Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Wali bara sema tau to mangaya i Yesu Ia semo Kerisitu, Makole Parajanji i mPue Allah, tau etu roomo mawali ana i mPue Allah. Wali ane tau to roomo mawali ana i mPue Allah, tau etu mamporayang i Pue Allah, Pa'a. Pasi ane ia mamporayang i Pue Allah, matantu ia damamporayang seja yununya to ngana i mPue Allah.

² Wali wimba kita mangansani kita monso pu’u mamporayang yunu ngkita to ngana i mPue Allah? Ewa si’i, kita mangansani kita mamporayang sira ane kita mamporayang i Pue Allah, pasi mampalaika porentaNya. Pasi ane kita mamporayang i Pue Allah, ane ewa see porentaNya etu taa masuli rapalaika.

³ (5:2)

⁴ Wali kamonsonya boros anu to maja’a ri lino si’i to rani mangantalas kita see kita taa mampalaika i Pue Allah. Pei ne’e mangkalingan, kita ngana i mPue Allah. Kita tau to mangaya i Yesu Ia Ana i mPue Allah! Wali apa saba pangayanta etu, see naka kita re’e kuasa manganangi anu to maja’a to re’e ri lino etu. See naka kita tiroowa maya mampolaika i Pue Allah. Wali matao kita mampalaika porenta i mPue Allah see mampakanasa pamporayangnta resi Ia pasi resi yununta to nganaNya.

⁵ (5:4)

⁶ Wali i Yesu Kerisitu anu nama'i ri lino si'i, Ia monso pu’u Ana i mPue Allah. Manasa resi kita Ia Ana i mPue Allah apa re’e matamanasa to mampakatantuka kita. Apa tempo Ia ma’i etu Ia mangika palaong to nato’oka mPa’aNya Ia mangika, mula yako ri tempo Ia rabaptisika ue rataka ri tempo raaNya tiwubu tempo Ia mate. Wali ue tempo Ia rabaptis etu to mampakanasaka kita i Yesu semo Ana i mPue Allah, pasi raaNya seja tempo Ia mate, raa etu mampakanasaka seja kita. Wali monso pu’u ewa wetu apa ewa wetu semo to nato’oka i Nosa Mapasing kita, pei i Nosa Mapasing sangkani manganto'o anu to monso. Wali togo matamanasa to re'e ri lino. Etu semo i Nosa Mapasing, ue, pasi raa. Pei matamanasa to togo etu samparia singkonong i Yesu Ia Ana i mPue Allah. Panewa re'e wo’u togo matamanasa ndate saruga mangkonong i Kerisitu. Etu semo i Pue Allah, Pa'a, pasi i Tuntu i mPue Allah, pasi i Nosa Mapasing. Matamanasa to togo etu samba'aja. Wali samparia matamanasa to etu mampakanasaka kita i Yesu monso pu’u Ana i mPue Allah.

⁷ (5:6)

⁸ (5:6)

⁹ Wali ane re'e yunu ngkita to lino to mawali matamanasa mangkonong palaong to mawali, kita mangaya gombo ntau etu. Pei i Pue Allah semo to mawali matamanasa to manganto'oka kita mangkonong i Pue Yesu Ia semo AnaNya. Wali masipato kojo kita mangaya gomboNya etu apa Ia semo matamanasa to monsomonso wo'u pei matamanasa to lino.

¹⁰ Wali tau to mansarumaka Ana i mPue Allah, tau etu manasa kojo ri rayanya monso pu'u i Yesu semo Ana i mPue Allah. Pei tau to taa mangaya i Pue Allah, tau etu sewaju pei manganto'o i Pue Allah mawuti, apa ia taa naaya kareba to nato'o i mPue Allah mangkonong AnaNya.

¹¹ Wali si'i semo kareba etu: I Pue Allah roomo mangawaika kita katuwu to singkasaenya, pasi AnaNya semo pu'u ngkatuwu etu.

¹² Wali i sema-sema tau to re'e Ana i mPue Allah resi ia, tau etu re'e seja katuwu to etu. Pei tau to tare Ana i mPue Allah resi ia, tau etu tare katuwunya to etu. Wali to tao-tao kita mangaya anu to etu mangkonong Ana i mPue Allah, apa i Pue Allah semo matamanasa mpalaong to etu, pasi Ia masipato rasarumaka.

¹³ Wali aku kunsani komi roomo mangaya kuasa nu Ana i mPue Allah. Pei aku tiroowa mangantulisika komi sura si’i see damanasa ngkomi saba yako pangayang komi Ia, re’emo katuwu to singkasaenya resi komi. Pasi aku mangantulisika komi sura si’i see tare pandoonya komi mangaya Ia.

¹⁴ Wali kita tamo bata-bata rayanta mampotango i Pue Allah. Apa kita tansani nempo bara kesaa to kita mamporapika resi i Pue Allah, ane kita marapi singkonong pei pamporani to si Ia, ane ewa see Ia damampodongeka pokai-kai ngkita etu.

¹⁵ Pasi saba kita mangansani Ia mampodongeka bara kesaa to naporapi ngkita etu, see naka kita matantu seja Ia damangawaika kita anu to naporapi ngkita etu.

¹⁶ Wali i sema-sema tau to mangkita a'inya to samba'a pangaya to mangika dosa, pei tawa sampe mate, ane ewa see to tao-tao ia makai-kai resi i Pue Allah mampokaikaika a'inya etu. Wali i Pue Allah semo damangansawang tau etu see ia taa damate. Pei re'e seja dosa to mate tau mangika, wali si'a palaong to etu to kuto'oka komi mangampokaikaika.

¹⁷ Kamonsonya samparia palaong to taa singkonong pei i Pue Allah paka dosa. Pei taa samparia dosa to naika ntau to mangaya to mate tau mangika. Wali masipato kita mampokaikaika pua’i ngkita to samba’a pangaya ane sira mangika dosa pei tau etu tawa namate yau.

¹⁸ Wali kita tansani i semasema tau to nawaika i mPue Allah katuwu to bou pasi to maroo masingkatao pei Ia, tau etu taa mangika dosa. Pasi tau etu, katuwunya nararamaka kojo i Yesu, Ana i mPue Allah, see naka tare to maya danaika i ngKepala nto pantipu resi ia.

¹⁹ Pasi kita tansani seja kita i Pue Allah Puenya. Pei samparia to lino to taa mangaya, sira paka nakuasang i ngKepala nto pantipu.

²⁰ Pasi kita tansani seja Ana i mPue Allah nama'imo. Pasi Ia roomo mampakanasaka kita see naka kita maya mangansani i Pue Allah to monso. Wali kita roomo mawali samba'a resi i Pue Allah to monso etu apa kita samba'a pei AnaNya, i Yesu Kerisitu. Ia semo i Allah to monso pasi Ia semo pu'u ngkatuwu to singkasaenya. Wali see naka masipato kita tuwu masingkatao pei Ia.

²¹ Wali ngana-ngana, pakatao kojo naka ne'e komi mampue resi tau-tau. Wali ungkanyamo ruyu gombongku si'i.

1 Yohanes

Video 1 Yohanes 5

Ikuti Kami:

KONTAK | PARTISIPASI | DONASI