Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ene, sarạeng Ahusu Domba ene e nělẹ̌kabe segelẹ̌ kapitune e, tangu měngkate sěngkianụ e sorga e kiměndị mangawe měloarang kaorasẹ̌ děngụ e.

² Mase iạ nakasilọe malạekatẹ̌, i sire pitung katau mạhundarisị su těngon Mawu Ruata, kụ i sire nighělirangken napiri pitumbua.

³ Sěngkatau malạekatewe wal᷊ine kụ mạnal᷊endeng pěnanawungang buwụ wọu wul᷊aeng, himaung kụ dimarisị su těngon pananěmbaěng. I sie nighělirangu kamania mal᷊awọ, itakidewe su kakal᷊iomanengu manga kawanuan Duata tadeạu itawung su pananěmbaěng bọu wul᷊aeng ěndaị su těngong kaderang kawawantugẹ̌ e.

⁴ Nihindọ u kakal᷊iomanengu manga kawanuan Duata e, tipung buwụ rụděllị e tụtiowol᷊ẹ̌ bọu limang malạekatẹ̌ kụ dụdarisị su těngon Mawu Ruata e.

⁵ Bọu ene malạekatẹ̌ e něngal᷊ạ e pananawungange, kụ nitahoěngu putung bọu pananěmbaěnge, mase nikaese sol᷊ong bowon dunia. Tangu gimal᷊ědụ e rěllụ dingangu nẹ̌kilạ mětẹ̌tatiwal᷊esẹ̌, dingangu nělinuhẹ̌.

⁶ Bọu ene, i sire pitu manga malạekatẹ̌ e měmpạngumbelẹ napiri pitu e, němpẹ̌dariahị e mẹ̌tiụ napiri.

⁷ Malạekatẹ̌ humotonge nẹ̌tiụeng napirine, ute sěngkianụ e nirasehangu tahiti kompelẹ̌, dingangu putung laụ u raha sol᷊ong bowon dunia. Sěngkatěllung kapahiakengu dunia e nasuẹ e natutung; kerene lai sěngkatěllung kamonaěngu kakaluang e, dingangu apạewen děmpugẹ̌ melong e.

⁸ Mase malạekatẹ̌ karuane nẹ̌tiụ e napirine, tangu piạ e apa masaria-saria kụ kinasilo kere wul᷊ude rụděllị niwahung sol᷊ong l᷊audẹ̌. Sěngkatěllung bahageangu l᷊audẹ̌ e nakoạ daha,

⁹ kụ nate e sěngkatěllung kapahiakengu riadikang su l᷊audẹ̌; kerene lai nasuẹ e naupu sěngkatěllung kapahiakengu manga kapalẹ̌ e.

¹⁰ Bọu ene malạekatẹ̌ katěllune nẹ̌tiụeng napirine, tangu wituing gẹ̌guwạ sěmbaụ, rụděllị kere utụ, nanawo wọu l᷊angị, kụ nanawo su sěngkatěllung kapahiakengu manga sal᷊ụ dingangu manga simbul᷊u akẹ.

¹¹ (Arengu wituing ene ute, i "Mapaị".) Tangu sěngkatěllung bahageange wọu akẹ e napaị, dingangu mal᷊awọ-l᷊awọ taumata nairị u pěnganginung akẹ mapaị ene.

¹² Mase malạekatẹ̌ kaěpạ e nẹ̌tiụeng napirine. Tangu kinapěpele sěngkatěllung bahageange wọu matangěllo, sěngkatěllung bahageange wọu wul᷊ang, dingangu sěngkatěllung bahageange wọu manga wituing hakịu niwụ e sěngkatěllung bahageange wọu toghasu sěnnang i sire. Kerene lai sěngkatěllung bahageangu ěllo e marěndung, dingangu kerene lai sěngkatěllung bahageange wọu hěbi.

¹³ Mase iạ nakasilo, tangu iạ e nakaringihẹ̌ piạ manụ kamamaresẹ̌ sěmbaụ tụtěllạ marangẹ su winangaeng, kạěnggahe, "Silakạ! Silakạ! Silakạete patikụ umatẹ̌ su dunia kereu makaringihe malạekatẹ̌ tatěllu wal᷊ine e němpẹ̌tiụ napirin sire sarung!"

Wahyu

Video Wahyu 8

Ikuti Kami:

KONTAK | PARTISIPASI | DONASI