Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 He ya'ami ira talifusõ! Mitõrõ tõdõmi hadia zalua khõ ndra tuada me la'o'õ Moze. Ilumõ'õ ira lawuo, irege tola latõrõ Nasi Soyo, lõ hadia ia khõra.
2 Tebayagõ ira bakha ba lawuo awõ ba nasi ena'õ tobali ira fefu solo'õ khõ Moze.
3 Fefu ira fagõlõgõlõ la'a gõ fa'alowalangi,
4 ba labadu nidanõ fa'alowalangi gõi. Fefu ira oi samadu idanõ moroi ba hili kara fa'alowalangi andrõ si fao khõra; hili kara andrõ ya'ia Keriso samõsa.
5 Hew̃a'ae si manõ, ato ira zi lõ omasi Lowalangi, da'õ mbõrõ wa tefazaewe gamatelara ba danõ si mate.
6 Tobali dumaduma khõda da'õ fefu, ba wamangelama ya'ita ena'õ bõi ta'isõ zi lõ sõkhi si mane nilaura.
7 Ena'õ gõi bõi tafosumange nadu si mane nilaura õsa. No tesura ba Mbuku Ni'amoni'õ, "Manga ba mamadu soi andrõ, ba manari ira wamosumange adu."
8 Bõi talau wohorõ si mane nilaura õsa. Me lalau zi manõ, dua wulu a tõlu ribu niha ira zi mate ba zi ha ma'õma'õkhõ.
9 Bõi tatandraigõ Zo'aya si mane nilaura õsa mbõrõta, irege mate ira nidou gulõ sosõfu.
10 Bõi mukõkõkõkõ gõi ita; si mane nilaura õsa mbõrõta irege mate ira nibunu Mala'ika Wa'amate andrõ.
11 Alua khõra da'õ fefu ena'õ tobali dumaduma ba niha bõ'õ. Ba tesura da'õ fefu ena'õ tobali ira fanõrõ tõdõ khõda. Bõrõ me ba ginõtõ safuria auri ita iada'e.
12 Niha sanguma'õ tõdõnia no aro gahenia, akha mangelama; ena'õ bõi alau ia.
13 Fefu wanandraigõ si falukha ami no fanandraigõ si'ogõtõ'õ niha da'õ. Ba hiza lõ farõi Lowalangi ba wawu'usa li-Nia. Lõ Ibe'e tetandraigõ ami, tõra moroi ba zi tola mitaha. Ba ginõtõ gõna ami fanandraigõ, Ibokai lala ena'õ tola abõlõ ami ba tola mitaha.
14 Bõrõ da'õ, ya'ami iratalifusõ ni'omasi'õgu, abõlõ sõkhi na fatuwu khõmi wamosumange adu.
15 Huhuogu khõmi ba no huhuo ba zatuatua. Mitimba tõdõmi wehedegu andre.
16 Ba ginõtõ tabadu nagu si fao fangandrõ saohagõlõ khõ Lowalangi, hadia tenga sangoroma da'õ wa ha sambua ita khõ Keriso ba wa'amate-Nia? Ba ba ginõtõ tabagibagi roti ba wemanga, hadia tenga sangoroma da'õ wa ha sambua ita ba mboto Keriso?
17 Bõrõ me ha sambua roti, ba manga ita moroi ba roti si sambua andrõ gõi, andrõ wa ya'ita sato andre no ha sambua boto.
18 Mitandraigõ mifaigi ndra niha Yahudi. Si manga gõ si no mube'e sumange yaw̃a ba nahia wame'e sumange, no ha sambua ira ba nahia andrõ.
19 Hadia gohitõ dõdõgu ba da'õ? Adu ba ma zui õ fasõmbata ba nadu lõ manõ eluahania.
20 Hadia nibe'e ba naha zumange nadu, tenga mube'e khõ Lowalangi da'õ, no khõ geheha si lõ sõkhi. Ba lõ omasido na ha sambua ami khõ geheha si lõ sõkhi andrõ.
21 Tebai mamadu ami moroi ba mako nagu khõ Zo'aya, ba moroi ba mako khõ geheha si lõ sõkhi gõi. Tebai manga ami ba meza Zo'aya, ba ba meza geheha si lõ sõkhi gõi.
22 Hadia edõna ita tabe'e afõkhõ dõdõ Zo'aya? Hadia tõra abõlõ ita moroi khõ Zo'aya?
23 Lamane niha, "Tola talau nilau dõdõda." Duhu! Ba hiza lõ fefu moguna nilau dõdõda andrõ. "Tola talau nilau dõdõda" -- ba hiza lõ fefu nilau dõdõda andrõ tobali fanga'azõkhi wa'aurida.
24 Bõi ha soguna khõnia samõsa ifalua niha. Akha dozi niha ifa'ua zoguna ba niha bõ'õ.
25 Tola mi'a hadia ia fefu ni'amawa ba ona samawa nagole. Lõ moguna wamareso ua, hew̃a'ae itegutegu ami tõdõmi.
26 No tesura ba Mbuku Ni'amoni'õ, "No okhõta Lowalangi gulidanõ andre awõ nõsinia."
27 Na ikaoni manga ami si tenga Niha Keriso, ba na mitema'õ wogaoni andrõ, mi'a hadia ia nibe'e fõnami. Bõi mizofuzofu he moroi gõ andrõ, ena'õ bõi so wanegunegu soroi dõdõmi.
28 Ba hiza na so zanguma'õ khõmi, "No tebe'e sumange ba nadu gõ andre," bõi mi'a gõ andrõ, me da'õ zoguna ba niha andrõ awõ ba wehede dõdõ.
29 Sedõna uw̃a'õ, tenga fehede dõdõmi, no fehede dõdõ niha andrõ. Ma so zanofu, "Ee, hana wa i'olaini nilau dõdõgu fehede dõdõ niha bõ'õ?
30 Na u'a gõgu si fao fangandrõ saohagõlõ khõ Lowalangi, hana wa laherai ndra'o niha bõ'õ ba gõ andrõ, hiza no u'andrõ saohagõlõ Lowalangi khõnia?"
31 Gofu hadia nilaumi -- he si manga ba he samadu -- milau ia ba wamolakhõmi Lowalangi.
32 Fa'aurimi bõi tobali bõrõ wa mosala niha bõ'õ; he niha Yahudi ba he gõi si tenga niha Yahudi, ma zui ndrotondroto mbanua Lowalangi.
33 Ya si mane fa'aurigu wa'aurimi. U'ositõlagõ wangomusoi'õ tõdõ niha fefu ba ngawalõ hadia ia nilaugu, tenga bõrõ wangalui soguna khõgu samõsa. Ohitõ dõdõgu ena'õ tola te'orifi ira fefu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA