Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ui pian nemuyuh ngerawé, O kinanak-kinanakku, luk mangun kuan tepun tau luk maya' ni Musa. Ideh pa liang laput, idi amung-amungdeh ineh neguta abpa' rayeh.
2 Amung-amungdeh pangeh rireb bang laput idi bang abpa' rayeh, pad mangun ku anak itin Musa.
3 Amung-amungdeh nekuman ruti ratnan Roh luk mepad mo',
4 idi nengirup luk rupen ratnan Roh luk mepad mo'. Ngaceku ideh pangeh nengirup ratnan batu luk ratnan Roh luk nemaya' nedeh ineh, idi batu ineh Keristus.
5 Iamo' mula' rat arangdeh na petulu pa kiung Allah. Ngaceku ineh ideh naté déi' su luk ali-ali.
6 Amung-amung ineh mangun ku luk pinginud kuan tau, pad tau na melili ku luk dat, kudeng lemulun ineh.
7 Aleg muyuh sembayang inan akang, mepad kudeng tuda'-tuda' rat arangdeh ineh. Ngaceku pangeh inayud, "Idi pupu ineh paneh netudo kuman idi ngirup, idi ngalai."
8 Aleg tau pasét, kudeng luk inau' tuda'-tuda' rat arangdeh ineh, pad bang seaco dueh ngepulu' teluh ngeribu burur naté.
9 Idi aleg tau nutun Tuhan, mepad kudeng tuda'-tuda' rat arangdeh ineh pad ideh naté tinicuk menipeh.
10 Idi teh aleg muyuh dureng-dureng, mepad kudeng tuda'-tuda' rat arangdeh, pad ideh pinaté melaikat luk ngaté.
11 Amung ini mangun kuandeh mangun ku luk pinginud kuan lun baken, idi amung ini pangeh inayud mangun ku bada' kuan tau. Ngaceku tau mulun kareb malé kekipedneh.
12 Idé-idé luk ngerawé bururneh tuped meraben, do' ieh matar pad ieh na mebpeh.
13 Anid-anid tutun luk pekalai inan lemulun mo' pangeh nacing nemuyuh. Iamo Allah ineh lutep maya' jani', idi na Ieh nima' nemuyuh tetunin meluun ratnan tueh muyuh, iamo' dengan tutun ineh Ieh sikal nganau' aceh dalan mepuit, pad muyuh miak tuman.
14 Ngaceku ineh, O amung-amung luk inanku mawa, ngado burur muyuh ratnan sembayang inan akang.
15 Ui pebala nemuyuh mepad kudeng lun luk mileh. Do' muyuh sebuleng maad balaku ini.
16 Tau maré ubur kuan Allah ngaceku sangkir peruan ineh. Idi kareb tau ngirup ratnan sangkir ineh, naké tau ngalap babpat bang dara' Keristus? Idi kareb tau kuman ruti luk pinuri' tau ineh, naké tau ngalap babpat bang burur Keristus?
17 Ngaceku ruti luk sebalad ineh, kudeng ineh teh tau luk mula' ini mangun ku sebuleng burur, ngaceku amung-amung tau nekuman ratnan ruti luk sebalad ineh.
18 Ngerawé lun Iberani. Lemulun luk kuman luk biré luun bubpun ineh ngalap babpat ratnan kekamen ngasa' bubpun ineh.
19 Anunké ilung balaku? Akang idi akan luk biré inan akang ineh inan ilungké?
20 Na! Ilung balaku, ieh ineh anun-anun luk biré luun bubpun akang ineh, baken biré kuan Allah, iamo' kuan ada'. Idi ui na sikal nemuyuh perurum dengan ada' ineh.
21 Muyuh na miak ngirup ratnan sangkir Tuhan idi ratnan sangkir ada'. Idi muyuh na miak ngalap babpat ratnan téng Tuhan idi ratnan téng ada' ineh.
22 Pianké tau ku Tuhan temaruh? Inanké tau ngerawé netau meluun tueh ratnan Tuhan?
23 Inan luk pebala, "Ui miak nganau' anun-anun luk pianku." Matu! Iamo' baken amung-amung ineh inan ulek kuanmu. "Kai miak nganau' anun-anun." Iamo' baken amung-amung ineh inan ulek.
24 Idi aleg seburur lemulun pana' nakap peruanneh sebuleng, iamo' do' ngerawé lun baken.
25 Idi uang pung luk pisuen déi' kadai, miak kenen muyuh dengan na ngitun, pad teruayen niat muyuh na mesala'.
26 Ngaceku kebala Tuhan, "Tana' ini idi amung uangneh, ieh ineh Tuhan kuan."
27 Kudeng seburur lun na manu nawar nemuyuh kuman idi muyuh sikal amé', kenen muyuh anun-anun luk inau' kuan muyuh dengan na ngitun pad teruayen niat muyuh na mesala'.
28 Iamo' kudeng selemulun pebala kuan muyuh, "Akan ini pangeh biré inan akang," aleg muyuh kuman ineh, pad na ngesabeng lemulun ineh, idi teruayen niat.
29 (Baken ngaceku teruayen niat muyuh sebuleng, iamo' pad teruayen niat lun baken ineh na mesala'.) Kian inan luk pebala lek, "Ngudehké puitku ineh kumin ngaceku ratnan teruayen niat lun baken?
30 Kudeng ui maré ubur kuan Allah ngaceku akanku, ngudehké ui uen lemulun ngesala', ngaceku ui pangeh nemaré ubur kuan Allah ngaceku akan ineh."
31 Anun-anun luk ruen muyuh, do' kuman idi ngirup pana', do' muyuh nganau' amung ineh pad ngerayeh Allah.
32 Aleg muyuh ngacing sabeng kuan lun Yahudi idi lun pupu baken idi kuan sidang Allah pana'.
33 Do' maya' ulunku! Bang anun-anun luk ruenku, ui nutun ngawang niat lun mula'! Na ui nakap luk do' kuanku sebuleng, iamo' ui ngerawé lun baken, pad ideh miak uen ngulun.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA