Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Jelma sai percaya bahwa Isa iado Penyelamat sai dijanjiko Allah, jelma udi iado anak-Ni Allah. Jelma sai mengasihi bapak, mengasihi anakni juga.

² Jama cara injido ram pandai bahwa ram mengasihi anak-anak-Ni Allah: Ram mengasihi Allah rik taat jama perintah-perintah-Ni.

³ Mani, mengasihi Allah retini taat jama perintah-perintah-Ni. Rik perintah-perintah-Ni mak mebiak untuk ram,

⁴ mani unggal anak-Ni Allah sanggup ngalahko dunia sai jahat inji. Rik ram ngalahko dunia jama iman ram.

⁵ Sapa sai dapok ngalahko dunia? Angkah jelma sai percaya Isa iado Anak-Ni Allah.

⁶ Isa Almasihdo sai ratong mik dunia jama way baptisan-Ni rik jama rah kematian-Ni. Ia ratong lain angkah jama way gaoh, kidang jama way rik rah. Rik Ruh-Ni Allah tenggalan ngeni kesaksian bahwa ano benor, mani Ruh mak pernah bebuhung.

⁷ Wat telu saksi:

⁸ Ruh-Ni Allah, way rik rah -- ketelu-teluni ngeniko kesaksian sai gegoh.

⁹ Ram percaya jama kesaksianni manusia, kidang kesaksian-Ni Allah lebih kuat lagi. Rik udido kesaksian sai radu dikeniko ulih-Ni Allah tentang Anak-Ni.

¹⁰ Ulihni seno, jelma sai percaya jama Anak-Ni Allah, radu nerima kesaksian udi di delom hatini; kidang jelma sai mak percaya jama Allah, radu nyangko seolah-olah Allah pembuhung, mani ia mak percaya api sai dicawako Allah tentang Anak-Ni.

¹¹ Injido kesaksian udi: Allah radu ngeniko jama ram hurik sejati rik kekal, rik Anak-Ni iado sumber hurik udi.

¹² Jelma sai ngakui Anak-Ni Allah, nerima hurik seno; rik jelma sai mak ngakui Ia, mak nerima hurik udi.

¹³ Nyak nulis jama keti sai percaya jama Anak-Ni Allah, in keti pandai bahwa keti radu ngedok hurik sejati rik kekal.

¹⁴ Rik ram bani ngehadap Allah, mani ram yakin Ia ngabulko dua ram, kik ram ngilu api gaoh sai nutuk kehaga-Ni.

¹⁵ Mani ram pandai bahwa Ia ngedengiko ram kik ram ngilu nihan jama Ia, maka ram pandai muneh bahwa Ia ngeniko ram api sai ram kilu jak Ia.

¹⁶ Kik keti ngeliak salah sai jelma peperda Kristen ngelakuko dusa sai mak ngakibatko jelma udi kelebonan hurik sejati rik kekal, hagani keti bedua jama Allah; rik Allah haga ngeniko hurik udi jama ia. Inji berkenaan jama tian sai dusani mak ngakibatko tian kelebonan hurik udi. Kidang wat dusa sai ngakibatko jelma kelebonan hurik udi. Tentang hal seno nyak mak cawa bahwa keti harus bedua jama Allah.

¹⁷ Sunyin perbuatan sai salah yakdo dusa, kidang wat dusa sai mak ngakibatko jelma kelebonan hurik sejati rik kekal udi.

¹⁸ Ram pandai bahwa sunyinni jelma sai radu jadi anak-anak-Ni Allah, mak terus-menerus nyani dusa, mani Anak-Ni Allah ngelindungi ia rik Si Jahat mak dapok nyani api-api tehadap ia.

¹⁹ Ram pandai bahwa ram kedau-Ni Allah, walaupun seluruh dunia inji di debah kekuasaan Si Jahat.

²⁰ Ram pandai bahwa Anak-Ni Allah radu ratong rik radu ngeniko pengertian jama ram, in ram kenal jama Allah sai benor. Ram hurik besatu jama Allah sai benor rik hurik besatu jama Anak-Ni Isa Almasih. Injido Allah sai benor, rik injido hurik sejati rik kekal.

²¹ Anak-anakku, jaohkodo dirimu jak berhala-berhala!

1 Yohanes

Video 1 Yohanes 5

Ikuti Kami:

KONTAK | PARTISIPASI | DONASI