Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'O nyawa gee yongaku-ngaku 'ato 'o Yesus ge'ena ma Koana Wiiri-iriki gee ma Jo'oungu ma Dutu wosijajiokau, 'ona ge'ena ma Jo'oungu ma Dutu 'awi ngowa-ngowaka. 'O nyawa gee wisibosono 'o dea wimoi, ge'ena wisibosono 'awi ngowaika mita.

² Nanedau ma no-nako ngone panako 'ato ngone posibosono ma Jo'oungu ma Dutu 'awi ngowa-ngowaka, ge'ena la: Ngone powisibosono ma Jo'oungu ma Dutu, de pamoteke 'awi besesongo.

³ Sababu powisibosono ma Jo'oungu ma Dutu ge'ena ma ngale posingounu 'awi besesongo, de 'awi besesongo ge'ena nako ngone ge'ena pamao koitubusowa.

⁴ Sababu 'iso de ma Jo'oungu ma Dutuou 'awi ngowa-ngowaka ge'ena pa'akunu 'o dorou 'o duniaka ne'ena palawani. De ngone pa'akunu palawani ge'ena sababu de nanga ngo-ngaku.

⁵ Nago'ona ya'akunu 'o dunia yosikala? Duga ka gee yongaku-ngaku 'ato 'o Yesus ge'ena ma Jo'oungu ma Dutu 'awi Ngowaka.

⁶ Ma Yesus Kristusou gee woboakau 'o duniano de wi'osiki de 'o 'akere, de 'awi 'aunu 'i'uisokau ma 'orasi wosongene. 'Una woboano duga ka de 'o 'akeruwa wisi'osiki ma 'ena de wi 'aunu 'i'uisi gedagee ma 'orasi wosongene. De 'o Ngomasa 'Itebi-tebini ma sirete 'isakisii 'ato ge'ena ma goungu, sababu 'o Ngomasa 'Itebi-tebini ge'ena koielu-elukuwa.

⁷ Naga 'o sakisii 'o ngai sa'ange: 'O Ngomasa 'Itebi-tebini, 'o 'akere, de 'o 'aunu. 'O ngai sa'ange ge'ena 'isisakisii kaimatero.

⁸ (5:7)

⁹ Ngone pangaku 'o nyawa manga sakisii, ma to ma Jo'oungu ma Dutuosi 'ifoloi 'ikuata. De ge'enau 'o sakisii gee ma Jo'oungu ma Dutu wokulakau ge'ena la 'awi Ngowaka.

¹⁰ Sababu ge'ena, 'o nyawa gee yongaku-ngaku ma Jo'oungu ma Dutu 'awi Ngowaika, 'o sakisii ge'ena ya'esenou manga singinaka. Ma 'o nyawa gee kowingakuwa ma Jo'oungu ma Dutu, yamaoku ma Jo'oungu ma Dutu ge'ena 'isoka woelu-eluku, sababu 'ona koyongakuwa 'okia naga wosidemokau ge'ena la 'awi Ngowaka.

¹¹ Nedau ma sakisii ge'ena: Ma Jo'oungu ma Dutu wonakulakau 'o 'ahu kaisi'ado-'adonika, de 'awi Ngowaka gu'una 'o 'ahu ma titi.

¹² Nago'ona wika'elino ma Jo'oungu ma Dutu 'awi Ngowaka, 'ona yamake 'o 'ahu kaisi'ado-'adonika; de nago'ona kowika'elinowa ma Jo'oungu ma Dutu wi Ngowaka, 'onaka koi'iwa 'o 'ahu ge'ena.

¹³ Ngoi tinidutulisi nginika gee niongaku-ngaku ma Jo'oungu ma Dutu 'awi Ngowaika, la ngini nianako 'ato ngini niamakekau 'o 'ahu kaisi'ado-'adonika.

¹⁴ De ngone pomoroini potaari ma Jo'oungu ma Dutuka, sababu ngone panakokau 'una wosigisene nanga lahidoa nako la ngone pomaga'asoko 'o kianikia bato gee moteke to 'una 'awi mau.

¹⁵ Sababu ngone panakokau 'una wosigisene nako ngone pomasiga'asoko 'unaka, so ngone panako mita 'ato 'una wonakula 'okia naga gee pomaga'asoko 'unano.

¹⁶ Nago'ona yakimake manga 'esa moi yosowono ma sigado koitoakuwa manga 'ahu de ma Jo'oungu ma Dutu, ge'ena salingou niakisilahidoa ma Jo'oungu ma Dutude. De dua 'una 'asa wakikula la ma gou-goungu yo'ahu de ma Jo'oungu ma Dutu. Ne'ena ge'ena 'o nyawa yosowono sigado koiisanguwa manga 'ahu ge'ena. Ma de ma 'ena 'o sowono gee ma duanguku 'o songene. Ma hali ge'ena ngoi kotosulokuwa 'ato ngini salingou niolahidoa ma Jo'oungu ma Dutude.

¹⁷ 'Iodumu pokadi-diai gee koyadae-daenuwa ge'ena 'o sowono. Ma naga 'o so-sowono gee koyatoakuwa kaisi'ado-'adonika nanga 'ahu de ma Jo'oungu ma Dutu so ma duanguku ko 'o songenuwa.

¹⁸ Ngone panakokau, 'o nyawa 'iodumu gee yodadiokau ma Jo'oungu ma Dutu 'awi ngowa-ngowaka, koitaurikawa 'o sowono yodiai, sababu ma Jo'oungu ma Dutu 'awi ngowaka wakijaga, so Wosito-torou gee koimado-do'oawa 'onaka.

¹⁹ Ngone panakokau 'ato ngone ne'ena ma Jo'oungu ma Dutu 'awi kawasa, de 'o duniaka ne'ena 'o nyawa gee kowimote-motekuwa ma Jo'oungu ma Dutu yoodumu 'o Tokata ma Koana yakiparetanou.

²⁰ Ngone panakokau 'ato ma Jo'oungu ma Dutu 'awi Ngowaka woboakau de wonasisahekau la ngone powinako ma Jo'oungu ma Dutu. Ngone po'ahu de de 'una sababu po'ahu de 'awi Ngowaka ma Yesus Kristus. Nu'unau ma Jo'oungu ma Dutu de nu'unau 'o 'ahu 'ika-kakali ma titi.

²¹ 'Ai ngowa-ngowaka, 'uwa niasuba 'o patongo gee yadiai manga jou.

1 Yohanes

Video 1 Yohanes 5

Ikuti Kami:

KONTAK | PARTISIPASI | DONASI