Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Oih sudaro-sudaro! Sudaro andaknyo mangana baliak, apo nan tajadi di niniak muyang kito, kutiko inyo ma ikuik-i Nabi Musa. Inyo kasadonyo dilinduangi dek awan, inyo salamaik manyubarangi Lauik Merah.

² Untuak manjadi pangikuik-pangikuik Nabi Musa, inyo kasadonyo dipamandikan dalam awan, sarato jo di dalam lauik tu.

³ Inyo kasadonyo, mamakan makanan rohani nan samo,

⁴ sarato maminun, minunan rohani nan samo. Inyo kasadonyo minun dari gunuang batu rohani nan manyaratoi inyo; gunuang batu tu iyolah Isa Almasih sandiri.

⁵ Biya pun baitu, kabanyakkan dari inyo tu indak disukoi dek Allah, sarato itulah sababnyo mangko mayik-mayiknyo bagalimpangan di padang gurun.

⁶ Kasadonyo tu manjadi conto bagi kito, untuak ma ingekkan kito, supayo kito jan ma inginkan parkaro-parkaro nan jahek, bakcando niniak muyang kito tu.

⁷ Supayo kito jan manyambah barhalo pulo, bakcando nan dikarajokan dek sabagian dari inyo tu. Di Alkitab ado tatulih, "Mako banso tu muloi makan minun, sarato manari untuak manyambah barhalo."

⁸ Kito indak buliah doh mangarajokan parkaro-parkaro nan cabul, bakcando nan dikarajokan dek sabagian dari niniak muyang kito tu. Dek karano, duwo puluah tigo ribu urang dari inyo tu, mati dalam sahari, dek karano mangarajokan karajo nan salah tu.

⁹ Kito indak buliah doh mancubo-cuboi Tuhan, bakcando nan dikarajokan dek sabagian dari urang-urang tu saisuak, sainggo inyo bi mati digaluang dek ula babiso.

¹⁰ Kito indak buliah pulo doh mambirutok; bakcando nan dikarajokan dek sabagian dari urang-urang tu saisuak, sainggo inyo bi dibunuah dek Malekaik Mauik.

¹¹ Kasadonyo ukunan tu tajadi kabake urang-urang tu, untuak ka manjadi conto dek urang-urang nan lain. Kasadonyo tu tatulih pulo untuak ka manjadi paringatan kabake kito. Dek karano kito kiniko iduik dimaso akie jaman.

¹² Urang nan manyangko dirinyo badiri taguah, andaklah inyo ba ingek-ingek; jan sampai jatuah.

¹³ Satiyok cobaan nan sudaro alami, adolah cobaan nan galik di alami dek manusia. Tapi Allah satiya pado janji-Nyo. Baliau indak ka mampadiyakan doh, sudaro dicuboi labiah daripado nan talok dek sudaro. Dikutiko sudaro ditimpo dek cobaan, Baliau ka ma agiah jalan kabake sudaro untuak manjadi kuwaik, supayo sudaro dapek batahan.

¹⁴ Dek karano itu, sudaro-sudaro nan ambo kasiahi, andaklah angku-angku jajok jo panyambahan barhalo.

¹⁵ Ambo mangecek kabake angku-angku bakcando kabake urang-urang nan bijaksano. Andaklah angku-angku manimbang sandiri kato-kato ambo ko.

¹⁶ Dikutiko kito minun anggur jo mangucapkan tarimo kasih kapado Allah, indakkoh itu manyatokan baraso kito basatu jo Isa Almasih dalam kamatian-Nyo? Baitu pulo dikutiko kito mambagi-bagikan roti untuak dimakan basamo-samo, indakkoh itu manyatokan baraso kito basatu dalam tubuah Isa Almasih?

¹⁷ Dek karano, hanyo ado ciyek roti, sarato kito kasadonyo makan dari roti nan ciyek tu juwo, mako kito nan banyak ko marupokan ciyek tubuah.

¹⁸ Cubolah paratikan urang-urang Yahudi. Inyo nan bi mamakan makanan, nan dipasambahkan di ateh tampaik pasambahan karoban, adolah urang-urang nan basatu jo tampaik tu.

¹⁹ Apo mukasuik ambo jo nan ambo katokan tu? Barhalo, ataupun makanan nan dipasambahkan kabake barhalo tu, kasadonyo tu indak ado arati.

²⁰ Apo nan dipasambahkan di tampaik karoban untuak barhalo, ba arati indak dipasambahkan kapado Allah, tapi kabake roh-roh jahek. Ambo indak niyo doh angku-angku basatu jo roh jahek.

²¹ Angku-angku indak buliah doh minun dari cawan anggur Tuhan, samo-samo jo itu, minun pulo dari cawan anggur roh jahek. Angku-angku indak buliah doh makan di meja Tuhan, sarato makan pulo di meja roh jahek.

²² Ataukoh kito nak mambuwek Tuhan cimburu? Apokoh kito labiah kuwaik dari Tuhan?

²³ Kecek urang, "Kito buliah mampabuwek apo sajo nan katuju dek kito." Batua! Tapi, indak kasadonyo doh nan katuju di kito tu paguno. "Kito buliah mampabuwek apo sajo nan katuju dek kito" -- tapi, indak kasadonyo nan katuju di kito tu, mambangun iduik kito.

²⁴ Janlah ado surang juwo pun, nan bajuwang untuak kapantiangan dirinyo sorang. Satiyok urang musti bajuwang untuak kapantiangan urang lain bagai.

²⁵ Angku-angku buliah makan apo sajo nan dijuwa di pasa dagiang. Indak usah manyalidiak-inyo talabiah dawulu, biyapun ado uweh-uweh di ati ketek angku-angku.

²⁶ Dek karano di Alkitab ado tatulih, "Bumi ko jo kasadonyo isinyo adolah punyo Tuhan."

²⁷ Jikok angku-angku di undang makan, dek surang urang nan indak urang Kristen, angku-angku layi manamui undangan tu, makan sajolah apo nan di edangkan ka angku-angku. Indak usah manyalidiak-i dari ma datangnyo makanan tu, supayo jan ado uweh-uweh di ati ketek angku-angku.

²⁸ Tapi jikok ado nan mangecek kabake angku-angku, "Makanan ko lah dipasambahkan kabake barhalo," janlah dimakan makanan tu, dek karano mamparatikan kapantiangan urang tu, sarato dek karano suwaro ati ketek.

²⁹ Mukasuik ambo, indak suwaro ati ketek angku-angku doh, tapi suwaro ati ketek urang tu. Mungkin ado nan batanyo, "Ndeh, baa mangko kabebasan ambo musti dibatehi dek suwaro ati ketek urang lain?

³⁰ Jikok ambo mamakan makanan sacaro batarimo kasih kapado Allah, baa mangko urang musti mancacek ambo dek karano di makanan tu, sadangkan ambo lah batarimo kasih kapado Allah?"

³¹ Apo pun juwo nan sudaro karajokan -- sudaro makan atau sudaro minun -- karajokanlah kasadonyo tu untuak mamuliekan Allah.

³² Iduiklah jo caro nan baitu, sainggo sudaro indak manyababkan urang lain babuwek doso; apokoh urang-urang tu urang Yahudi, atau urang nan indak urang Yahudi, ataupun jamaat Allah.

³³ Iduiklah bakcando ambo iduik. Ambo ba usawo manyanangkan ati kasadonyo urang dalam sagalo sasuatu, indak ado doh mamantiangkan mukasuik-mukasuik diri surang. Tujuan ambo adolah, hanyo, supayo kasadonyo urang-urang tu dapek disalamaikkan.

1 Korintus

Video 1 Korintus 10

Ikuti Kami:

KONTAK | PARTISIPASI | DONASI