Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Semeton senamian! Side pade harus inget napi saq telaksane tipaq leluhurte sewaktu ie pade ngiring Musa. Ie pade selapuq telindungin siq awan, dait selamet mbelat Segare Bẽaq.

² Adẽqne bau jari pengiring-pengiring Musa, ie pade selapuq tebaptis lẽq dalem awan dait lẽq dalem segare nike.

³ Ie pade selapuq ngelor keloran rohani saq pade,

⁴ dait nginem ineman rohani saq pade. Ie pade selapuq nginem lẽman gunung batu rohani saq araq bareng kance ie pade; gunung batu nike Almasih mẽsaq.

⁵ Timaq maraq nike, luwẽq lẽman ie pade saq Allah nẽnten suke, dait lantaran nike mayit-mayit ie pade begelanyat lẽq padang gurun.

⁶ Selapuqne nike jari conto umaq ite, jari ngingetang ite adẽq ndaq melẽtang hal-hal saq jahat maraq ie pade.

⁷ Dait adẽq ite ẽndah ndaq nyembah berhale maraq saq tegawẽq siq separo lẽman ie pade. Lẽq dalem Kitab Suci tetulis, "Make bangse nike mulai ngelor dait nginem, dait ngigel jari nyembah berhale."

⁸ Ite ndẽq kanggo gawẽq hal-hal saq cabul maraq saq telaksaneang siq separo lẽman ie pade. Sehingge dalem sejelo doang, telu likur iyu dengan lẽman ie pade ninggal.

⁹ Ite ndẽq kanggo cobe Tuhan maraq saq telaksaneang siq separo lẽman ie pade laẽq, sehingge ie pade ninggal tekakoq siq ulah saq beracun.

¹⁰ Ite ndẽq kanggo ẽndah ngerumun; maraq saq telaksaneang siq separo lẽman ie pade laẽq, sehingge ie pade tematẽq siq malaẽkat maut.

¹¹ Selapuq hal nike telaksane tipaq ie pade adẽqne jari conto bagi dengan-dengan lain. Dait selapuqne nike tetulis ẽndah adẽqne jari peringetan tipaq ite. Sẽngaq mangkin ite idup lẽq ahir jaman.

¹² Dengan saq paran diriqne kuat nganjeng, harus onyaq-onyaq; ndaq jangke ie geriq.

¹³ Sebilang cobe saq side alamin, nike cobe saq biase tealamin siq manusie. Laguq Allah setie lẽq janji-Ne. Ie nẽnten gen menengang side tecobe lebihan lẽman kekuatande. Lẽq waktu side tetimpe siq cobe, Ie gen ngicanin side langan sehingge side bau nahen cobe nike.

¹⁴ Keranaq nike, semeton senamian saq tiang kasihin, jaoqang diriqde lẽman penyembahan berhale.

¹⁵ Tiang ngeraos lẽq side maraq tipaq dengan-dengan saq bijaksane. Side pade harus timbang mẽsaq ucapan tiang niki.

¹⁶ Sewaktu ite nginem anggur siq ucapan syukur tipaq Allah, napi hal nike ndẽq nyatayang bahwe ite niki besopoq kance daraq Almasih? Dait sewaktu ite bagi-bagiang ruti jari tekelorang bareng-bareng, napi nike ndẽq nyatayang bahwe ite besopoq dalem rage Almasih?

¹⁷ Sẽngaq cume araq sopoq ruti, dait selapuqte ngelor lẽman ruti saq sopoq nike ẽndah, make ite saq luwẽq niki jari sopoq awak.

¹⁸ Cobaq perhatiang bangse Israel. Tekan ie pade saq ngelor keloran saq teaturang nike bareng-bareng mauq bagian lẽman mẽje taoq kurban nike?

¹⁹ Napi maksut tiang lẽq hal nike? Berhale atao keloran saq teaturang tipaq berhale nike ndẽq bedowẽ arti napi-napi.

²⁰ Napi saq teaturang tipaq berhale, nike ndẽqne teaturang tipaq Allah, laguq tipaq roh-roh jahat. Dait tiang ndẽq mẽlẽ side pade besopoq kance roh jahat.

²¹ Side pade ndẽq kanggo nginem lẽman cawan lẽq mẽje perjamuan Tuhan dait ẽndah lẽman cawan lẽq mẽje perjamuan Belis. Side pade ndẽq kanggo kelorang ruti lẽq mẽje perjamuan Tuhan, dait ẽndah lẽq mẽje perjamuan Belis.

²² Atao ite mẽlẽ piaq Tuhan talon atẽ? Napi ite kuatan tebanding Tuhan?

²³ "Ite kanggo piaq napi doang saq ite melẽtang." Mule kenaq! Laguq ndẽqne selapuq saq ite melẽtang nike araq manpaatne. "Ite kanggo piaq napi doang saq ite melẽtang" -- laguq ndẽqne selapuq saq ite melẽtang nike bau pesolah idupte.

²⁴ Ndaq sopoq dengan juaq bejuang jari kepentingan diriqne mẽsaq. Sebilang dengan harus bejuang jari kepentingan dengan lain.

²⁵ Side pade kanggo ngelorang napi doang saq tejual lẽq peken. Ndẽqne perlu teperiksaq juluq, timaq araq keberatan-keberatan lẽq dalem atẽ nurani side.

²⁶ Sẽngaq dalem Kitab Suci tetulis, "Gumi dait selapuq isine dowẽn Tuhan."

²⁷ Lamun side pade tepesilaq bekelor siq sopoq dengan saq ndẽq percaye lẽq Almasih, dait side pade terimaq pesilaqan nike, kelorang napi saq tepesajiq umaq side. Ndaq side periksaq lẽman mbẽ asalne keloran nike, adẽq ndẽq araq keberatan-keberatan lẽq dalem atẽ nurani side.

²⁸ Laguq lamun araq saq bebase lẽq side, "Keloran niki sampun teaturang tipaq berhale," ndaq kelor keloran nike, lantaran merhatiang kepentingan dengan nike dait lantaran suare atẽ nurani.

²⁹ Maksut tiang ndẽqne suare atẽ nurani side, laguq suare atẽ nurani dengan nike. Sang araq saq beketuan, "Kembẽq kebẽbasan tiang harus tebatesin siq suare atẽ nurani dengan lain?

³⁰ Lamun tiang ngelor keloran siq rase syukur tipaq Allah, kembẽq dengan ngewade tiang lantaran keloran nike, padahal tiang sampun ngucap syukur tipaq Allah?"

³¹ Napi juaq saq side laksaneang -- side bekelor atao side nginem -- laksaneang selapuqne nike jari mulieang Allah.

³² Pade idup maraq nike sehingge side ndẽq jari penyebap dengan lain piaq dose; napi ie pade dengan Yahudi atao dengan bangse-bangse lain, atao jemaah Allah.

³³ Pade idup maraq tiang. Tiang berusahe nyenengang angen selapuq dengan dalem selapuq hal. Tiang ndẽq araq bedowẽ maksut jari kepentingan tiang mẽsaq. Saq jari tujuan tiang cume adẽq ie pade selapuq teselametang.

1 Korintus

Video 1 Korintus 10

Ikuti Kami:

KONTAK | PARTISIPASI | DONASI