Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ O senina-senina, ateku gelah iingetndu kerna kai si nggo jadi nai man nini-nininta asum ia ngikutken Musa. Kerina ia nai ipinpin binangun embun janah terkelin ia kerina ngepari Lawit Merah.

² I bas embun dingen i bas lawit e kerina ia tempa-tempa iperidiken jadi pengikut-pengikut Musa.

³ Kerina ia man pangan pertendin si seri, dingen minem inemen pertendin si seri.

⁴ Kerina ia minem i bas batu pertendin nari, eme batu si nemani ia; batu e Kristus kap.

⁵ Tapi amin bage gia, nterem nge ia si la ngena ate Dibata, janah perban si e nge maka merapen bangkena i gurun pasir.

⁶ Kerina si enda jadi usihen man banta, mpersingeti kita gelah ula jahat sura-suranta bagi si ilakoken nininta nai.

⁷ Bage pe gelah ula sisembah berhala-berhala bagi si ilakoken piga-piga nininta nai. I bas Pustaka Si Badia lit tersurat, "Bangsa e kundul guna man-minem, jenari tedis ia landek murjah-urjah."

⁸ Ula kita erlua-lua bagi si ilakoken piga-piga nini-nininta nai, seh maka i bas sada wari lit dua pulu telu ribu kalak ia radas mate.

⁹ Ula sicubai Tuhan bagi si ibahan piga-piga nininta nai, seh maka mate ia itagut nipe.

¹⁰ Ula kita jungut-jungut, bagi si ibahan piga-piga nininta nai, seh maka ikernepken Malekat Kematen ia.

¹¹ Kerina si jadi man bana e jadi pelajaren, janah kerina si enda isuratken gelah jadi pertenget man banta. Sabap genduari kita nggeluh i bas paksa pendungi jaman.

¹² Kalak si erpengakap maka ia nteguh pertedisna, ulin me ia metenget gelah ula ia guling.

¹³ Kerina percuban si reh man bandu e bali nge biakna ras percuban si biasa seh man manusia si deban. Tapi Dibata setia nge i bas PadanNa. Labo IpelepasNa kam icubai lebih asa gegehndu. Asum kam ngenanami percuban, IberekenNa nge gegeh man bandu gelah ngasup kam nggengkenca, janah radu ras si e IberekenNa pe dalan pulah.

¹⁴ Emaka o senina-senina si kukelengi, kiamkenlah, ula kal sembah berhala-berhala.

¹⁵ Aku ngerana man bandu bagi man kalak si pentar. Timbanglah kai si kukataken man bandu.

¹⁶ Asum siinem lau anggur tare calung si nggo ipasu-pasu alu ngataken bujur man Dibata, ma kin e nuduhken maka kita dat bagin i bas dareh Kristus? Janah asum sicepik-cepik roti guna ipan ras-ras, ma kin e nuduhken maka kita dat bagin i bas kula Kristus?

¹⁷ Erdandanken sada nge roti e, emaka kerina kita, aminna pe nterem, sada kula nge, sabap kerina kita dat bagin i bas roti si sada e.

¹⁸ Perdiatekenlah kalak Israel secara manusia; kalak si man pangan si nggo ipersembahken i babo batar-batar ikut i bas persadan ras si man sembahen e.

¹⁹ Adi bage, kai kin si kumaksud? Nggo kin berhalan pangan si ipersembahken man berhala e? Lit kin si tuhuna berhala e?

²⁰ Tentu lang! Dage si kumaksud eme kai si ipersembahken i babo batar-batar persembahen berhala, labo ipersembahken man Dibata, tapi man setan-setan nge. Janah ateku min ula kam ersada ras setan e.

²¹ La banci kam minem tare calung Tuhan jenari minem ka tare calung setan. La banci kam man i bas meja Tuhan jenari man ka i bas meja setan-setan.

²² Ntah ateta kin maka mecimberu Tuhan e? Ntah kin siakap maka gegehen kita asangken Tuhan e?

²³ Lit kalak ngatakenca, "Kai pe banci ilakoken." Tuhu, tapi labo kerina erguna. "Kai pe banci ilakoken," tapi labo kerina pehuliken.

²⁴ Ula ise pe ngukuri untung man bana saja, tapi inget pe ngukuri untung kalak si deban.

²⁵ Kerina daging si idayaken i tiga banci ipanndu alu la pada nungkun-nungkun i bas pusuh peratenndu.

²⁶ Sabap i bas Pustaka Si Badia lit tersurat, "Doni enda ras kerina isina Tuhan empuna."

²⁷ Adi sekalak si la tek man Jesus Kristus ndilo kam man ras-ras, janah tetap ukurndu ndahisa, panlah kai si idangkenna man bandu alu la pada nungkun-nungkun pusuhndu.

²⁸ Tapi adi lit kalak si ngatakenca man bandu, "Pangan enda nggo ipersembahken man berhala," ula pan pangan e erkiteken kalak si ngatakenca man bandu e dingen erkite-kiteken penggejapen i bas pusuh si la tetap. --

²⁹ Labo penggejapenndu, tapi penggejapen kalak si ngatakenca man bandu e. Banci jadi lit kam ngataken, "Ngkai maka penggejapen kalak si deban jadi hakim nandangi kebebasenku?

³⁰ Adi ngataken bujur nge aku man Dibata kerna pangan e, ngkai maka ipandang kalak aku, sedangken kukataken nge bujur man Dibata kerna pangan e?"

³¹ Dage kerina si ilakokenndu, subuk pangan ntah inemen, bahanlah si e kerina tama kemulian man Dibata.

³² Ula ibahanndu kitik ukur kalak, subuk kalak Jahudi ntah kalak perbegu ntah pe perpulungen Dibata.

³³ Bagi aku, kupala-palai erbahan si ngena ate kalak kerina i bas kerina si kubahan. Labo keuntungenku si kudarami, tapi keuntungen kalak si nterem, gelah ia terkelin.

1 Korintus

Video 1 Korintus 10

Ikuti Kami:

KONTAK | PARTISIPASI | DONASI