Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Puari-puari! Puari hagani ingok api sai tejadi jama nenek muyang waktu tian nutuk Musa. Tian sunyin dilindungi ulih awan, rik selamat nyeberangi Laok Suluh.

² Untuk jadi jelma-jelma sai nutuk Musa, tian sunyinni dibaptis di delom awan rik di delom laok ano.

³ Tian sunyinni nganik kanikan rohani sai gegoh

⁴ rik nginum inuman rohani sai gegoh. Tian sunyinni nginum jak gunung batu rohani sai menyertai tian; gunung batu ano iado Almasih tenggalan.

⁵ Walaupun injuk reno, Allah mak senang tehadap kelamonan jak tian, rik udido sebabni mayat-mayat tian bergelimpangan di padang gurun.

⁶ Sunyinni udi jadi cuntoh bagi ram, untuk ngingokko in ram dang mirak hal-hal sai jahat injuk tian.

⁷ Juga in ram dang nyumbah berhala injuk sai dilakuko ulih sebagian jak tian. Delom Alkitab tetulis, "Maka bangsa udi mulai mengan nginum, rik nari untuk nyumbah berhala."

⁸ Ram mak ngasi ngelakuko hal-hal sai hajor injuk sai dilakuko ulih sebagian jak tian. Mani, rua puluh telu ribu jelma jak tian mati delom sai rani mani ngelakuko seno.

⁹ Ram mak ngasi nyuba-nyuba Tuhan injuk sai dilakuko ulih sebagian jak tian tumbai, sehingga tian mati dicutok ulai bebisa.

¹⁰ Ram mak ngasi juga ngomel, injuk sai dilakuko ulih sebagian jak tian tumbai, sehingga tian dibunuh ulihni Malaikat Kematian.

¹¹ Sunyin hal udi tejadi jama tian untuk jadi cuntoh bagi jelma-jelma bareh. Rik sunyinni udi tetulis juga untuk jadi peringatan jama ram. Mani ram tano hurik di masa akher zaman.

¹² Ulun sai nyangko dirini berdiri teguh, hagani behati-hati; dang sampai ia tumbak.

¹³ Unggal cubaan sai Puari alami iado cubaan sai biasa-biasa dialami manusia. Kidang Allah setia jama janji-Ni. Ia mak haga naganko Puari dicuba ngelebihi kesanggupanmu. Pada waktu Puari ditimpa ulih cubaan, Ia haga ngeni jalan jama niku untuk jadi kuat in Puari dapok betahan.

¹⁴ Ulihni seno, Puari-puari sai kukasihi, hagani keti nyuohko cara nyumbah berhala.

¹⁵ Nyak cawa jama niku injuk jama jelma-jelma sai bijaksana. Hagani keti nimbang tenggalan cawaku inji.

¹⁶ Pada waktu ram nginum anggor jama ngucapko terima kasih jama Allah, bukankah ano nunjukko bahwa ram besatu jama Almasih delom kematian-Ni? Rik pada waktu ram ngebagi-bagiko ruti untuk dikanik jama-jama, bukankah ano nunjukko bahwa ram besatu delom badan Almasih?

¹⁷ Ulihni angkah wat sai ruti, rik ram sunyin nganik jak ruti sai sai udi juga, maka ram sai lamon inji merupako sai badan.

¹⁸ Cuba perhatiko jelma-jelma Yahudi. Tian sai nganik kanikan sai dipersembahko di atas rang persembahan kurban, iado jelma-jelma sai besatu jama rang udi.

¹⁹ Api maksudku jama ano? Berhala atau kanikan sai dipersembahko jama berhala ano mak ngedok reti sama sekali.

²⁰ Api sai dipersembahko di rang kurban untuk berhala mak dipersembahko jama Allah, melainko jama ruh-ruh jahat. Rik nyak mak haga keti besatu jama ruh jahat.

²¹ Keti mak ngasi nginum jak piala anggor-Ni Tuhan, rik sekaligus jak piala anggor ruh jahat juga. Keti mak ngasi nganik di mija-Ni Tuhan, rik di mija ruh jahat juga.

²² Atau ram haga nyani Tuhan sesera? Api ram lebih kuat jak Tuhan?

²³ Ani ulun, "Ram ngasi bebuat api gaoh sai ram haga." Temon! Kidang mak sunyin sai ram haga udi beguna. "Ram ngasi bebuat api gaoh sai ram haga" -- kidang mak sunyin sai ram haga udi ngebangun kehurikan ram.

²⁴ Dangdo sai jelma pun bejuang untuk kepentingan dirini tenggalan gaoh. Unggal jelma harus bejuang untuk kepentingan ulun bareh.

²⁵ Keti ngasi nganik api gaoh sai dijual di pasar daging. Dang nyelidikini lebih mena, meskipun wat kebiyakan-kebiyakan delom hatimu.

²⁶ Mani delom Alkitab tetulis, "Bumi inji jama sunyin isini iado kedau-Ni Tuhan."

²⁷ Kik keti diundang mengan ulih sai jelma sai lain Kristen, rik keti nerima undangan ano, kanikdo api sai dihidangko jama niku. Dang nyelidiki jak ipa ratongni kanikan udi, in mak ngedok keberatan-keberatan di delom hatimu.

²⁸ Kidang kik wat sai cawa jama niku, "Kanikan inji radu dipersembahko jama berhala," dang dikanik kanikan ano, mani memperhatiko kepentingan ulun udi rik mani suara hati.

²⁹ Maksudku lain suara hatimu, kidang suara hati jelma udi. Halokni wat sai betanya, "Wah mengapi kebebasanku harus dibatasi ulih suara hati ulun bareh?

³⁰ Kik nyak nganik kanikan jama beterima kasih jama Allah, mengapi ulun harus ngereneh nyak atas kanikan ano, sedang nyak radu beterima kasih jama Allah atasni?"

³¹ Api pun sai Puari guaiko -- Puari kanik atau Puari inum -- guaikodo sunyinni ano untuk ngemuliako Allah.

³² Hurikdo sedemikian rupa in Puari mak nyebabko ulun bareh bebuat dusa; api tian ulun Yahudi, atau jelma lain Yahudi ataupun jemaah Allah.

³³ Hurikdo injuk nyak. Nyak berusaha nyenangko hati sunyin jelma delom sunyin hal, tanpa maksud-maksud kepentingan diriku tenggalan. Tujuanku yakdo angkah in tian sunyinni dapok diselamatko.

1 Korintus

Video 1 Korintus 10

Ikuti Kami:

KONTAK | PARTISIPASI | DONASI