Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali a’i-a’i, aku rani komi mangansani palaong to mawali resi bue-bue ngkita to nakeni i Musa yako la’u tana Mesir tempo owi. Tempo etu sira samparia natorung nu limu ri raya mpalinjanya pasi sira samparia mangawote tasi liu jaya to naika i mPue Allah ri tongo ntasi etu.
2 Wali tempo sira natorung nu limu pasi liu ri tasi etu, tempo etu sira ewa rabaptis mangika tondong i Musa semo kepala nsira.
3 Sira samparia mangkoni pangkoni to nawaika i mPue Allah sira yako ri kuasaNya.
4 Pasi sira manginu ue to nawaika seja i mPue Allah sira yako ri kuasaNya. Ue to nainu nsira etu Ia nampaposuwu yako ri woto mbatu. Wali watu etu tondong i ngKerisitu semo. Wali Ia re’e sinjaya pei sira ri raya mpalinjanya etu.
5 Pei nempo sira samparia nasawang i mPue Allah, kaborosinya sira lengkonya taa mampakasanang Ia. Wali see naka sira rapopate yau nja’u pada bone.
6 Wali samparia palaong to nawali resi sira etu mawali tondong resi kita. Tondong etu mampatiendoka kita naka ne’e kita mamporani anu to maja’a ewa to naporani nsira.
7 Ne’e kita mampue tau-tau ewa naika ntau ri oyo nsira. Apa ri raya ntuntu i mPue re’e to ratulis mangkonong palaong to naika nsira tempo sira mampue tau-tau etu, to’onya, “Bansa etu matunda damangkoni pasi manginu. Roo see sira mambangu pei mataro mampakasanang.” Etu semo to ratulis. Wali ne’e kita mampue tautau.
8 Pasi ne’e seja kita magoyal pasi masala ewa naika ntau ri oyo nsira. Apa yako ri lengko nsira to maja’a etu, see naka dua mpuyu pei togo nsowu mba’a sira to namate yau ri rayanya seo.
9 Pasi ne’e kita mangansoba i Kerisitu ewa naika ntau ri oyo nsira. Apa yako ri palaong to naika nsira etu see naka sira mate natungku nu ule.
10 Pasi ne’e seja kita kambumbu-mbumbu ewa naika ntau ri oyo nsira. Apa tau to nangika palaong etu napopate yau i mpomakau i mPue Allah to palaonginya mampakaja’a anu to maja’a.
11 Wali naka pei samparia palaong etu mawali resi sira see damawali tondong resi kita. Pasi samparia palaong etu ratulis see mawali patiendo resi kita to tuwu ri tempo to mosumo kapuranya temponya to si’i.
12 Wali bara re’e tau to mampobuuka, “Aku maroso kojo pangayangku, wali aku taa damangika dosa.” Wali i sema-sema to mampobuuka ewa see, to tao-tao ia mampakatao kojo naka ne’e mangika dosa ewa naika bue-bue ngkita tempo owi etu.
13 Wali kamonsonya tare panggoda to narata ngkita to taa biasa mawali resi to lino. Pei i Pue Allah masipato rasarumaka. Ia taa damangabiaka kita mangarata panggoda to kita taa takurang mangewa. Apa tempo kita mangarata panggoda, Ia sangkani damangawaika kita jaya damampiyaika panggoda etu. Wali ewa wetu nikaNya mampakaroso rayanta mangainsoka tempo mangarata panggoda.
14 Wali a’i-a’i to kuporayang kojo, ane ewa see, pakalongko yako ri banua to napampue ntau resi tau-tau naka ne’e komi mampue seja resi tautau etu.
15 Komi tau to pande mampasisala anu to matao pasi anu to maja’a, wali komija mangabotus gombongku bara monso bara taa.
16 Wali tempo kita manginu anu to re’e ri sangkir mangendo raa i ngKerisitu tempo Ia mate ri kaju pasape, tempo etu kita manganto’oka i Pue Allah tarima matao. Roo see kita manginu sindara-ndara. Wali palaong etu mawali tondong kita samparia mangarata kasanang apa kita room nolika i ngKerisitu raanya. Pasi tempo kita mangampesu-mpesu roti pei mangkoni sindara-ndara mangendo koro i ngKerisitu anu mate ri kaju pasape, palaong etu mawali tondong kita samparia rapasimba’a resi koro to si Ia etu.
17 Apa songuja roti to rapesu-pesu etu, wali batuanginya kita nempo malagi mawali samba’a koro apa kita samparia mangkoni roti etu samba’a pei samba’a.
18 Wali pobuuka ruyu ada nto Israel. Ane ewa ada etu, samparia tau to mangkoni santila nae to room rapampueka resi i Pue Allah ri wawo mpalampa, tau etu masingkatao pei i Pue Allah anu pue mpalampa etu.
19 Wali ane ewa see, kesaa batuanginya gombongku etu? Wimba, aku bara manganto’o tau-tau pasi pampue to rapampueka resi tau-tau etu bara re’e batuanginya?
20 Gete tare! Batuanginya gombongku, etu semo pampue to napampueka ntau to si’a to Yahudi, pampue etu kamonsonya napampueka resi measa, si’a resi i Pue Allah. Pasi aku taa rani komi masingkatao pei measa.
21 Wali ane komi mangkoni pasi manginu sindara-ndara mangendo koro pasi raa i mPue, ane ewa see taa maya komi mangkoni pasi manginu seja ri roa to naika ntau mampue resi measa.
22 Apa ane kita mangika palaong etu, i Pue damawali timopo rayaNya. Ia taa ojo damangabiaka kita mangika palaong to etu, pasi kita taa kojo gana karosonta damangewa Ia.
23 Wali re’e tau to manganto’o, “Ane kita to mangaya, kesaa to kita rani mangika, kita maya mangika.” Wali monso pu’u ewa panto’o etu, pei taa samparia to kita mangika to bae batuanginya. Kesaa to kita rani mangika, kita maya mangika. Pei taa samparia to kita mangika to mampakaroso pangaya ngkita.
24 Wali ne’e kita mangika ojo palaong to mangansawang koronta. Pei anu kita mangika palaong to mangansawang yunu ngkita.
25 Wali kita maya mangkoni nae to rapobalu nja’u pasar. Pei tempo mangoli nae etu, ne’e mampotanaka resi tau mangkonong nae etu bara roomo rapampueka resi tau-tau. Apa ane kita taa mampotanaka, raya ngkita taa damangepe sala mangkoni nae etu.
26 Apa tare pangkoni to napapowali i mPue Allah to taa matao rakoni. Manasa ewa wetu apa re’e to ratulis ri raya ntuntu i mPue Allah to manganto’o, “Lino si’i pasi samparia bananginya paka i Pue Puenya.”
27 Wali ane re’e tau to taa mangaya to mangansale kita mangkoni ri banuanya pei kita rani yau, maya. Kita maya mangkoni samparia pangkoni to raposaka ri tango ngkita, pei ne’e mampotanaka resi tau mangkonong pangkoni etu see raya ngkita taa damangepe sala ane mangkoni.
28 Apa lino si’i pasi samparia bananginya paka i Pue Puenya. Pei ane rapanya re’e tau to manganto’oka kita, “Pangkoni si’i roomo rapampueka resi tau-tau,” ane ewa see, ne’e kita mangkoni. Anu kita mampobuuka tau to manganto’oka kita mangkonong nae etu, apa ia bara mangepe sala ane mangkoni wali see naka ia damasusa ane kita mangkoni nae etu.
29 Wali pobuuka raya ntau to yusa, ne’e ojo mampobuuka raya ngkita. Pei bara re’e tau to damanganto’o, “Kesaa to aku rani mangika aku maya mangika, apa taa masipato pamporani resi aku pei napakasala ntau to mangepe sala ri rayanya mangkoni nae etu.
30 Ane aku manganto’oka i Pue Allah tarima matao panewa mangkoni, maka pei aku nato’o maja’a ntau to yusa mangkonong anu to aku roomo manganto’oka i Pue tarima matao etu?” Ewa see nato’o ntau.
31 Pei aku manganto’oka komi, nempo kesaa to naika ngkita, bara mangkoni bara manginu, anu kita mangika samparianya etu paka i Pue Allah darabarong.
32 Wali anu kita mangika lengko ngkatuwu to taa mampakasusa tau to yusa, nempo to Yahudi, bara to si’a to Yahudi pasi samparia tau to mangaya i Pue pasi to i Pue Allah Puenya.
33 Ewa see semo songka to si aku. Nempo bara kesaa to kuika, aku mampeyaa mampakasanang samparia tau. Apa aku taa mangaliwu anu to bae batuanginya resi korongku. Aku mangaliwu to bae batuanginya resi tau boros see sira maya seja rapalaes.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA