Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Aya-wal oso-wal, ëe ama emsa enlala sobiridaꞌan– nëno mae mo auyan-azana men kim Musa Bak golëwet so gwekake. Alap dekam but yawalsa golzimki– zëbe mae hap de jal zini in de zë totot gwibirida gwen hap. Hëndep Alap mo sosonkam zep hi yawala insa golëtablan gwe kïnïka.
2 Zëbe mae hap dekam man nwe-mase gwenan: But de tahalebinni in hen hi yala insa tablan gwe kïnïk, san de Musa mo baptis tabinnik de ang tanna. Zëno dam gulsunnu, zen dekam mes Musa hon bïtï gwek.
3 Zen dekam kïtak Alap onakore tembanesa dwenblanda gwek,
4 hen hona Zëbon onakore naka sap notde gwibik. Dekam Alap kaso yawalsa hamal gulzimki, zep dekore hosa notde gwibik, sap kaso yala in hen man ang gwibirida song gwek– zen de ho hap ëtahalha gwe-gwen srëm hap. Hwëna ol gulk sun de blaorankam kaso yawalkam in, Zen diki Kristus Zëna.
5 Nëno mae mo auyan-azana zen sap eiwa ki kirekam de owasna hla nul gwek, hwëna Alap mo nwenak beya nik hom ëdakastïk. Beya wenya desa man husus gwibirida gweka. Zëno mae mo tok-tok naka zep sasa lang san hli nulida guk song gwek.
6 Zen Alap desa nëbe mae hap de ërak hap ki kang gulku– nen de hen zëno mae mo kim karek-kareksa hole-hle gwe-gwibin srëm hap.
7 Zep nen bap nen zëno mae mo kim yang tabin alap-alap hap boklena kom ta gwizimdin– men kirekam zëbe mae hap dena Alap mo olak lwakke, “Zen yang tabin alap-alap hap de tembane yawala insa dwensïblïndak, zao zep syak.”
8 Nen bap nen zëno mae mo kim kahalo-kahalokam lowehe gwen– men kirekam zen ëgwë gwekye. Zen in zep yaklana dekam 23 ribu enkam juwek.
9 Hen bap nen Biansa zëno mae mo kim akasïk gweblan. Zen in zep zen ahakon wanya de hit ti gwibin nikon juwe gwek.
10 Nen bap nen zëno mae mo kim Biansa tonsuk gweblan. Zen in zep desa Alap mo dam taha nakore zini heip gulku– men zen juwen hap dena ïrïk gïl gwendaye.
11 In zen ki zëbon mae kirekam jowe gwek, zen angkam nëbe mae hap de ërak makan lwaꞌan– nen an zene angkam aumwa hap denak lowe heꞌanye. Zen in zep zini lun Alap mo olak de aïsïlï insa ale nul gwek– nen de desa anakan enlala gwe-gwibin hip, “Bian sa angkam kirekam hen karek tabiri– men zen kirekam karekna nol gweꞌanye.”
12 Bera! Bahem anakan enaka boltere ta gwibin, “Ëe an Bian onak tatemë ëzauꞌun.” Zi de kirekam zënaka boltere tankam, zen hwëna zëno mae mo kim de kareknak zaran hap alp gwesïꞌïra.
13 Banakare kareksa de gon hap de enlalana men zen nësa de akasïblïn hap enhonak hata gwenda, zen nëno mae mo soson nakon hom taman kïnï gwenan. Sap Alap Zen taïblïblanna, zep Zen bëjen nësa de sërkam akasïblïn hap dwam gwibiridan– nëno mae mo sosonsa de gulmurunnu kimye. Hwëna kareksa de gon hap de enlala de nëbon mae hatankam, Zen hen nëbe mae hap orasa zertrei gwizimnira– nen dikim karekna in kon wet so gwen hap. Zen dekam zebe tatem ëzauk gwenan.
14 Zen in zep, aya-wal oso-wal, yang tabin alap-alapna emki langa tasibin.
15 Nen kïtak enlalana kike. En-em kles so gwen.
16 Nen kime Bian Yesus mo timsi de enlala gwibin hip de tembanena olgwen gwibirin, dekam nonol Bian hap dawemsae ol gweblanan. Dekam kime zëno kalsa de enlala gwibin hip de anggur hona otdeblanda gwenan, hen zëno timsi de enlala gwibin hip de rotina olgwenblanda gwenan, dekam zebe ënwe-mase gwe-gwenan: Nen ema Bian han ëraha-en gweꞌan.
17 Nen de Bian mo timsi de enlala gwibin hip de rotisa twinbinkim, nen sap beyana, hwëna dekam man nwe-mase gweꞌan– san de nëno mae mo timni aha-en. Sap nen mese aha-ere rotina insa olgwenbik.
18 Israelk de zini hen kirekam ëgwë gwenan. Men zen Alap hap de zïp soblan domba ninni dwin gwibiꞌin, zen en dekam zep Alap han nërumlae gweꞌan.
19 Hwëna kirekam insa ebe mae hap ale gulzim, zen em dikim anakan enlala gwibin hip hom, “Yang tabin alap-alapna zen eiwa ensasa naban.” Hen anakan homë kim emsa gubiridal, “Zëbe mae hap de tembanena, zen sosonna.” Zen waba tangan hap.
20 Ëe hwëna em dikim anakan tame gun hubë kirekam ebe mae hap ale gulzim: Yang tabin alap-alap hap mensa otweranna blom da gwibir-zimnin, zen Alapsa hom kim boltere da gwenan. Zen hwëna dowal-dowalsa kim boltere da gwibirin, hen deban mae kim nolëaha-en gwe-gweꞌan.
21 Zep nen bëjen nen Bian mo kalsa de enlala gwibin hip de anggur ho naban dowal hap de ho naban otdenkam siri so gwen. Hen bap nen Bian mo timsi de enlala gwibin hip de tembane naban dowal hap de tembane naban siri so gwen.
22 Ki san ha ema Bian de emsa husus gwibiridan hap ëdwam gweꞌan? San ha ema tim ul gweꞌan?– “Bian mo sosonna hom.”
23 Ahakon sa ano ola insa nulsul– anakan de ëgunkum, “Nen Kristen zini sap esa banakare maesa syal ei gwibir.” Hwëna kire zini ëe ama ding gulzimꞌin, “Banakare maesa de syal gwibinkim diki nonol enaka de enhonak anakan takensibirida gwenkam aïrïs, ‘San ha dekam ëe ama ëre mo Kristen bose walsya mas gwibiridaꞌan? San ha ano gwën san de ang tankam ahakon dekam sa Yesussu hli dal?’”
24 Bahem ere en mo timsi ngalap gwe-gwibin. Hwëna aha zisi emki hen enlala gwibirida gwen.
25 Pasarak de tweran ninni, sap esa enlala beya gwen srëmkam lop la gwer– anakan de takensibiridan srëmkamye, “An san yang tabin alap-alap hap de blom tabir-zimdin mosrona?”
26 Sap Alap mo olak man lwak: “Okamana an hen kïtak zëwe de kirekam-kirekamna, zen kïtak Bian mo bi gwibiridanna.”
27 Kristen srëm zi de emsa zëbon de tembane gwen hap gublunna, dwam gwenkam sap esa. Men kire tembanesa ep lop tablanna, em sap esa twenblan dala. Em bahem mae anakan de takensïblïn hap enlala gwen, “An san yang tabin alap-alap hap de blom tabir-zimdin mosrona?”
28 Hwëna tembane tanna iwe de eno Kristen bose emsa gublunkam, “Tweran ninni an yang tabin alap-alap hap de mosrona,” ki bahem twinbin. Sap zen zëre mo enhosa ebe hap zertrëblala. Sap zen hom dawemkam enho nakon anakan tame guꞌura, “Yang tabin alap mo sosonna hom.” Zep em de zëno nwenak tembanena insa twenblan dankam, desae kim karek san dep tïtï taꞌara. Zen srëmkam sap emaka ahakore en naban zitwenblaꞌara. Hwëna em ahakon esa ëenlala gwer, “Aha zi ba hap de zëre mo dam gulsun nukon tembane hap asa tru-tru gulblun hap?
29 (10:28)
30 Ëe de Alapsa gu soneblan naban de tembane gwenkam, ki aha zi ba hap de asa tembanena in hap husus gweblan hap? Ëe dwan mes-am tembanena in hap dawemna Alap hap golblal!”
31 Hwëna ëe a kirekamë mo kirekam de enlala gwen zi hip ding gulzimꞌin: Ba maesa de twinbinkim hen otdebinkim, ahaksa banakare maesa de gonna, zen Bian mo bosesa dikim tïngare zi teip gulsublun hap emki syal gwe-gwibin.
32 Bahem Kristussu de taïblïblannak de ëtatete gwen srëm zisi karek san dep de tïtï tan makan gweibirida gwen– sap Yahudi zi, sap Yunani zi, hen sap kïtak de Alap mo hlïl irin zi niye.
33 Zep em ano kim em hen lowehe gwen. Ëe tïngare zi dikim asa sam gwesïk gweblan habë alp gwe-gwenan. Ëe homë ëre mo tim hip dena anakan ngalap gwe-gwenan, “Ëe de aha zi mo dam gulsun sun ang gwenkam, ëe asa usak gwer.” Hwëna ano dwam gwibin tanganna, ano syala kon bap zen aha maena Yesussu hli tan. Diki kïtak zen ëngaya gwen.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA