Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'Esa moi riaka dodotoka 'o ngo-ngaku moi! Ngini salingou niongano-nganono 'okia naga gee 'idadi-dadiokau nanga edete de nanga dotumoka ma 'orasi 'ona 'o Musa wimoteke. 'Ona yoodumu ma Jo'oungu ma Dutu wakisi'asa ma no-nako 'o lobi manga dekude, de koyakido'oawa yatoaka 'o Ngooto 'Ite-tereboko.

² Ma ngale yodadi 'o Musa wimoteke-moteke, 'ona yoodumu matero kayaki'osikokau 'o lobi ma dodaka de ge'ena ma ngootoka.

³ 'Ona yoodumu ya'odomo 'o 'inomo kaimatero, ge'ena la ma Jo'oungu ma Dutuno ma ngekomo 'awi kuasa, de 'ona yoodumu ya'okere 'o 'akere kaimatero ge'ena la 'o 'akere gee ma Jo'oungu ma Dutu wosisupuno 'o teto 'igi-gigieno gee naga de de 'ona. 'O teto 'igi-gigie ge'ena la ma Kristus ma sirete.

⁴ (10:3)

⁵ Ngaro koge'ena ma, ma Jo'oungu ma Dutu kowosanangiwa manga gudaika, ge'enau so manga songene kaipoadeu 'o tonaka 'ika-kakasaka.

⁶ 'Iodumu ge'ena 'imadadi to ngone nanga kasinaa, ma ngale 'inasinganono la 'uwa poduaka 'okia sonaa 'ito-torou 'isoka 'ona yodi-diai.

⁷ Mita la 'uwa ngone pasuba 'o barahala 'isoka gee 'onaka munuka. 'O Buku 'Itebi-tebinoka 'isilefoku, "So ma nyawa-nyawa go'ona yo'odomo de yo'okere de yoroge, ma ngale yasuba 'o barahala."

⁸ Ngone koidadiwa podiai 'okia sonaa 'imedi-mediri 'isoka gee 'onaka munuka yodi-diai. Sababu 'ona yacaana monaoko de sa'ange yosongene kage'ena ma wange, ngano ge'enau yadiai.

⁹ Ngone koidadiwa powitai-taili ma Jou 'isoka gee ma sira 'onaka munuka, so ma rai 'ona yosongene 'o ngia 'ibisa-bisa yakituduku.

¹⁰ Ngone koidadiwa pokurubungu 'isoka gee 'ona ma sira munuka, so 'o songene ma mala'ekati yakito'omaka.

¹¹ 'Okia sonaa 'iodumu gee 'idadi-dadi 'onaka, 'imadadi 'o kasinaa. De ge'ena 'iodumu 'ilefoku la pongano-nganono, sababu ngone ne'ena po'ahu 'o dunia ma do-dogumu ma 'orasioka.

¹² Sababu ge'ena 'o nyawa gee yoma-maoku yokuatokau, tanu yomasitiari 'uwa sigado yootaka.

¹³ 'O bo-baja 'iodumu gee nidutu-dutuku, ge'ena 'o bo-baja gee biasau 'o nyawa yakidutu-dutuku. Ma ma Jo'oungu ma Dutu waga-gao 'awi jaji. 'Una 'asa kowinisipidilikawa ngini nitaili 'ifoloika de to ngini nia guata. Ma 'orasi ngini nidoboa 'o bo-baja, 'una 'asa winikula 'o ngekomo ma ngale niokuata la ngini 'idadi niotongosono.

¹⁴ Sababu ge'ena 'Esa moi riaka dodoto ka 'o ngo-ngaku moi tinisiboso-bosono, tanu ngini nimasikurutu 'o barahala.

¹⁵ Ngoi tinisitotara naneda, sababu ngoi tamaoku ngini ge'ena 'o nyawa yoba-barija. So tanu ngini ma sirete niatiba-tibangi 'ai demo ne'ena.

¹⁶ Gee ngone 'o Ngodomo 'Itebi-tebini podiai ma ngale posingano-nganonie ma Kristus wosongene, ma 'orasi ge'ena po'amalaha ma Jo'oungu ma Dutuka de 'o 'anggur po'okere de 'o roti posibula-bula. Ge'ena ma ngale ngone poodumu pomarimoi de ma Kristus sababu 'awi 'aunu 'ipoa de 'awi roese wosisarakaniokau wiso-songene, ge'ena ma ngale wonatuusu 'o sowonoka.

¹⁷ Sababu ma roti ka ngai moioka ge'ena la ma Kristus 'awi roese, de ngone poodumu kage'ena pori'odomo, so ngone poku-kudai ne'ena ge'ena 'isoka 'o roese moi.

¹⁸ Kaniakimake 'o Yahudioka, gee ya'odo-'odomo 'o 'inomo 'isisuba-subakau ma Jo'oungu ma Dutuka 'o su-suba ma ngii ma dekuoka, 'ona ge'ena yodadi ka 'o singina moi wisuba ma Jo'oungu ma Dutu.

¹⁹ 'Ai demo ne'ena ma dumutu ge'ena la: 'O barahala bolo 'o 'inomo gee 'isisubakau 'o barahalaka ge'ena ma faedaa ka ma eta ma koi'iwa.

²⁰ 'Okia naga gee yosisuba 'o barahalaka 'o su-suba ma ngiioka, ge'ena ko ma Jo'oungu ma Dutukawa yosisuba so 'ena 'o tokatika. De ngoi tooluku ngini nimarimoi de 'o tokata.

²¹ Ngini koidadiwa niosido'okere 'o 'anggur gee powisingano-nganono ma Kristus wosongene ma ngale pomarimoi de de 'una de 'o 'anggur gee 'o barahalaka yosisuba-suba ma ngale yomarimoi de 'o tokata. Ngini koidadiwa nio'odomo ma Jou wi Ngodomo 'Itebi-tebini ma ngiioka de mita nio'odomo 'o tokata ma ngodomo ma ngiioka.

²² Ngone koidadiwa podiai ma Jou witu'uduku! Ngone de ma Jou ge'ena ma Jou 'ifoloi wokuata.

²³ 'O nyawa yongose 'ato, "'O sagala moi-moi kaidadi podiai moteke ngone." Ge'ena ma goungu. Duga koiodumuwa padi-diai ge'ena de ma faedaaka. Bolo yongose 'ato, "Ngone kaidadi podiai 'okia naga bato moteke ngone." Ma koiodumuwa ge'ena nanga ngo-ngaku yosikuata.

²⁴ Ka moi ma koya'akunuwa nimariwo duga ko to ngini ma sirete nia paraluu. 'O nyawa 'isinoimi salingou yomariwo ma ngale 'o nyawa 'iregu manga paraluu.

²⁵ Ngini kaidadi nia'odomo 'o siode 'okia naga bato gee 'o siode yowuku-wukunu ma ngiioka. 'Uwau niosanosi 'ato 'o siode ge'ena 'isisubakau 'o barahalaka bolo ko'uwa. Nio'odomo 'o siode ge'ena 'uwau niamaoku nia singina 'itubuso.

²⁶ Sababu 'o Buku 'Itebi-tebinoka 'isilefoku, "'O dunia ne'ena de ma doda 'iodumu ge'ena to ma Jou."

²⁷ Nako 'o nyawa koyongaku-ngakuwa ni'asoko nio'odomo de ngini niomodeke, ge'ena kanio'odomo 'okia naga gee nidonoaku. 'Uwau nialega ma diai kiano 'o 'inomo ge'ena, la 'uwa nia singinaka 'itubuso.

²⁸ Ma nako naga 'o nyawa yongose nginika, "'O 'inomo ne'ena 'isisubakau 'o barahalaka," ge'ena 'uwa nia'odomo ma ngale niakitibangi 'o nyawa go'ona de manga singina ma dubuso.

²⁹ 'Ai dumutu ge'ena ko to nginiwa nia singina ma mau, ma to nyawa go'ona. Poilia munuka naga yosano, "Tei, 'ido'oa so to ngoi 'ai mau de salingou 'o nyawa 'iregu manga singina ma mau 'i'aturu?

³⁰ Nako ngoi 'o 'inomo ta'odomo de to'amalahakasi ma Jo'oungu ma Dutuka, 'ido'oa so 'o nyawa salingou 'inasigurubungu sababu ma 'inomo ge'ena, 'ena momongo ngoi tosi'amalahakau ma Jo'oungu ma Dutuka?"

³¹ 'Okia naga bato ngini niadiai, nia'odomo, bolo nia'okere, 'iodumu ge'ena ma dumutu la 'o nyawa wisiarene ma Jo'oungu ma Dutu.

³² Nio'ahu nimasidi-diai la 'uwa sigado ma sababu ngini so 'o nyawa 'iregu yosowono, 'uwa sigado 'o Yahudioka bolo ko 'o Yahudiokawa, bolo ma Jo'oungu ma Dutu 'awi jamati yosowono.

³³ Nio'ahu 'isoka ngoi. Ngoi tomariwo tosisanangi 'o nyawa 'iodumu manga singina naga 'o sagala moi-moioka, koi'iwa 'ai dumutu ma ngale ka to ngoi ma sirete 'ai paraluu. To ngoi 'ai dumutu ge'ena duga tomau 'ona yoodumu 'idadi yakisilaha.

1 Korintus

Video 1 Korintus 10

Ikuti Kami:

KONTAK | PARTISIPASI | DONASI