Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ee, tomala'bihku' sola ngasan! La miingaranni to apa jaji lako tojolota' to nasolan Nabi Musa jio mai tondok Mesir tonna anu'. Pada naongannii saleu', nasalama' llambanni Tasik Malea.

² Na ia joo apa mangka jaji dipapadai kadijioran. Jaji, ia to tojolota' susimi todijio' ngasanni lan saleu' na lan tasik namenjaji anak gurunna Nabi Musa.

³ Mangka ngasanni ngkandei to kande nabenni Puang Allataala,

⁴ sola nniso' to wai naben tooi Puang Allataala. Ia joo wai messun jio mai buntu batu to nasolan anna putuoi. Ia joo buntu batu, iamo Almaseh.

⁵ Apa moi nasusi joo, budai to te'da napumasannangngi Puang Allataala to sipa'na. Iamo joo na pada simatean bangmo jio padang pallawangan.

⁶ Ia ngasanmo joo mpupangngingaranki' nadanggi' tamadoang mpugaukki to apa gaja' susi tuu lako tau.

⁷ Susi too to kumua danggi' misompa dewata susi to napugauk tuu lako tau pira' tonna anu'. Den diuki' lan Sura' Allataala kumua, "Kumandei, mangngiso', namane' manggellu' ssompa dewata."

⁸ Danggi' tamanggauk sala susi to napugauk tuu lako tau pira' tonna anu'. Sangngallora na duang pulo tallu sa'bu tau mate, sanga napugaukki to susi joo.

⁹ Danggi' tacoba-coba mpamagalli Puang Allataala, susi to napugauk tuu lako tau pira' tonna anu', namate natitto ulah keipo.

¹⁰ Danggi' too mimangpasanga-sanga susi tuu lako tau pira' tonna anu', naarannai mate nabuno Kalamau'.

¹¹ Mangka ngasanmo joo jaji lako tuu lako tau tonna anu', la mpupangngingaran tolaen. Na ia toomo nadiuki' ngasan, dikua anna pakainga'ki', nasaba' wattu la cappa'nami tee lino.

¹² Jaji, ia to tossanga kalena matappa' tongan, la majagai nadanggi' namenjaji tomadosa susi tuu lako tau tonna anu'.

¹³ Ia to apa ssede kamu' mpugauk dosa, passede biasa bang ia lako tolino. Apa naingaranni Puang Allataala to basse-Na, na te'da naeloran kamu' disede la'bi na ia to mikulle nnewai. Na ia ke disede kamu' mpugauk dosa, napamawatang kamu' ammikullei nnewai.

¹⁴ Ee, tokupakamoja'! Iamo joo danggi' misompa dewata.

¹⁵ Kuajahhi kamu' susi to nnajahhi tomandalanmo tangngahna, na la mitimbang melo tee kada la kupau.

¹⁶ Ia ke Kakumandean Maceroki', nniso'iki' cangkiri'-Na Puang tamangkurru sumanga' too lako Puang Allataala. Iamo tandana kumua mateki' sola Almaseh. Na takande tooi to mesa' roti ditawa-tawa. Iamo tandana kumua mesa'miriki' lan kale-Na Almaseh.

¹⁷ Jaji, moi budaki', susimiriki' to mesa' batang kale, nasaba' mesa'ra joo roti to takande.

¹⁸ Takitari to to-Israel. Ia to tongkandei to apa dipassompan jao ngenan pangkaroban, iamo tomangmesa ntuu joo ngenan pangkaroban.

¹⁹ Apara battuananna joo kupau? Iamo to kumua moi to dewata, ba'tu ia to kande dipassompan lako dewata, te'dara nalannapa kamu',

²⁰ apa ia to apa dipassompan jao ngenan pangkaroban dewata, dipassompanra lako setang, tangngia lako Puang Allataala. Na cia' lalona' ke sipusola kamu' setang.

²¹ Te'da lalo miwa'ding nniso'ii cangkiri'-Na Puang, ammilanniso'i too cangkiri'na setang. Te'da too miwa'ding kumande jio meja-Na Puang, ammilakumande too jio mejana setang.

²² Ia ke tapugaukki susi joo, mpamagalliriki' Puang. Tasangaraka kumua la'bi mawatangki' na Ia?

²³ Den tau nakua, wa'ding ngasan dipugauk to sininna apa. Apa ianna aku' kukua te'da na ia ngasan bang den bua'na. Jaji, moi na hallala' ngasan to apa, te'da na ia ngasan mpamawatang tomatappa'.

²⁴ Danggi' naden mesa' tau mpangngundaran mesa kalena. Pada-padaki' la ntangngaran too kaparalluanna padanna rupa tau.

²⁵ Wa'ding mikande to sininna juku' dibaluk jio pasa'. Danggi'mo milamparessa opi jolo' kumua mangkaraka dipassompan lako dewata iarika te'da. Ia to penawammi danggi' nasitawa-tawa ngkandei joo juku'.

²⁶ Nasaba' den diuki' lan Sura' Allataala kumua, "Apan-Na Puang Allataala tee lino na sininna issinna."

²⁷ Ianna den tote'dapa namatappa' ntambai kamu' kumande, ammimadoang male, kandei to apa napalennatan kamu'. Na ia to penawammi danggi' omo nasitawa-tawa ngkandei joo juku'.

²⁸ Apa ianna den tau ngkuan kamu', "Ia tuu juku' mangka dipassompan lako dewata," danggi' mikandei, situru' passanganna joo tau to ngkuan kamu'.

²⁹ Ia to kusanga tangngia issi penawammi, apa iara to issi penawanna joo tau. Mbai naden tau mekutana, "Matumbari na issi penawanna tau laen la nnatoro'na'.

³⁰ Ia ke mangkurru sumanga'na' lako Puang Allataala kumane' ngkandei joo juku', ia to tau laen te'da nawa'ding mpasalana'."

³¹ Kupebalii, moi apa mipugauk, la kumanderaka la mangngiso'raka, la mipugaukki joo anna pakala'bihhi tau to Puang Allataala.

³² Danggi' na panggaukanmi napusaba'i tolaen madosa, la to-Yahudi, la bangsa tangngia to-Yahudi, iarika jamaa-Na Puang Allataala.

³³ Kupengkulle-kullei anna sininna panggaukanku' napumasannang sininna tau. Te'da na ia kuangah to kupumelona, apa iara kuangah to napumelona tolaen, kukua anna wa'ding toda ia dipasalama'.

1 Korintus

Video 1 Korintus 10

Ikuti Kami:

KONTAK | PARTISIPASI | DONASI