Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Terang a valing averi! Yaꞌa ini Paulus inak ma mingnanang afa ovi rvotuk roak verin ubud-nusid ra, naꞌut i rovu vali Musa. Naꞌut inyai, na Ubu nala mutan ma nteri ira, ovu vali rban-etal tahat i rfanara ia ne Tahat Valvulin, ovu lolin watan.
2 Tamata Yahudi avyai munuk lahir wean i rbaptis roak ira naꞌa mutan ralan a, ovu vali naꞌa tahat yai ralan a. Afa yai nfaturu ne, rorang roak Musa i nban-ulu verin ira munuk.
3 Ira munuk raꞌan afamtahan ovi Ubu Ni Roh nala verin ira ovu Ni ngrebat a. Afamtahan avyai, wear isa munuk.
4 Ira munuk renu vali wear i Ubu Ni Roh nala verin ira. Wear yai nava tali vatminan i nfatuang ira naꞌa rira banbanan a. Vatminan yai nfaturu lahir Kristus i nfatuang ira, ovu nfangora rira vavaꞌat ra ovu afa ovi rala al rvaꞌat a.
5 Velik ne wean urun inyai, naꞌuk etal dawan tali ira, rira afa ovi rotu ra notu ma Ubu nangrova urun. Wean inyai bi, etal dawan a rmata ma rtuba tia ma watan naꞌa wan lean vu dawan.
6 Terang a valing averi! Afa avyai munuk rvotuk roak verin tamata Yahudi ra ma al nfangnanang ita ovu nair ita, boma deka tot-orang dida ininan sian i wean lan a ira rotu.
7 Tamata boku tali ira rsoak nulu walut ra, naꞌuk ita deka tot-orang ira wean inyai. Wean i rtulis roak naꞌa Surat Ralan ne, “Bangsa yai ni tamata ra rdoku ma rafnaꞌan ovu rafnenu, beti rdiri ma rsoꞌi-rsomar al rsoak nulu rira walut ra.”
8 Tamata boku tali ira rsifa tia ma watan ovu tamata ovi wol awarira verin ira, naꞌuk ita wol bisma tot-orang ira. Rira afa i rotu yai, notu ma tamata rivun vutrua rahin itelu rmata fasa lahir naꞌa amar isa.
9 Tamata boku vali tali ira rlabir teman Duilaꞌa, ba nifa ovi rira bisa dawan urun a rkokat fedan munuk lahir ira. Ba ita wol bisma tot-orang ira.
10 Tamata boku vali tali ira rafngamuꞌur, ba Ubu nsinir Ni sansinir tali lanit ratan i ntaha matmatan a, ma nfedan ira. Ba ita wol bisma tfangamuꞌur wean ira.
11 Afa avyai rkena munuk roak ira ma naꞌa faneak verin ita. Rtulis munuk roak afa avyai ma al nfangnanang ita, tevek fiang ini tvaꞌat naꞌa amar ovi lanit ivavan a mane namwear roak.
12 Ba tamata inorang iki watan nanovak ne, ni inorang a nangrebat roak, na musti nsiꞌik wan ma lolin, boma deka nleka naꞌa salasilan ra.
13 Mingnanang ne, angangal ovi mtyuan ra mane rfaleka watan mia, wean watan angangal ovi tamata ra baꞌi rtuan. Naꞌuk angangal avyai veka wol rlia bira ngrebat ra, tevek Ubu notu lalawatan afa ovi nfalak naꞌa Ni tnorung ra ma nlobang mia. Naꞌut i angangal a nma ma nkena mia, na Ia veka nala lingaꞌan verin mia, boma bisma byar-nala angangal avyai.
14 Ba terang a valing ovi ulobang urun mia, deka msyoak nulu walut ra.
15 Yaꞌa ungrihi verin mia, wean watan i ungrihi verin tamata ovi rkaꞌa ma rfikir ma lolin. Era ma kaꞌi minovak naꞌa afa ovi ufalak ini.
16 Naꞌut i tala kobi i nsaꞌa anggur a ma tenu al tangnanang Kristus laran i nvoak naꞌa aa walwalur a, na ita tfalak fara weninyai verin Ubu. Inyai nfaturu roak ne, isa roak ita ovu Kristus i nmata al nakvanak ita. Naꞌut i tsiduk roti ma itmunuk taꞌan, na inyai nfaturu roak ne, isa roak ita ovu Kristus tenan a.
17 Ita munuk tsiduk roti isa watan ma taꞌan. Afa yai nfaturu ne, velik ne rivun ita, naꞌuk isa roak ita naꞌa sidovung isa, tevek taꞌan roti isa watan.
18 Eka minovak naꞌa bangsa Israel ra. Ira raꞌan afwatan ihin ovi tamata ra rala ma reluk rira korban verin Ubu. Afa avyai tamata ra rfadoku roak naꞌa wan i ba'i rasnuri rira korban ra verin Ubu. Ira rotu wean inyai, boma isa roak ira ovu wan yai.
19 Mia veka minovak afaka naꞌa afa i ufalak ini? Walut ra wol ihir akataka. Afwatan ihin ovi rala ma reluk rira korban verin walut ra, wol ihir akataka vali.
20 Korban ovi rfadoku naꞌa wan i baꞌi rasnuri rira korban verin walut ra, ira wol rala verin Ubu, naꞌuk rala verin nitu ra. Ba yaꞌa wol utorung ma isa watan mia ovu nitu ra.
21 Mia wol bisma myenu anggur tali Duilaꞌa Ni kobi a, beti ti myenu vali tali nitu rira kobi a. Mia wol bis vali ma mifnaꞌan naꞌa Duilaꞌa Ni meja a, beti ti mifnaꞌan naꞌa nitu rira meja a.
22 Ita deka totu ma Duilaꞌa nangrova ita! Duilaꞌa Ni ngrebat a nlia munuk afakataka.
23 Tamata ra rfalak ne, “Ita bisma totu afaka watan, wean i raladida ra rfalak.” Inyai kena urun! Naꞌuk afa ovi totu ra wol mane kena munuk lahir. “Ita bis vali ma totu afaka watan wean i ralad ra rfalak.” Naꞌuk afa ovi totu ra munuk wol mane kena munuk lahir ma al nfangrebat tamata ovi rorang Yesus rira inorang a.
24 Deka sasan mia kaꞌi mdyava utubira alaling, naꞌuk lokat tamata musti nsiꞌik vali afa ovi notu ma tamata liak ra uturira.
25 Mia bisma mian afaka watan naꞌa wan i baꞌi rfedi afwatan ihin naꞌa. Deka myorat naꞌa ralabira ilaꞌa ra, ma fyalak ne, “Betane rala roak afa avyai ma raraning walut ra te ubu siklabir ra?”
26 Mingnanang afa ovi rtulis roak naꞌa Surat Ralan ne, “Duilaꞌa Nia lanit ivavan ini ovu afa ovi rnaꞌa ralan a munuk.”
27 Wean i tamata isa wol norang Kristus, na nasweang mia ma mifnaꞌan, ma mtyorung roak ma mifnaꞌan ovu ia, naꞌuk deka myorat naꞌa ralabira ilaꞌa ra ma fyalak ne, “Betane rala roak afa avyai ma raraning walut ra te ubu siklabir ra?”
28 Naꞌuk wean i tamata isa nfalak verin mia ne, “Afwatan ihin ini rala roak ma naꞌa rira persembahan ra verin walut ra,” na deka mian afwatan ihin yai. Myotu wean inyai, boma fyikir tamata yai ovu afa ovi nafngamuꞌur roak naꞌa ralan ilaꞌa.
29 Yaꞌa wol mane ufalak naꞌa afa i notu ma mifngamuꞌur naꞌa ralabira ilaꞌa ra, naꞌuk naꞌa afa i tamata yai nafngamuꞌur naꞌa ralan ilaꞌa a. Snain tamata boku rorat ne, “Afakinimi yaꞌa bisma otu afaka watan, naꞌuk tamata liak ralarira ilaꞌa ra rotu teri afa ovi otu ra?
30 Wean i yaꞌa ufalak lan fara weninyai verin Duilaꞌa naꞌa afamtahan yai, beti uan, na afakinimi tamata ra rfalak sian yaꞌa naꞌa afwatan ihin yai? Uflurut roak verin Duilaꞌa ma ufalak fara weninyai naꞌa afa yai.”
31 Terang a valing averi! Ufalak verin mia ne, wean i mian te myenu te myotu afaka watan, na myotu munuk afa avyai ma al fyadawang Ubu.
32 Naꞌa bira vavaꞌat ra, na deka myotu ma tamata liak rotu salasilan ra, velik ne tamata Yahudi ira, te wol Yahudi ira, te Ubu Ni sidovung tamata inorang ra.
33 Era verin mia ma myorang ning vavaꞌat a ma naꞌa afaka watan, na ufaloling tamata ra munuk ralarira ra. Yaꞌa otu wean inyai, naꞌuk wol udava utung alaling. Naꞌuk yaꞌa inak urun ma Ubu nsikat tamata ra tali rira salasilan ra, ma rira vavaꞌat kakiwal.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA