Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Gedagee 'o Domba ma Ngowaka 'o segeli moioli yapooteke so 'o ngai tumudiingou, de 'o sorogaaka kairii-riidika poilia 'o takoro ma songona.

² Ge'enaka de tamake 'o mala'ekati 'o ngai tumudiingi 'ima'okode ma Jo'oungu ma Dutu wi bionoka, de ma mala'ekati ge'ena yadawongo 'o torompet ngai tumudiingi.

³ 'O mala'ekati 'iregu moi, gee 'i'asa 'o manyanyi ma ngii 'o guraci 'o ngai moi, 'iboa de 'ima'okode 'o su-suba 'idu-dutuuku ma bionoka. Ma mala'ekatika ge'ena naga moi yokula 'o manyanyi posironga ma amokoka ma ngale yosinoa ma Jo'oungu ma Dutu wi nyawa 'iodumu manga lahidoaka, de ma ngale 'isisuba 'o su-suba 'idu-dutuuku 'o guraci yadi-diaiku ma dekuoka gee 'o koana ma go-gogere ma bionoka.

⁴ 'O manyanyi 'ituu-tuukika 'o sawokoka gee 'o mala'ekati ya'aono, ma dowo 'idoa ma Jo'oungu ma Dutude 'imatuono de ma Jo'oungu ma Dutu 'awi nyawa-nyawa manga lahidoa.

⁵ Ge'enaka de 'o mala'ekati ge'ena ya'ese 'o manyanyi ma ngii ge'ena, de 'isinoa 'o 'uku gee ya'ese 'o su-suba 'idu-dutuukino, de 'isi'umo 'o duniaku. So 'o duturu 'ikatiwiwiri de 'o tawi-tawi yakaletongoka, de 'i'osu.

⁶ Ge'ena 'ipasa de 'o mala'ekati ngai tumudiingi gee 'o torompet 'o ngai tumudiingi ya'aono, 'imadudu-duanga ma ngale yauwaka.

⁷ 'O mala'ekati gee ma di-disiraka yauwaka ma torompet, de 'o 'eis 'iteto-teto de 'o 'uku 'imakaganuku de 'o 'aunu 'ipoa 'o duniaku. 'O dunia 'isoka 'ipula sa'angeka so 'o bula moi ma gota-gota de ma 'ubutu de 'okia sonaa 'i'oo-'oode 'iodumu ya'uku yabootuku.

⁸ Ge'enaka de 'o mala'ekati moioli yauwaka ma torompet so 'o ngai modidiou, de 'okia naga moi 'iamo-amoko 'isoka 'o gigie 'iluru-lurusu yosi'umo 'o ngootuku. So 'o ngooto 'isoka 'ipula sa'angeka gee 'o bula moi 'imadadi 'o 'aunu,

⁹ de ma ngooto gee 'imadadiokau 'o 'aunu, ge'enaka 'iodumu gee 'i'ahu-'ahu 'ikokisongene, de 'o kapali gee ge'enaka mita 'ikokitorou.

¹⁰ Ge'enaka de 'o mala'ekati moioli yauwaka ma torompet so 'o ngai sa'angeu, de 'o ngoma 'iamo-amoko moi gee ma letongo 'isoka 'o 'obori, 'iotaka 'o diwanguku de yadaene 'o ngai-ngairi de 'o 'akere ma gu-gububulu 'o duniaka ne'ena gee 'isoka 'ipula sa'angeka so 'o bula moi yakokitapadu.

¹¹ 'O ngoma ge'ena ma ronga, 'o Apsintus, ma ngale 'imali. So ma 'akere gee 'o ngoma yata-tapadu ge'ena rekeni 'iodumu kaimali-maliou, de 'o nyawa manga gudai yosongene sababu ya'okere ma 'akere gee 'imaliokau ge'ena.

¹² Ge'enaka de 'o mala'ekati moioli yauwaka ma torompet so 'o ngai soatou, de yatatoko 'o wange ma ako, 'o mede de 'o ngoma, so 'isiwara 'isoka biasawau. 'O wange-wange gee ma 'orasi 'isoka 'ipula sa'angeka, 'o bula moi 'o wange koisiwaruwa. Koge'enali mita 'o obi-obiri, gee ma 'orasi 'isoka 'ipula sa'angeka, 'o bula moi 'o mede de 'o ngoma koisiwaruwa.

¹³ Ge'enaka de tomalega dakuie de tamake 'o kodoba 'o ngai moi 'iso-sosono daku 'o gurutie 'o ngawa-ngawaka, de to'isene 'isigasoko, "Niotorouoka! Niotorouoka! Niotorouoka 'o nyawa 'o duniaka 'iodumu, gee dua nio'isene 'o mala'ekati 'iregu ngai sa'ange ma torompet yauwaka!"

Wahyu

Video Wahyu 8

Ikuti Kami:

KONTAK | PARTISIPASI | DONASI