõ no folo'õ amakhoita-Nia. Ba lõ abua khõda wolo'õ amakhoita-Nia andrõ,
4 bõrõ me dozi ono Lowalangi tola la'alani gulidanõ si lõ sõkhi andre. Ba ta'alani gulidanõ andre faoma famatida khõ Yesu Keriso.
5 Haniha zi tola mangalani fa'alõsõkhi gulidanõ? Ha niha si faduhu tõdõ wa Yesu andrõ Ono Lowalangi.
6 Yesu Keriso andrõ si mõi ba gulidanõ si fao idanõ wamayagõ Ya'ia ba faoma do wa'amate-Nia. Tohare Ia tenga ha faoma idanõ manõ, no faoma idanõ ba do. Ba Eheha Lowalangi zanguma'õ wa sindruhu da'e, bõrõ me Eheha andrõ lõ irai molau faya.
7 Tobali, so tõlu zamaduhu'õ:
8 Eheha Lowalangi, idanõ ba do -- no fagõlõ wamaduhu'õ zi tõlu andrõ.
9 Faduhu dõdõda ba wamaduhu'õ niha, ba abõlõ nasa wamaduhu'õ Lowalangi. Ba da'e wamaduhu'õ si no Ibe'e Lowalangi sanandrõsa khõ Nono-Nia.
10 Bõrõ da'õ, niha si faduhu tõdõ khõ Nono Lowalangi, no itema wamaduhu'õ da'e bakha ba dõdõnia; ba niha si lõ faduhu tõdõ khõ Lowalangi, no ibali'õ sofaya Lowalangi, bõrõ me lõ faduhu dõdõnia ba zi no Iforoma'õ Lowalangi sanandrõsa khõ Nono-Nia.
11 Da'e wamaduhu'õ andrõ: No Ibe'e khõda Lowalangi wa'auri sindruhu si lõ aetu, ba Ono-Nia gumbu wa'auri sindruhu si lõ aetu andrõ.
12 Niha sangokhõgõ Ono andrõ, so khõnia wa'auri si lõ aetu; ba niha si lõ mangokhõgõ Ono Lowalangi andrõ, ba lõ khõnia fa'auri.
13 Ba khõmi si faduhu tõdõ khõ Nono Lowalangi, usura da'e ena'õ aboto ba dõdõmi wa no so khõmi wa'auri si lõ aetu andrõ.
14 Ba lõ ata'u ita wangondrasi Lowalangi, bõrõ me Ifondrondrongo ero so gangandrõw̃ada, niw̃a'õda khõ-Nia molo'õ somasi Ia.
15 Me no aboto ba dõdõda wa Ifondrondrongo ita na ta'andrõ khõ-Nia, ba aboto ba dõdõda gõi wa no tebe'e khõda ni'andrõda moroi khõ-Nia.
16 Na mi'ila so fa samõsa nawõmi Niha Keriso zamalua horõ si lõ molualua fa'amate, ba ya mangandrõ ami khõ Lowalangi; ba Ibe'e dania wa'auri Lowalangi ba niha andrõ. Faudu da'e khõra si so horõ si lõ molualua fa'amate. Ba samalua horõ solualua fa'amate, ba lõ uw̃a'õ wa lõ tola lõ mangandrõ ami khõ Lowalangi sanandrõsa ba horõ andrõ.
17 Fefu gamuata si lõ sõkhi ba no horõ, ba hiza so horõ si lõ molualua fa'amate.
18 No aboto ba dõdõda wa niha si no tobali Ono Lowalangi lõ latohugõ wamazõkhi horõ, bõrõ me Ono Lowalangi zolumõ'õ ya'ia, ba salaw̃a zi lõ sõkhi andrõ tebai ifalua hadia ia khõnia.
19 No aboto ba dõdõda wa no okhõta Lowalangi ita, hew̃a'ae barõ wa'abõlõ zalaw̃a si lõ sõkhi so gulidanõ andre ma'afefu.
20 No aboto ba dõdõda wa no tohare ba gulidanõ Nono Lowalangi. No Ibe'e khõda wa'aboto ba dõdõ, ena'õ aboto ba dõdõda Lowalangi Sindruhu andrõ. Fa'aurida no ha sambua khõ Lowalangi Sindruhu andrõ ba khõ Nono-Nia Yesu Keriso. Ya'ia andre Lowalangi Sindruhu, ba Ya'ia gõi wa'auri Sindruhu si lõ aetu.
21 He ya'ami iraonogu, mi'arõu'õ ami moroi ba ngawalõ nadu andrõ!
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA